दीड महिन्यांवर येऊन ठेपलेल्या गणेशोत्सवाची तयारी परदेशातही सुरू झाली आहे. पुण्यातून बाप्पाच्या मूर्ती परदेशवारीला निघाल्या असून लवकरच त्या तिथे दाखल होणार आहेत. परदेशातील मराठी मंडळे आणि संस्थांनी खास पुण्याहून बाप्पाच्या मूर्ती तयार करून घेतल्या आहेत. यंदा इको फ्रेंडली गणेश मूर्ती तयार करून घेण्यावर भर देण्यात आला आहे.
मॉरिशस, हॉलंड, कॅनडा, लंडन, अमेरिका, ऑस्ट्रेलिया, न्यूझिलंड, दक्षिण आफ्रिका या देशांमध्ये प्रामुख्याने बाप्पाच्या मूर्तीला मोठ्या प्रमाणावर मागणी आली आहे. लालबागचा राजा, दगडूशेठ, आसनारूढ असलेले बाप्पा अशा मूर्तींना यंदा परदेशात मागणी आहे. विमानाद्वारे बाप्पा परदेशी जाणार असल्याने मूर्तीकारांकडून त्यासाठी खास काळजी घेण्यात आली आहे. बाप्पांच्या मूर्तीला विशिष्ट पद्धतीचे पॅकिंग करण्यात येणार असून गणेशोत्सवाच्या आधी एक महिना बाप्पा परदेशी पोहोचतील अशी व्यवस्था करण्यात येणार आहे.
मूर्तीकार राजेंद्र देशमुख गेल्या चौदा वर्षांपासून गणेश मूर्ती परदेशी पाठवत आहेत. याही वर्षी हॉलंड, कॅनडा, मॉरिशस अशा ठिकाणी ते गणेश मूर्ती पाठवणार आहेत. नुकतीच त्यांनी लंडनला गणेश मूर्ती पाठवली आहे. छोट्या आणि पर्यावरणपूरक मूर्ती परदेशातील यंदाच्या गणेशोत्सवाचे आकर्षण असणार आहेत. मूर्तीला कोणत्याही प्रकारची हानी होऊ नये म्हणून मुंबईत विशिष्ट प्रकारचे पॅकिंग करण्यात येणार असून त्यानंतर विमानाच्या स्वतंत्र कंटेनरद्वारे गणेश मूर्ती त्या त्या देशामध्ये पाठवल्या जाणार आहेत. देशमुख दरवर्षी नव्या क्लृप्ती वापरून मूर्तीमध्ये वेगळेपण निर्माण करण्याचा प्रयत्न करतात. यंदा त्यांनी मूर्ती अधिकाधिक पर्यावरणपूरक कशी होईल, यासाठी प्रयत्न केले आहेत. त्या साठी त्यांनी पर्यावरणपूरक रंग वापरण्याचा निर्णय घेतला आहे. परदेशातील वातावरणाला अनुसरून ते मूर्तीची निर्मिती करत आहेत. प्रवासात मूर्तीला इजा होऊ नये, यासाठी त्यांनी वजनाने हलक्या अशा बाप्पाच्या मूर्ती तयार करण्यावर भर दिला आहे. त्यांच्याकडे परदेशासह पुण्यातील चारशे सार्वजनिक गणेशोत्सव मंडळांच्या गणेशमूर्ती आकार घेत आहेत.
.....
गणपतीबाप्पाच्या प्रेमापोटी गेल्या ४५ वर्षांपासून आमचा कारखाना सुरू आहे. यंदा परदेशात पर्यावरणपूरक गणेशमूर्तींना मोठी मागणी झाली आहे. लवकरच या मूर्ती परदेशात दाखल होतील. तेथील वातावरणाच्या दृष्टीने मूर्ती एक महिना आधी पाठवणे गरजेचे असते. त्यासाठी सर्व तयारी पूर्ण झाली आहे.
- राजेंद्र देशमुख, मूर्तीकार
मोबाइल अॅप डाउनलोड करा आणि राहा अपडेट
