आठवडाभराच्या विश्रांतीनंतर येत्या दोन दिवसांत मान्सून पुन्हा सक्रिय होणार आहे. अनुकूल वातावरणीय बदलांमुळे मान्सूनचा पुढचा प्रवास सुरू झाला असून, राज्याच्या विविध भागात चांगल्या पावसाची शक्यता हवामान विभागाने वर्तवली आहे. पुण्यामध्ये पुढील दोन दिवस पावसाच्या हलक्या सरी कोसळण्याची शक्यता आहे.
जून महिन्यात राज्यात जोरदार हजेरी लावल्यानंतर पावसाने जुलैच्या पहिल्याच आठवड्यात विश्रांती घेतली. साधारणतः पंधरा जुलैपर्यंत मान्सून संपूर्ण देश व्यापतो. मात्र, प्रतिकूल बदलांमुळे काही दिवसांपासून पावसाचा प्रवास थंडावला. महाराष्ट्रातही पुण्यासह बहुतांश जिल्ह्यात गेल्या चार दिवसांपासून पावसाने विश्रांती घेतली होती. त्यामुळे शेतकऱ्यांचे पेरणीचे नियोजन फसले होते. पण, सध्या कोकणाचा दक्षिण किनारा ते केरळच्या उत्तर किनारपट्टीवर कमी दाबाचा पट्टा तयार झाल्याने पुढील चार दिवसांत पाऊस वाढणार आहे. देशपातळीवरही मान्सूनच्या प्रगतीस पोषक वातावरण असून, हिमाचल प्रदेश आणि जम्मूच्या काही भागात तसेच पूर्व राजस्थान, हरियाणा आणि पंजाबच्या काही भागात मान्सून दाखल झाला आहे.
अनुकूल परिस्थितीमुळे गुरुवारपासून राज्यात पावसाची चांगली स्थिती राहणार आहे. कोकण, मध्य महाराष्ट्र, मराठवाड्यामध्ये मुसळधार पाऊस पडेल. कोकणच्या काही भागात १४ आणि १५ जुलैला अतिवृष्टी होण्याची शक्यता आहे, अशी माहिती पुणे हवामान विभागाच्या संचालक डॉ. सुनीता देवी यांनी सांगितले.
मोबाइल अॅप डाउनलोड करा आणि राहा अपडेट
