दीपक बोडेकरचे घर दोन पत्र्यांचे. त्याला साधी खिडकीही नाही. स्वयंपाक करताना होणारा प्रचंड धूर. एक पंखा सोडला तर इतर कोणत्याही सुविधा नाहीत. अशा खडतर परिस्थितीतही दीपक जिद्दीने उभा राहिला. मनात असलेल्या विलक्षण ध्येयासक्तीने त्याने सगळ्या संकटांचा सामना करत दहावीची लढाई जिंकली.
दीपकचे वडील सुरेश बोडेकर मार्केटयार्ड येथे हमाली करतात. आई घरकाम करून थोडेफार पैसे मिळवते. दोघेही काबाडकष्ट करून दीपक आणि त्याच्या तीन भावंडांचे पालन-पोषण करतात. या परिस्थितीची जाण असल्याने दीपकने आई-वडिलांकडे कधी कोणत्याच गोष्टींचा हट्ट केला नाही. जे मिळेल त्यात समाधान मानून त्याने आपल्या ध्येयाचा पाठलाग केला.
या संपूर्ण प्रवासात दीपकला अनेक बऱ्या-वाईट प्रसंगांना तोंड द्यावे लागले. चांगले क्षण त्याने लक्षात ठेवले. त्याच्या शाळेतील राजेंद्र पवार सरांनी त्याला हवी ती मदत केली. आठवीपासून शाळेची फी त्यांनीच भरली. दर वर्षी शाळेचे नवे कपडे, बूट, वह्या, पुस्तकेही त्यांनी दिली. दीपकला शिकून मोठे व्हायचे आहे, हे स्वप्न सरांना त्याच्या डोळ्यात दिसले होते. त्यामुळेच, त्यांनी दीपकला शिक्षणासंदर्भातील कोणत्याही गोष्टीची कमी पडू दिली नाही. दीपकची आई महागावकरांच्या कुटुंबात घरकामासाठी जाते. त्या कुटुंबानेही दीपकची जिद्द ओळखून त्याला वेळोवेळी मदत केली आहे. दीपकला अकरावीला विज्ञान शाखेत प्रवेश घ्यायचा आहे. बारावीनंतर जेईई-अॅडव्हानसची परीक्षा देऊन त्याला ‘आयआयटी’मध्ये प्रवेश घ्यायचा आहे. विज्ञान शाखा, जेईईची परीक्षा याबद्दल दीपकला प्रचंड आत्मविश्वास आहे. आयआयटीमधूनच इंजिनीअर होण्याचा पक्का निर्धार त्याने केला आहे.
‘संघर्ष जवळून पाहिला’
दीपकला लहानपणापासून अपंगत्व असल्याने त्याच्या उपचारावर खूप खर्च व्हायचा. त्यामुळे शाळेत काही वस्तू लागल्या तर दीपक घरात मागण्यासाठी घाबरायचा, ही बाब लक्षात आल्यानंतर त्याच्या शालेय वस्तूंचा खर्च मी उचलायचे ठरवले. तो अत्यंत हुशार मुलगा आहे. शारीरिक त्रास असतानाही त्याने मिळवलेले यश अतुलनीय आहे. आयुष्यात उंच भरारी घेण्यासाठी त्याला आर्थिक मदतीची नितांत आवश्यकता आहे. त्याला जर योग्य आर्थिक मदत मिळाली तर तो निश्चितच एक उत्तुंग करिअर करू शकतो. आतापर्यंत त्याने शिक्षणासाठी केलेला संघर्ष मी जवळून पाहिला आहे.
- राजेंद्र पवार, दीपकचे शिक्षक
‘ध्येय साकारणारच’
परिस्थिती कोणतीही असो मी माझे ध्येय साकारणारच. मला शिकून माझ्या आई-बाबांना या छोट्या खोलीतून बाहेर काढायचे आहे. त्यांनी आयुष्यभर कष्ट करून मला आणि माझ्या भावंडांना शिकवले. मोठे होऊन त्यांना आनंदी ठेवायचे आहे.
- दीपक बोडेकर
मोबाइल अॅप डाउनलोड करा आणि राहा अपडेट