म. टा. प्रतिनिधी, पुणे
‘मी देखील गणेशोत्सव मंडळाचाच एक कार्यकर्ता आहे. गणेशोत्सवात काम करूनच राजकारणात आलो आहे. त्यामुळे, कार्यकर्त्यांना होणारा त्रास मी जाणतो. म्हणूनच गणेश मंडळांच्या कार्यकर्त्यांना होणाऱ्या त्रासाबाबत मुख्यमंत्र्यांची भेट घेऊन हा प्रश्न लवकरात लवकर निकाली काढला जाईल,’ असे आश्वासन खासदार अनिल शिरोळे यांनी मंगळवारी दिले. गणेश मंडळे आणि कार्यकर्त्यांवर दाखल करण्यात आलेल्या खटल्यांबद्दलही त्यांनी नाराजी व्यक्त केली.
श्रीमंत दगडूशेठ हलवाई गणपती ट्रस्ट, सुवर्णयुग तरुण मंडळातर्फे राष्ट्रीय गणेशोत्सव स्पर्धेचा पारितोषिक वितरण समारंभ गणेश कला क्रीडा मंच येथे पार पडला. त्या वेळी ते बोलत होते. महापौर मुक्ता टिळक, माजी आमदार उल्हास पवार, दगडूशेठ हलवाई दत्तमंदिर ट्रस्टचे अध्यक्ष अंकुश काकडे, नगरसेवक हेमंत रासने, अजय खेडेकर, रवींद्र माळवदकर, अॅड. प्रताप परदेशी, दगडूशेठ हलवाई ट्रस्टचे अध्यक्ष अशोक गोडसे, महेश सूर्यवंशी, सुनील रासने आदी या वेळी उपस्थित होते. भोपळे चौकातील हिंद तरुण मंडळाला यंदाचा जय गणेश भूषण पुरस्कार प्रदान करण्यात आला. धनकवडीतील आदर्श मित्र मंडळाने प्रथम क्रमांकाचे पारितोषिक पटकावले.
‘गणेशोत्सव ही विधायक कार्य करणारे कार्यकर्ते निर्माण करणारी शाळा आहे. गणेश मंडळाच्या माध्यमातून गेल्या अनेक वर्षांपासून समाजात प्रबोधनाचे काम सुरू आहे. आज कार्यकर्त्यांवर मोठी जबाबदारी आहे. महापौर मुक्ता टिळक यांच्या नेतृत्वाखाली आपण समस्यामुक्त पुण्याकडे वाटचाल करीत आहोत. समस्या सोडवण्यासाठी चांगल्या कार्यकर्त्यांची गरज आहे,’ असे शिरोळे म्हणाले. ‘चांगले पुणे घडवण्यासाठी केवळ सरकारच नाही तर नागरिकांचाही सहभाग असायला हवा,’ अशी अपेक्षाही त्यांनी व्यक्त केली.
‘गणेश मंडळे आणि कार्यकर्त्यांवरील खटल्यांबाबत पोलिस आयुक्त रश्मी शुक्ला यांच्याशी माझे बोलणे झाले आहे. याबाबत सकारात्मक भूमिका घेण्याचे त्यांनी मान्य केले आहे. त्यांच्यासमोर कार्यकर्त्यांची भूमिका मांडण्याची माझी जबाबदारी आहे. परंतु, आपणही आचारसंहिता ठेवली, तर पुढे अशा घटना घडणार नाहीत. दर वर्षी गणेश मंडळांच्या परवानग्यांसाठी पोलिसांप्रमाणेच पालिकेशीही कार्यकर्त्यांच्या संघर्ष होतो. तो संघर्ष टाळण्यासाठी मंडळांना ऑनलाइन किंवा ऑफलाइन पद्धतीने सर्व परवानग्या देण्याचा आमचा प्रयत्न आहे. पुणे शहराचे नाव जगभरात न्यायचे असेल, तर पर्यावरणपूरक मार्गांचा अवलंब करायला हवा,’ असे मत महापौरांनी व्यक्त केले.
‘पोलिसांकडूनच उत्सवाला गालबोट’
खटले दाखल करुन पोलिस उत्सवाला गालबोट लावत आहेत. मानाच्या गणपती मंडळांवर गुन्हा दाखल करण्याचे कृत्य शोभनीय नसून, हा गणेशोत्सव कार्यकर्त्यांचा अपमान आहे. त्यामुळे गणेश स्थापनेपूर्वी हे खटले मागे घ्यावेत, अशी मागणी अंकुश काकडे यांनी केली. कायद्याचा बाऊ न करता सामंजस्याची भूमिका पार पाडण्याकरीता सर्वांनी एकत्र येऊन तोडगा काढायला हवा. आवाजावरील मर्यादेच्या मुद्द्यावरही सामंजस्याने चर्चा व्हायला हवी, याकडे अशोक गोडसे यांनी लक्ष वेधले.
मोबाइल अॅप डाउनलोड करा आणि राहा अपडेट
