म. टा. प्रतिनिधी, पुणे
मान्सूनच्या पहिल्याच पावसाने शहरातील वाहतुकीचा बोजवारा उडाल्यानंतर पायाभूत सुविधांबाबत प्रश्नचिन्ह उपस्थित केले जात आहे. अवघ्या दोन दिवसांनी शाळा सुरू होत आहेत. शाळा सुरू झाल्यानंतर सुरळीत वाहतूक सुरळीत ठेवण्याचे आव्हान प्रशासनासमोर आहे.
शहरात सोमवारी मान्सूनचे जोरदार आगमन झाले. दुपारी सव्वा ते दीड तास पडलेल्या पावसाने शहरभर वाहतुकीचा वेग मंदावला होता. काही रस्त्यांवर पाणी साचल्याने वाहतुकीचे मार्गच बंद झाले होते. तर, अनेक रस्त्यांची एक लेन साचलेल्या पावसाने बंद झाली होती. त्यामुळे मुख्य रस्त्यांसह अरुंद रस्त्यांवर कोंडीचे चित्र होते. शहराच्या मध्यवस्तीत पीएमपीच्या पाच बस बंद पडल्याने कोंडीत भर पडली होती. तसेच, शहराच्या विविध भागांत रस्त्यांची कामे अपुरी असल्याने कोंडीला आणखी हातभार लागला. सोमवारी सायंकाळी शिवाजी रस्ता, बाजीराव रस्ता, पेठांच्या भागात वाहनांच्या रांगा होत्या. येत्या गुरुवारी शहरातील बहुतांश शाळा सुरू होणार आहेत. मध्यवर्ती भागामध्ये शाळांचे प्रमाण अधिक आहे. शाळांतील विद्यार्थी वाहतूक, रिक्षा, व्हॅन यांसारख्या वाहनांच्या पार्किंगचा प्रश्न दर वर्षीप्रमाणे यंदाही भेडसावणार आहे. या समस्यांबरोबरच मोठा पाऊस झाल्यास कोंडीचे आव्हानही प्रशासनासमोर आहे.
‘पीएमपी’पुढे आव्हान
पुणे महानगर परिवहन महामंडळाच्या बसचे ‘ब्रेक डाउन’ हा विषय फार जुना आहे. मात्र, पावसाळ्यामध्ये ब्रेक डाउनचे प्रमाण वाढत असल्याचे गेल्या काही वर्षांतील निरीक्षण आहे. एखाद्या रस्त्यावर बस बंद पडल्यास त्या संपूर्ण वाहनांच्या रांगाच लागतात. गेल्या काही महिन्यांत ‘ब्रेक डाउन’चे प्रमाण घटले आहे. पावसाळ्यात ‘ब्रेक डाउन’चे प्रमाण घटविण्याचे आव्हान पीएमपीसमोर असणार आहे.
पोलिसांची भूमिका महत्त्वाची
पावसामध्ये वाहतूक धीम्या गतीने चालते. वीजपुरवठा खंडीत होऊन किंवा तांत्रिक बिघाडामुळे वाहतूक नियंत्रक सिग्नल अनेकदा बंद पडतात. अशा वेळी वाहतूक सुरळीत चालावी, यासाठी वाहतूक पोलिसांची भूमिका महत्त्वाची ठरणार आहे.
नियम डावलून काम केल्याने साचते पाणी
सिमेंट काँक्रिटचे रस्ते करताना पावसाचे पाणी जमिनीत मुरावे, यासाठी बंधनकारक असलेल्या सूचनांना केराची टोपली दाखवल्याने आणि पालिकेतील अधिकाऱ्यांनी संबंधित ठेकेदारांवर त्यासाठी कारवाई न केल्याने विविध रस्त्यांवर पाणी साठून राहत असल्याची टीका स्वयंसेवी संस्थांकडून केली जात आहे. प्रभागातील रस्ता सिमेंट काँक्रिटचा असावा, या लोकप्रतिनिधींच्या हट्टामुळेच ही स्थिती निर्माण झाल्याचा आरोप केला जात आहे.
शहरात पडलेल्या पहिल्या पावसानंतर शहरातील अनेक सिमेंट काँक्रिटच्या रस्त्यांवर पावसाचे पाणी साठले. सिमेंट काँक्रिटचे रस्ते तयार करताना ते कसे करावेत, याबाबत पालिकेची नियमावली ठरलेली आहे. रस्ते तयार करताना रस्त्याच्या दोन्ही बाजूंना पावसाचे पाणी वाहून जाण्यासाठी पावसाळी गटारे बांधण्याची गरज असते. या गटारांमधून पाणी वाहून जाताना हे पाणी जमिनीत मुरावे, यासाठी ठराविक अंतरावर खड्डे (रिचार्ज पीट) तयार गरजेचे असते. मात्र, या नियमावलीला हरताळ फासून रस्त्याचे काम करणारे ठेकेदार चुकीच्या पद्धतीने सिमेंट काँक्रिटचे रस्ते तयार करीत असल्याचे अनेक भागांत दिसते. त्यामुळे शहरातील बहुतांश भागातील सिमेंटच्या रस्त्यांवर पाणी साठत असल्याची वस्तुस्थिती असल्याचे पालिकेतील अधिकाऱ्यांनी स्पष्ट केली. तसेच, रस्त्यांची कामे देताना पालिका ठेकेदारांना स्पष्ट सूचना देत नाहीत. ठेकेदाराने केलेले काम योग्य आहे, की नाही, हे तपासण्याची जबाबदारी ही पालिकेतील संबंधित अधिकाऱ्यांवर असते. मात्र, याची तपासणी योग्य पद्धतीने होत नाही, केवळ कागदावरच ही कामे होत असल्याने चुकीच्या पद्धतीने रस्ते तयार होतात. चुकीच्या पद्धतीने तयार होणाऱ्या या रस्त्यांमुळे पावसाचे पाणी साठत असल्याचा आरोप भूजल अभ्यासक कर्नल (निवृत्त) शशिकांत दळवी यांनी केला. रस्त्यांची कामे करताना ठेकेदारांबरोबरच प्रत्यक्ष रस्त्याच्या कामाची तपासणी करण्याची जबाबदारी असलेले पालिकेतील अधिकारी गांभीर्याने पाहत नसल्याने कोट्यवधी रुपयांचा निधी रस्त्यांवर खर्च करूनही रस्त्यावर पावसाचे पाणी साठत राहणार, अशी भीती दळवी यांनी व्यक्त केली.
हट्ट सिमेंट काँक्रिट रस्त्यासाठीच...
आपल्या प्रभागातील प्रत्येक रस्ता हा सिमेंट काँक्रिटचाच असावा, असा हट्ट लोकप्रतिनिधींचा असतो, त्यामुळे प्रशासनाला इच्छा नसतानाही सिमेंट काँक्रिटच्या कामाचे टेंडर काढावे लागते, असे काही अधिकाऱ्यांनी नाव न सांगण्याच्या अटीवर सांगितले.
तरुण वाहून गेला
दौंड : दौंड शहरातील कुरकुंभ मोरीत आलेल्या पावसाच्या पाण्याच्या लोंढ्यात वाहून गेल्याने एका तरुणाचा मृत्यू झाला. सायंकाळी झालेल्या जोरदार पावसाने संपूर्ण शहर जलमय झाले. महादेव मारुती शितोळे (वय ४०, रा. अजनूज, ता. श्रीगोंदा) असे या तरुणाचे नाव असून कुरकुंभ मोरीच्या रेंगाळलेल्या प्रश्नामुळे त्याचा हकनाक बळी गेला. त्याचा मृतदेह नेनेचाळ येथे गाळात सापडला. शितोळे हे पुण्याहून दौंडला आले होते. कुरकुंभ मोरी येथे खोल गटारीचा अंदाज न आल्याने ते पाण्यात पडून वाहून गेले. रिक्षाचालकांनी त्यांना वाचविण्यासाठी धाव घेतली. पण, पुढे बंदिस्त गटार असल्याने त्यांना वाचविणे शक्य झाले नाही.
शहरात जोरदार पावसाची शक्यता
पुणे : मान्सूनचे शहरात दोन दिवसांपूर्वी जोरदार आगमन झाले. मंगळवारी पावसाने विश्रांती घेतली. आकाश दिवसभर ढगाळ असूनही सरी कोसळल्या नाहीत. पुढील दोन दिवसांत शहरात जोरदार पाऊस पडेल, असा अंदाज हवामान विभागाने वर्तविला आहे. उन्हाच्या झळांना वैतागलेल्या पुणेकरांनी सोमवारी मान्सूनचे जल्लोषात स्वागत केले. दुसऱ्या दिवशीही पाऊस येईल, अशी अपेक्षा ठेवून नागरिक पावसाळी कपड्यांचे साहित्य घेऊन कार्यालयीन कामाला बाहेर पडले. शहरातील बहुतांश भागात मंगळवारी सकाळपासून आकाश ढगाळ होते. काही भागांत पावसाच्या तुरळक सरी कोसळल्या. दुपारनंतर काही वेळासाठी ऊन पडले आणि संध्याकाळी पुन्हा ढग दाटून आले. पण, दिवसभरात पावसाने हुलकावणी दिली. पुढील दोन दिवस आकाश ढगाळ राहणार असून बुधवारी जोरदार पाऊस पडण्याची शक्यता आहे. दरम्यान, राज्यातही मंगळवारी उल्लेखनीय पाऊस पडला नाही. दोन दिवसांत कोकण, मराठवाड्यात बहुतांश ठिकाणी, तर मध्य महाराष्ट्र आणि विदर्भात बऱ्याच ठिकाणी पाऊस पडणार असल्याचा अंदाज हवामान विभागाने वर्तविला आहे.
पाणी काढण्याचे काम सुरूच
प्रादेशिक परिवहन कार्यालयात (आरटीओ) लर्निंग लायसन्स विभागात साचलेले पाणी काढण्याचे काम दुसऱ्या दिवशीही सुरुच होते. त्यामुळे नागरिकांची गैरसोय होऊ नये म्हणून, येथील कामकाज वरील मजल्यावर सुरू ठेवण्यात आले होते. मान्सूनच्या पहिल्या पावसात आरटीओच्या लायसन्स विभागात व एकूण परिसरात पाणीच पाणी झाले होते. त्यामुळे लर्निंग विभागातील यंत्रणा ठप्प होऊन अनेक नागरिकांना रिकाम्या हातांनी परत जाण्याची वेळ आली होती. या साचलेल्या पाण्याचा निचरा न झाल्याने मंगळवारी दुपारपर्यंत ते पाणी काढण्याचे काम सुरू होते. दुपारनंतर लर्निंग लायसन्स देण्याचे काम सुरू करण्यात आले. त्यामुळे नागरिकांची गर्दी झाली होती. त्यामुळेही अनेकांची गैरसोय झाली. त्याठिकाणी पुन्हा पावसाचे पाणी साचू नये, यासाठी त्या ठिकाणी भिंत बांधण्याचे काम आरटीओने हाती घेतले आहे.
४६ डबक्यांमुळे वाहतुकीची कोंडी
पुणे : शहरात सोमवारी झालेल्या पावसाने विविध ठिकाणी पाणी साचून राहिले. त्यामुळे वाहतुकीला मोठ्या प्रमाणावर अडथळा होऊन, अनेक ठिकाणी वाहनांच्या रांगा लागल्या होत्या. या पार्श्वभूमीवर शहर वाहतूक पोलिसांनी पाणी साचलेल्या ठिकाणांचा (वॉटर लॉगिंग) आढावा घेतला. त्या वेळी शहरात आणि पिंपरी-चिंचवडच्या काही भागांत ४६ ठिकाणी पाणी साचून वाहतुकीला अडथळा झाल्याचे दिसून आले.
शहरातील रस्त्यांवर, चौकांमध्ये, सखल भागात आणि नालेसफाई न झाल्याने पावसाचे पाणी साचून राहत असल्याचे आजवर दिसून आले आहे. त्यात गेल्या काही वर्षांत सिमेंटच्या रस्त्यांमुळे पाण्याचा निचरा होत नसल्यानेही पाणी साचत आहे. या साचलेल्या पाण्याचा सर्वाधिक फटका वाहतुकीला बसत आहे. वाहने बंद पडणे, वाहतुकीचा वेग मंदावणे आदी गोष्टी त्यामुळे घडतात आणि वाहनांच्या रांगा लागतात. हा दर वर्षीचाच अनुभव आहे. त्यामुळे यंदा हे चित्र टाळण्यासाठी वाहतूक पोलिसांनी पहिल्याच पावसात ‘वॉटर लॉगिंग’चा आढावा घेतला. त्यामध्ये निदर्शनास आलेल्या ४६ ठिकाणांची माहिती महापालिका प्रशासनाला पाठविण्यात येणार आहे, अशी माहिती वाहतूक पोलिस उपायुक्त अशोक मोराळे यांनी दिली.
महापालिका प्रशासनाकडून अशा डबक्यांचा तातडीने निपटारा करणे अपेक्षित आहे. तसेच, पाणी साचणार नाही, यासाठी काही उपाययोजना कराव्यात, यासाठी त्यांना कळविण्यात येणार असल्यातेही त्यांनी सांगितले.
मोटार लावून पाणी काढले
जुना बाजार येथील शाहीर अमर शेख चौकात रेल्वे पुलाखाली (आरटीओकडे जाताना) प्रत्येक पावसांत मोठ्या प्रमाणावर पाणी साचते. एक फुटापेक्षा जास्त पाणी साचत असल्याने येथून जाताना दुचाकीस्वारांचा गोंधळ उडतो, तर अन्य वाहनांच्या ‘सायलेंसर’मध्ये पाणी जाऊन गाडी बंद पडण्याचे प्रकार घडतात. या पार्श्वभूमीवर सोमवारी या ठिकाणी साचलेले पाणी मोटार लावून काढण्यात आले.
मंगळवारीही कोंडी
शहरातील मध्यवस्तीतदेखील मंगळवारी सायंकाळी तीव्र वाहतूक कोंडी झाली होती. टिळक रस्ता, शिवाजी रस्ता, बाजीराव रस्ता, पेठांमधील अंतर्गत रस्ते, शनिवारवाडा परिसर, भिडे पूल, बेलबाग चौक आदी ठिकाणी वाहनांच्या रांगा लागल्या होत्या. त्यामुळे ऑफिस सुटल्यानंतर घरी परतणाऱ्या व खरेदीसाठी घराबाहेर पडलेल्या नागरिकांना कोंडीचा फटका बसला. यामध्ये पावसाच्या भितीने रस्त्यावरील चारचाकी वाहनांची संख्या वाढल्याचे निदर्शनास आले. उपायुक्त अशोर मोराळे यांनी बेलबाग चौकात प्रत्यक्ष हजेरी लावत वाहतूक कोंडी सोडविण्याचा प्रयत्न केला.
दरड कोसळून वाहनांचे नुकसान
येरवडा : येरवड्यातील रामनगर भागात सोमवारी झालेल्या जोरदार पावसामुळे दरड कोसळून रस्त्याच्या कडेला लावलेल्या रिक्षांचे नुकसान झाले. यामध्ये जीवितहानी झाली नसली, तरी या परिसरात पावसाळ्यात नागरिकांना जीव मुठीत धरूनच रस्त्यावरून ये-जा करावी लागणार आहे. रामनगर भागात राहणाऱ्या नागरिकांना दर वर्षी दरड कोसळण्याची भीती असते. काही वर्षांपूर्वी येथील गेनबा मोझे शाळेसमोर डोंगराचा कडा कोसळून पाच जणांचा बळी गेला होता. त्यानंतर महापालिकेने गेल्या वर्षी काँक्रिटची भिंत उभारली आहे. दरड कोसळल्याची माहिती मिळताच महापालिकेच्या कर्मचाऱ्यांनी घटनास्थळी धाव घेतली. याबाबत येरवडा क्षेत्रीय कार्यालयाचे सहायक आयुक्त विजय लांडगे म्हणाले, ‘दरड कोसळण्याची शक्यता असलेल्या भागाजवळील पंधरा वीस कुटुंबीयांना घरे खाली करण्याची नोटीस बजावली आहे. पावसाळ्यात दुर्घटना टाळण्यासाठी नगर अभियंता विभागाला सर्वेक्षण करून आवश्यक उपाययोजना करण्याची विनंती केली आहे.’
मोबाइल अॅप डाउनलोड करा आणि राहा अपडेट
