म. टा. प्रतिनिधी, पुणे
पुणे महानगर प्रदेश विकास प्राधिकरणाच्या (पीएमआरडीए) हद्दीतील अनधिकृत बांधकामांवरील कारवाईला आता वेग येण्याची चिन्हे असून, गेल्या काही दिवसांमध्ये कार्यक्षेत्रातील विविध ठिकाणी जोरदार कारवाई करण्यात आली आहे. पीएमआरडीएच्या हद्दीतील सोळाशेहून अधिक अनधिकृत बांधकामे हटविण्याची मोहीम यापुढील काळात आणखी तीव्र केली जाणार असल्याचे संकेत वरिष्ठ अधिकाऱ्यांनी दिले असून, त्याअंतर्गतच शुक्रवारी मुळशीतील भूगाव, भुकूम आणि कासार अंबोलीतील अनधिकृत बांधकामांवर हातोडा टाकण्यात आला.
महाराष्ट्र प्रादेशिक नियोजन आणि नगररचना कायद्यात (एमआरटीपी) झालेल्या दुरुस्तीमुळे अनधिकृत बांधकामांवर २४ तासांत कारवाई करण्याचे बळ पीएमआरडीएला मिळाले आहे. त्यामुळे यापुढे पीएमआरडीएच्या हद्दीतील सुमारे सोळाशेहून अधिक अनधिकृत बांधकामांवरील कारवाई अधिक सुलभ होण्याची शक्यता आहे. या कारवाईसाठी पीएमआरडीएने स्वतंत्र एजन्सीची नेमणूक केली असून, वरिष्ठ अधिकाऱ्यांच्या मार्गदर्शनाखाली कारवाईचा वेग वाढविण्यात आला आहे. गेल्या आठवड्यात लोहगावमध्ये सात अनधिकृत रो-हाऊस पाडण्यात आली. शुक्रवारी पीएमआरडीएची परवानगी न घेता सुरू असलेली भूगाव, भुकूम आणि कासार अंबोली येथील अनधिकृत बांधकामे जमीनदोस्त करण्यात आली.
पीएमआरडीएचे आयुक्त किरण गित्ते आणि विशेष कार्य अधिकारी अण्णासाहेब चव्हाण व तहसीलदार अर्चना यादव यांच्या नेतृत्वाखाली ही कारवाई केली गेली. पाच गुंठ्यांपर्यंतच्या जमिनीवर बहुमजली अनधिकृत इमारती बांधून त्या अधिकृत असल्याचे भासवून ग्राहकांची फसवणूक करणाऱ्यांवरील कारवाई अधिक तीव्र केली जाणार असल्याचे वरिष्ठ अधिकाऱ्यांनी
स्पष्ट केले.
मोबाइल अॅप डाउनलोड करा आणि राहा अपडेट