साहित्य संस्थांना राज्य सरकारतर्फे देण्यात येणारा निधी तीन लाख रुपयांनी वाढवून तो आठ लाखांपर्यंत करण्यात यावा, या प्रस्तावावर सरकारने दीड वर्षांनंतरही निर्णय घेतलेला नाही. तुटपुंज्या निधीमध्ये मराठी भाषा, साहित्य, संस्कृती यांच्या संवर्धनाचे काम कसे करायचे, असा प्रश्न संस्थांपुढे उभा राहिला आहे. निधी वाढवून देण्यात चालढकल होत असल्याने मराठी भाषेच्या संवर्धनासाठी सरकार किती गंभीर आहे, असा सवाल संस्थांनी केला आहे.
राज्य सरकारतर्फे महाराष्ट्र राज्य साहित्य आणि संस्कृती मंडळाच्या माध्यमातून अखिल भारतीय मराठी साहित्य महामंडळ, विदर्भ मराठी साहित्य संघ, नागपूर, मराठवाडा साहित्य परिषद, औरंगाबाद, मुंबई मराठी साहित्य संघ, मुंबई, कोकण मराठी साहित्य परिषद, रत्नागिरी, दक्षिण महाराष्ट्र साहित्य सभा, कोल्हापूर आणि महाराष्ट्र साहित्य परिषद, पुणे या संस्थांना मराठी भाषा, साहित्य, संस्कृती यांच्या संवर्धनासाठी दर वर्षी पाच लाख रुपयांचा निधी दिला जातो. आजच्या काळात पाच लाख रुपये हा निधी कमी असून, तो वाढवून मिळावा, अशी मागणी साहित्य संस्था अनेक वर्षे करत होत्या. त्याची दखल मंडळाने घेतली होती.
साहित्यविषयक काम करणाऱ्या या संस्थांना प्रत्येकी तीन लाख वाढीव मिळावेत, असा प्रस्ताव मंडळाने नोव्हेंबर २०१५मध्ये सरकारला दिला होता. मात्र, त्यावर अद्याप निर्णय न झाल्याने सरकारच्या भूमिकेवरच प्रश्नचिन्ह उभे करण्यात येत आहे. ‘मंडळाने प्रस्ताव पाठवूनही तीन लाख रुपये वाढवून मिळालेले नाहीत. तुटपंज्या निधीमध्ये काम करणे अवघड होत आहे. संवर्धनाचे काम ही फक्त साहित्य संस्थांची जबाबदारी नाही. सरकार निधी देत नसल्याने ते किती गंभीर आहेत, हे स्पष्ट होते,’ अशी प्रतिक्रिया साहित्य महामंडळाचे अध्यक्ष डॉ. श्रीपाद भालचंद्र जोशी यांनी दिली.
‘वाढीव निधीसाठी अनेक वेळा पाठपुरावा केला आहे; पण प्रस्ताव विचाराधीन आहे, मंजूर करू अशी उत्तरे दिली जातात. सरकारची उदासिनताच यातून समोर येते,’ अशी टीका साहित्य परिषदेचे कार्याध्यक्ष प्रा. मिलिंद जोशी यांनी ‘मटा’शी बोलताना केली.
साहित्य संस्थांना तीन लाख वाढीव अनुदान देण्याबाबतचा प्रस्ताव नोव्हेंबर २०१५मध्ये आम्ही सरकारला दिला आहे. यावर अद्याप निर्णय झालेला नाही. आम्ही पाठपुरावा करत असून, सचिवांशी याबाबतीत नुकताच पत्रव्यवहार झाला आहे. प्रस्तावाला लवकरच मंजुरी मिळेल, असे आश्वासन देण्यात आले आहे.
- बाबा भांड,
अध्यक्ष, साहित्य संस्कृती मंडळ
मोबाइल अॅप डाउनलोड करा आणि राहा अपडेट
