टीम मटा, पुणे
संपूर्ण कर्जमाफीसह हमीभाव आणि स्वामिनाथन समितीच्या शिफारशींच्या अंमलबजावणीच्या मागणीसाठी महाराष्ट्रात सुरू असलेल्या शेतकरी संपातील आंदोलनाचा पुढचा भाग म्हणून सोमवारी विविध शेतकरी संघटनांतर्फे पुकारण्यात आलेल्या ‘महाराष्ट्र बंद’ला राज्याच्या ग्रामीण भागात, विशेषतः उत्तर महाराष्ट्रात जोरदार प्रतिसाद मिळाला. या संपाच्या निमित्ताने बळीराजा आक्रमक झाल्याचे दिसून येत असून, ठिकठिकाणी मुख्यमंत्री देवेंद्र फडणवीस व कृषी राज्यमंत्री सदाभाऊ खोत यांच्या प्रतिमांचे दहन करण्यात आले. अनेक ठिकाणी शेतकऱ्यांवर लाठीमार करण्यात आला, तर काही ठिकाणी रास्ता रोकोमुळे वाहतूक विस्कळित झाली. शेतकरी आंदोलनाची पुढील रणनीती ठरविण्यासाठी शेतकरी संघटनांच्या वतीने नियुक्त करण्यात आलेल्या सुकाणू समितीची येत्या गुरुवारी (८ जून) बैठक होणार असून, त्यात आंदोलनाची पुढील दिशा निश्चित करण्यात येईल.
शेतकरी आंदोलनाचे केंद्र आता नगर जिल्ह्यातील पुणतांबे येथून नाशिक जिल्ह्यात सरकले असून, नाशिक जिल्ह्यातील शेतकरी सर्वाधिक आक्रमक झाले आहेत. संतप्त जमावाने एसटी बसना लक्ष्य केले. त्र्यंबकेश्वर तालुक्यातील अंजनेरी आणि अंबोली फाटा येथे दोन बसवर दगडफेक करण्यात आली. त्यामध्ये एक जण जखमी झाला. जिल्ह्यात ठिकठिकाणी रास्ता रोको करण्यात आल्याने वाहतुकीवर विपरीत परिणाम झाला. आंदोलकांनी महामार्गांऐवजी आता ग्रामीण भागाला जोडणारे रस्ते लक्ष्य केल्याचे पाहावयास मिळते आहे.
शेतकरी संपाचा जिल्ह्यातील विविध बाजारपेठांवर विपरीत परिणाम झाला असून, तेथील व्यवहार अजूनही पूर्वपदावर येऊ शकलेले नाहीत. संपामुळे कळवण, घोटी, सटाणा, येवला, चांदवड, सुरगाणा तालुक्यातील हतगड येथील बाजारपेठा बंद आहेत. त्यामुळे येथील आर्थिक व्यवहार ठप्प झाले आहेत.
खान्देशात संमिश्र प्रतिसाद
जळगाव : शेतकऱ्यांच्या संपूर्ण कर्जमुक्तीसह अन्य मागण्यांसाठी राज्यात पुकारण्यात आलेल्या बंदला सोमवारी जिल्ह्यात संमिश्र प्रतिसाद मिळाला. जळगाव शहरातील सर्व मार्केट सकाळपासून सुरळीत सुरू होते. बाजार समितीत मालाची आवक मात्र ५० टक्क्यांनी कमी झाली होती. चाळीसगाव, पारोळा, चोपडा, मुक्ताईनगर या तालुक्यात बंदला प्रतिसाद मिळाला. अनेक ठिकाणी रास्ता रोको, प्रतीकात्मक अंत्ययात्रेसह मोर्चे काढून शेतकऱ्यांनी सरकारचा निषेध केला. सोमवारी सायंकाळी जळगाव जिल्ह्यातील शेतकरी संप स्थगित करण्यात येत असल्याची माहिती किसान समितीचे समन्वयक एस. बी. पाटील यांनी ‘मटा’ला दिली.
मराठवाड्यात संमिश्र प्रतिसाद
मराठवाड्यात भाजप वगळता सर्वपक्षाकडून शेतकऱ्यांनी पुकारलेल्या संपाला पाठिंबा म्हणून सोमवारी पाळण्यात आलेल्या बंदला संमिश्र प्रतिसाद मिळाला. उस्मानाबाद जिल्ह्यातील कळंबमध्ये आंदोलनकत्यांनी तीन बस फोडल्या. नांदेडमध्ये शेतकऱ्यांनी रास्ता रोको आंदोलन केल्याने वाहतूक काही काळ ठप्प झाली होती. काही ठिकाणी काही वेळ वाहतूक ठप्प झाली होती. लातूरमध्ये विविध संघटनेच्या कार्यकर्त्यांनी दोन तास बस वाहतूक बंद पाडली. औरंगाबाद शहरात ‘बंद’ला संमिश्र प्रतिसाद मिळाला.
दक्षिण महाराष्ट्रात ‘बंद’
कोल्हापूरसह सांगली, सातारा जिल्ह्यांत शेतकरी संघटनांच्या बंदला मोठा प्रतिसाद मिळाला. स्वाभिमानी शेतकरी संघटनेच्या कार्यकर्त्यांनी ठिकठिकाणी बाजार बंद पाडले.
‘चर्चा खऱ्या शेतकऱ्यांशी’
‘मी खऱ्या शेतकऱ्यांशी चर्चा करण्यास तयार आहे, मात्र शेतकऱ्यांच्या नावावर आंदोलन करणाऱ्यांशी चर्चा करणार नाही’, अशी ठाम भूमिका मुख्यमंत्री देवेंद्र फडणवीस यांनी सोमवारी घेतली. ‘दुष्काळी भागातील शेतकऱ्यांनाही कर्जमुक्त करण्याचा राज्य सरकारचा प्रयत्न आहे’, असेही ते एका कार्यक्रमात म्हणाले.
खोत यांच्यावर कडूंची टीका
राज्यात प्रथमच शेतकऱ्यांनी महाराष्ट्र बंदची हाक दिली हे आंदोलनाचे मोठे यश असून, सरकारतर्फे कृषी व पणन राज्यमंत्री सदाभाऊ खोत यांचा वापर शेतातील बुजगावण्यासारखा केला जात आहे, अशा शब्दात प्रहार संघटनेचे अध्यक्ष आमदार बच्चू कडू यांनी टीका केली आहे.
पुढील रणनीती आठ जूनला
शेतकरी आंदोलनाची पुढील रणनीती आखण्यासाठी ८ जूनला सुकाणू समितीची बैठक होणार आहे. या समितीत स्वाभिमानी शेतकरी संघटनेचे नेते खासदार राजू शेट्टी, आमदार बच्चू कडू, माकपच्या किसान सभेचे अजित नवले, शेतकरी संघटनेचे नेते रघुनाथदादा पाटील, संतोष वाडेकर, संजय पाटील, विजय जावंधिया, राजू देसले, गणेश काका जगताप, चंद्रकांत बनकर, एकनाथ बनकर, शिवाजी नाना नानखिले, डॉ. बुधाजीराव मुळीक, डॉ. गिरधर पाटील, गणेश कदम, करण गायकर, हंसराज वडघुले, अनिल धनवट अशा २१ जणांचा समावेश आहे.
मोबाइल अॅप डाउनलोड करा आणि राहा अपडेट
