या परीक्षेच्या निकालात ‘पीसीएम’ (भौतिकशास्त्र, रसायनशास्त्र, गणित) गटात मुंबईचा स्मित रामभिया आणि सोलापूरचा विजय मुंद्रा यांनी २०० पैकी १९७ गुण मिळवून राज्यात पहिला क्रमांक पटकाविला आहे. तर, ‘पीसीबी’ (भौतिकशास्त्र, रसायनशास्त्र, जीवशास्त्र) गटात सातारा येथील अमेय माचवे याने २०० पैकी १९० गुण मिळवून पहिला क्रमांक पटकाविला आहे. या निकालामुळे यंदाच्या सीईटीमध्ये मुंबई, सोलापूर, सातारा व लहान शहरांतील मुलांचे वर्चस्व असल्याचे दिसून येते. राज्यातील प्रत्येक जिल्ह्यात गेल्या महिन्यात ११ मे रोजी परीक्षा पार पडली होती. परीक्षेसाठी नोंदणी केलेल्या एकूण ३ लाख ८९ हजार ५२० पैकी ३ लाख ७६ हजार २८२ (९६.६० टक्के) विद्यार्थ्यांनी परीक्षा दिली होती. यापैकी एक लाख ४४ हजार ८१३ विद्यार्थ्यांनी पीसीएम गटात; तर ९५ हजार ५५४ विद्यार्थ्यांनी पीसीबी गटात परीक्षा दिली. तर, एक लाख ४९ हजार १६२ विद्यार्थ्यांनी ‘पीसीएमबी’ गटात परीक्षा दिली. सीईटीसाठी पुणे विभागातून सर्वाधिक म्हणजेच ९२ हजार ९११ विद्यार्थ्यांनी नोंदणी केली होती. यापैकी सुमारे पुणे शहर व जिल्ह्यातून ४४ हजार विद्यार्थ्यांनी ही परीक्षा दिली. असे असताना देखील शहर आणि जिल्ह्यातून एकाही विद्यार्थ्याला गुणवत्ता यादीत स्थान मिळविता आले नाही. त्यामुळे शैक्षणिकदृष्ट्या विविध विद्याशाखांमध्ये अग्रेसर असणारे पुणे सीईटीच्या निकालात मागे राहिले आहे.
‘कट ऑफ येणार खाली’
सीईटीचा एकूण निकालच कमी लागला आहे. पीसीएम गटात सुमारे दोन हजार ८८९ विद्यार्थ्यांना तर पीसीबी गटात केवळ ५७३ जणांना दीडशेपेक्षा अधिक गुण मिळविता आले आहे. तसेच, पीसीएम गटात २३ हजार ७८ विद्यार्थ्यांना तर पीसीबी गटात १२ हजार ७१२ विद्यार्थ्यांना शंभरपेक्षा अधिक गुण मिळाले आहे. सीईटीची परीक्षा एकूण ३ लाख ७६ हजार २८२ विद्यार्थ्यांनी दिली. असे असताना तब्बल तीन लाख ३७ हजार ३० विद्यार्थ्यांना परीक्षेत १०० गुणदेखील मिळविता आलेले नाही. त्यामुळे यंदा इंजिनीअरिंग कॉलेजमध्ये प्रवेशासाठीचा ‘कटऑफ’ प्रचंड खाली जाणार असल्याची शक्यता वर्तविण्यात आली आहे. त्यामुळे राज्यातील सरकारी आणि खासगी इंजिनीअरिंग कॉलेजमध्ये प्रवेशासाठी कमी गुण लागणार आहेत.
तंत्र शिक्षण संचालनालयाच्या (डीटीई)
http://www.dtemaharashtra.gov.in/mhtcet2017 या वेबसाइटवर विद्यार्थ्यांना अॅप्लिकेशन क्रमांक आणि जन्म दिनांक टाकून निकाल पाहता येणार आहे. या प्रवेश परीक्षेच्या निकालाद्वारे राज्यातील ३७६ इंजिनीअरिंग कॉलेजांमधील सुमारे एक लाख ५१ हजार जागांवर प्रवेश मिळणार आहे. तसेच, औषधनिर्माणशास्त्र अभ्यासक्रमाच्या १९१ कॉलेजांमधील १४ हजार २१० जागांवर प्रवेश मिळणार आहे.
मोबाइल अॅप डाउनलोड करा आणि राहा अपडेट
