पुणे आणि पिंपरी-चिंचवड शहरात चार चाकी वाहन चालविण्याचे लायसन्स काढण्यासाठी भोसरी येथील ‘इन्स्टिट्यूट ऑफ ड्रायव्हिंग ट्रेनिंग अँड रीसर्च (आयडीटीआर) येथे अत्याधुनिक ट्रॅकवर चाचणी घेतली जाते. ‘आरटीओ’ने या चाचणीसाठी अपॉइंटमेंट पद्धत सुरू केली आहे. तसेच, कोटा पद्धतीचाही अवलंब करण्यात आला आहे. त्यामुळे एका मोटार वाहन निरीक्षकाला एका दिवसात कमाल ६० लायसन्स देता येतात. यांमुळे ‘आयडीटीआर’ येथे एका दिवसात केवळ १७६ उमेदवारांना लायसन्ससाठी चाचणी देता येते. त्यामुळे लायसन्सच्या अपॉइंटमेंटसाठी मोठ्या प्रमाणावर प्रतीक्षा करावी लागते. लर्निंग लायसन्स काढल्यानंतर एका महिन्याने पक्क्या लायसन्ससाठी अर्ज करता येतो. मात्र, अनेकजण एका महिन्यापेक्षा अधिक कालावधीनंतर अपॉइंटमेंट घेण्याचा प्रयत्न करतात. अनेकदा प्रतीक्षा यादी सहा महिन्यांपर्यंत असते. त्या वेळी त्यांना मिळणाऱ्या अपॉइंटमेंटच्या तारखांच्या आधीच लर्निंग लायसन्सची वैधता संपणार असते. त्यामुळे अनेकांवर पुन्हा लर्निंग लायसन्स काढण्याची वेळ येते. अशा उमेदवारांच्या सोयीसाठी आरटीओने राखीव कोटा ठेवला असून, त्याची अंमलबजावणीदेखील तातडीने होणार आहे.
अपॉइंटमेंट कोट्यात वाढ
‘आयडीटीआर’ येथे लायसन्ससाठी एका दिवसाला १७६चा कोटा आहे. त्यामध्ये ३०ने वाढ करण्यात आली आहे. हा वाढीव ३० जागांचा कोटा लर्निंग लायसन्सची वैधता संपणाऱ्यांसाठी राखीव ठेवला जाणार आहे. यामुळे प्रतीक्षायादी कमी होणार असून उमेदवारांना होणारा मनस्तापही कमी होईल. ‘परिवहन’ वेबसाइटवरून पक्क्या लायसन्ससाठी अपॉइंटमेंट घेताना, लर्निंग लायसन्सचा क्रमांक नमूद करावा लागतो. या क्रमांकावरून परवान्याच्या वैधतेची पडताळणी होऊन उमेदवाराला अपॉइंटमेट मिळणार आहे.
लायसन्स देण्याचा कोटा वाढविल्याने अपॉइंटमेंट देताना असलेली प्रतीक्षा यादी कमी होण्यास मदत होणार आहे. राखीव कोट्यामुळे लर्निंग लायसन्सचे नूतनीकरण करण्याची वेळ येणार नाही.
संजय राऊत, उपप्रादेशिक परिवहन अधिकारी, पुणे
मोबाइल अॅप डाउनलोड करा आणि राहा अपडेट