@ShrikrishnakMT
‘फर्स्ट इन्फर्मेशन रिपोर्ट’ (एफआयआर) नोंदणी केल्यानंतर त्याची प्रत चोवीस तासाच्या आत वेबसाइटवर टाकावे, असे आदेश कोर्टाकडून आहेत. मात्र, पुण्यातील अनेक पोलिस ठाण्यांकडून याची अंमलबजावणी होत नसल्याचे आढळून आले आहे. विशेष म्हणजे आयटी परिसरातील पोलिस ठाणे म्हणून ओळखल्या जाणाऱ्या हिंजवडी व इतर पोलिस ठाण्याकडून तर अनेक दिवसांपासून वेबसाइटवर एसआयआर टाकण्यात आलेली नसल्याचे दिसून आले आहे. त्यामुळे तंत्रज्ञानात आघाडी घेतल्याचा दावा करणाऱ्या पुणे पोलिसांचे वास्तव समोर आले आहे.
नागरिकांना ‘एफआयआर’ची प्रत मिळावी म्हणून कोर्टाने सर्व पोलिस दलाला वेबसाइटवर चोवीस तासांच्या आत ‘एफआयआर’ची प्रत टाकण्याचे आदेश दिले होते. त्यानंतर पुणे शहर पोलिसांनी गाजावाजा करत राज्यात पहिल्यांदा वेबसाइटवर एफआयआर टाकण्यास सुरुवात केल्याचा दावा केला. पुणे पोलिस तंत्रज्ञानात आघाडी घेत असल्याचे दाखवून दिले. पण, पुणे पोलिस दलातील काही पोलिस ठाण्यांकडून वेबसाइटवर एफआयआरची प्रत टाकण्यास सुरुवात केली. पण, सुरुवातीला ऑनलाईन एफआयआर टाकण्यास उशीर होत होता. नोव्हेंबरपासून वेबसाइटवर एफआयआर टाकण्यास सुरुवात करण्यात आली आहे. पण, एकदे-दुसरे पोलिस ठाणे वगळता अद्यापही चोवीस तासात एफआयरची प्रत वेबसाइटवर टाकण्यात येत नसल्याचे दिसून आले आहे. २७ मे रोजी डेक्कन, वारजे, फरासखाना या तीनच पोलिस ठाण्यांकडून एफआयआर टाकण्यात आल्या आहेत.
पुणे पोलिस दलात ३९ पोलिस ठाणी आहेत. या पोलिस ठाण्यात दिवसाला किमान एक तरी गुन्हा घडत असेल, असे आपण गृहित धरूया. पण, त्याप्रमाणे वेबसाइटवर एफआयआर टाकण्यात येत नसल्याचे दिसून आले आहे. मध्य वस्ती, उपनगरातील पोलिस ठाण्यांकडून वेबसाइटवर ‘एफआयआर’ची प्रत टाकण्यात येत असताना आयटी परिसरातील असणारी पोलिस ठाण्यांकडून याकडे दुर्लक्ष करण्यात येत आहे. हिंजवडी, येरवडा, चंदननगर, विमानतळ या पोलिस ठाण्यांनी अनेक दिवसांपासून ऑनलाइन एफआयआर टाकलेले नाहीत. पुणे पोलिस एकीकडे तंत्रज्ञानाचा मोठ्या प्रमाणात वापर करत असल्याचा दावा करत आहेत. पण, हा दावा कितपत योग्य आहे हे यावरून दिसून येत आहे. तसेच, चोवीस तासात वेबसाइटवर ‘एफआयआर’ची कॉपी न टाकून कोर्टाने दिलेल्या आदेशाकडे दुर्लक्ष केले जात असल्याचे दिसून येत आहे.
-------------
पुणे पोलिसांच्या दोन वेबसाइट
पुणे शहर पोलिस दलाच्या दोन वेबसाइट सुरू असल्यामुळे नागरिकांमध्ये गोंधळाचे वातावरण आहे. पोलिस आयुक्त रश्मी शुक्ला यांनी पोलिस आयुक्तपदाचा कार्यभार घेतल्यानंतर
www.punepolice.co.in ही नवीन वेबसाइट सुरूकेली. त्या अगोदर पुणे पोलिसांची सरकारी वेबसाइट असावी म्हणून www.punepolice.gov.in ही वेबसाइट सुरू करण्यात आली होती. गेल्या काही महिन्यांपासून या दोन्ही वेबसाइट सुरू आहेत. त्यामुळे कोणत्या वेबसाइटचा वापर करायचा असाही नागरिकांपुढे प्रश्न आहे. तसेच, तंत्रज्ञानात अद्यावत असल्याचा दावा करणाऱ्या पुणे पोलिसांकडून पोलिस ठाण्याचे वरिष्ठ निरीक्षकाची बदली झाली तरी त्यांची नावे व मोबाइल क्रमांक लवकर अद्यावत करण्यात आलेले नव्हते. त्यामुळे तंत्रज्ञानात पुणे पोलिस किती जलद आहे, हे यावरून दिसून येत आहेत. तसेच, या वेबसाइटवर फक्त वरिष्ठ पोलिस निरीक्षकाचा नाव व क्रमांक दिला आहे. वरिष्ठ निरीक्षक सुट्टीवर असतील, तर त्या ठिकाणी दुसरा निरीक्षक कोण आहे याची माहिती नागरिकांना मिळत नसल्याचे दिसून आले आहे.
--------------------
ऑनलाइन तक्रारीला थंड प्रतिसाद
नागरिकांना ऑनलाइन तक्रार देण्याची सुविधा पुणे पोलिसांकडून त्यांच्या वेबसाइटवर उपलब्ध करून देण्यात आली आहे. पण, याला नागरिकांकडून थंड प्रतिसाद मिळत आहे. बऱ्याच नागरिकांना अशी काही सोय आहे, याची कल्पना नाही. त्यामुळे ऑनलाइन तक्रारीला थंड प्रतिसाद मिळत आहे.
मोबाइल अॅप डाउनलोड करा आणि राहा अपडेट
