अभिनेता अभय देओल याने काही दिवसांपूर्वी फेअरनेस क्रीमच्या जाहिरातींवर आपले परखड मत व्यक्त केले. अशी उत्पादने फसवी असून, जे कलाकार त्या उत्पादनांच्या जाहिराती करतात, तेही सर्वसामान्यांना फसवतच असल्याचे त्याचे मत होते. याच अनुषंगाने ‘मी जशी आहे, तशी सुंदर आहे’ नावाचा उपक्रम नुकताच जंगली महाराज रस्त्यावरील संभाजी पार्क येथे झाला.
‘अभिव्यक्ती’ ग्रुपच्या वतीने आयोजित या उपक्रमात त्वचेचा काळा रंग, जाड असणे यांना विरोध करण्यात आला आणि सौंदर्याची जनमानसात रुजलेली आणि ठसलेली व्याख्या बदलण्याची गरज असल्याची जनजागृती करण्यात आली. व्यक्ती जशा आहेत, तशाच सुंदर आहेत, यावर या उपक्रमात भर देण्यात आला. ‘काळं असणं वाईट नाही’, ‘गोरं असणं वरदान नाही’, ‘मी जाड, काळी सुंदर आहे’ असे लिहिलेले फलक हाती घेऊन १३ ते १५ तरुण – तरुणी संभाजी पार्कच्या मुख्य दरवाजापाशी उभे राहून जनजागृती करत होते.
‘फसव्या जाहिरातींना भुलू नका, जाहिरातींनी आपल्यावर ठसवलेले स्त्रीचे गोरेपण अयोग्य आहे, टीव्ही, सिनेमा आणि जाहिरातींसारखी माध्यमे आणि सेलिब्रेटींच्या ठसवण्यामुळे तयार झालेली गोरेपणा म्हणजेच सौंदर्य, ही सौंदर्याची व्याख्या योग्य नाही, जाडेपणाचा तिरस्कार करणे चुकीचे आहे,’ हे मुद्देसुद्धा हे तरुण उत्सुकतेपोटी येऊन विचारणाऱ्यांपर्यंत पोहोचवत होते. सायंकाळी सात वाजल्यापासून संभाजी पार्कपाशी सौंदर्याच्या व्याख्येवर पुनर्विचार करण्याविषयी सुचवणाऱ्या या तरुणांनी विविध वयोगटातील लोकांपर्यंत त्यांचा संदेश नेमक्या पद्धतीने पोहोचवला.
मोबाइल अॅप डाउनलोड करा आणि राहा अपडेट
