म. टा. प्रतिनिधी, पुणे
पुणे महापालिकेच्या हद्दीत समावेश होण्याच्या प्रतीक्षेत असलेल्या १९ ग्रामपंचायतींपैकी दहा ग्रामपंचायतींनी यापूर्वी बहिष्कार टाकला असताना, अर्ज छाननीच्या दिवशी कोपरे गावाच्या ग्रामस्थांनीही निवडणुकीवर बहिष्कार टाकला. त्यामुळे या तालुक्यातील आंबेगाव बुद्रुक, उंड्री, पिसोळी, नांदेड आणि नऱ्हे या ग्रामपंचायतींमध्येच निवडणुका होणार आहेत. अर्ज माघारीसाठी १७ मेपर्यंत मुदत असून, त्यानंतर या गावांमध्ये तरी निवडणुका होणार की नाहीत, हे स्पष्ट होईल.
दरम्यान, सोमवारी अर्जांची छाननी झाली. त्यामध्ये जिल्ह्यातील २२ ग्रामपंचायतींच्या निवडणुकींसाठी प्राप्त झालेल्या ४७६ अर्जांपैकी छाननीमध्ये तीन अर्ज अवैध ठरले. त्यामुळे ४७३ अर्ज शिल्लक राहिले आहेत. शहराच्या हद्दीलगतच्या ३४ गावांचा समावेश पालिकेत करण्याबाबत राज्य सरकारने सकारात्मक भूमिका घेतली आहे. त्यापैकी २२ गावांमध्ये ग्रामपंचायत निवडणुकीचा कार्यक्रम निवडणूक आयोगाने जाहीर केला आहे. त्यामध्ये पुणे शहरालगतच्या १९ ग्रामपंचायतींचा समावेश आहे. त्यातील दहा गावांनी निवडणुकीवर बहिष्कार टाकला आहे. छाननीच्यावेळी कोपरे गावच्या ग्रामस्थांनी निवडणुकीवर बहिष्कार टाकल्याचे जाहीर केले. त्यामुळे आता आंबेगाव बुद्रुक, उंड्री, पिसोळी, नांदेड आणि नऱ्हे या ग्रामपंचायतींमध्ये निवडणूक होणार आहे.
‘केशवनगर ग्रामपंचायतीच्या निवडणुकीसाठी पाच अर्ज प्राप्त झाले होते. त्यापैकी दोन अर्ज अवैध ठरले आहेत. नियमानुसार आवश्यक असलेला कोरम पूर्ण न झाल्यामुळे या ग्रामपंचायतीची निवडणूक होणे शक्य नाही.’ असे हवेलीचे नायब तहसीलदार डॉ. सुनिल शिर्के यांनी सांगितले.
निवडणुकांचा कार्यक्रम जाहीर झालेल्या २२पैकी हवेली तालुक्यातील सर्वाधिक १६ ग्रामपंचायती आहेत. यामध्ये आंबेगाव बुद्रुक, आंबेगाव खुर्द, उत्तमनगर, उंड्री, कोंढवे धावडे, किरकटवाडी, कोपरे, खडकवासला, पिसोळी, लोहगाव, मांजरी बुद्रुक, शिवणे, साडेसतरानळी, धायरी, नऱ्हे आणि नांदेड यांचा समावेश आहे. याशिवाय पुणे शहरालगत असलेली केशवनगर ग्रामपंचायत; तसेच मुळशी तालुक्यातील सूस आणि म्हाळुंगे या ग्रामपंचायती आहेत. जिल्ह्यातील ३५२ ग्रामपंचायतींमध्ये पोटनिवडणुका होणार असून, त्यासाठी ३११ अर्ज प्राप्त झाले होते. त्यातील १२ अर्ज अवैध ठरले आहेत.
मोबाइल अॅप डाउनलोड करा आणि राहा अपडेट
