स्वारगेट येथील केशवराव जेधे चौकात वाहतुकीची स्थिती सुधारण्यासाठी काही वर्षांपासून कामे सुरू आहेत. गेल्या वर्षी उड्डाणपूलाचे काम पूर्ण होऊन तो वाहतुकीसाठी खुला करण्यात आला. तर, आता ग्रेड सेपरटरचे कामही होत आले आहे. येत्या काही दिवसांत जेधे चौक पूर्णपणे वाहतूक कोंडीमुक्त होणार आहे. त्यामुळे वाहनचालकांची गैरसोय टळेल. मात्र, चौकातील वाहनांची संख्या कमी झाल्यानंतर येथे अतिक्रमण व अवैध वाहतुकीची साधने फोफावणार नाहीत, याची काळजी घेण्याचे आव्हान प्रशासनासमोर राहणार आहे.
सातारा रस्त्याने येऊन शंकरशेठ रस्त्याकडे आणि सारसबागेकडे जाणाऱ्या वाहनांसाठी व्होल्गा चौकाच्या अलिकडून उड्डाणपूलावरून जावे लागते. तर, शंकरशेठ रस्त्याने येऊन सारसबागेकडे जाणाऱ्या वाहनांसाठी ग्रेड सेपरेटर लवकरच खुला होणार आहे. त्यामुळे टिळक रस्ता व शिवाजी रस्त्याने येऊन सातारा रस्ता किंवा शंकरशेठ रस्त्याला जाणारी वाहनेच प्रत्यक्ष चौकातून ये-जा करतील. तसेच, पीएमपीच्या बस, एसटी बस आणि रिक्षाची वाहतूक चौकातून चालेल. त्यामुळे चौकावरील वाहनांचा भार मोठ्या प्रमाणावर कमी होईल, असे चित्र आहे. आता सध्या सातारा रस्त्याने येणारी बहुतांश वाहने उड्डाणपुलावरून जात असल्याने चौक बहुतांशी वेळा रिकामा असतो. अशावेळी बेशिस्त वाहनांची संख्या वाढल्याचे दिसून येते. सिग्नलचे पालन न करणे, झेब्रा क्रॉसिंगच्या बरेच अंतर पुढे थांबणे असे प्रकार सर्रास घडतात. यामुळे वाहन संख्या कमी असूनही अपघाताचा धोका संभवतो. ग्रेड सेपरेटर सुरू झाल्यानंतर ही परिस्थिती आणखी धोकादायक होण्याची शक्यता नाकारता येत नाही.
‘पीएमपी’साठी स्वतंत्र लेन हवी
एक ते दोन आठवड्यापूर्वी पीएमपी प्रशासनाने पीएमपी बससाठी स्वारगेट चौकात एक स्वतंत्र लेनचा प्रयोग राबविला होता. सध्या बस स्टॉपच्या परिसरात अस्ताव्यस्त वाहतुकीमुळे कोंडी सदृश्य परिस्थिती निर्माण होते. त्यामुळे येत्या काळात पीएमपी बससाठी स्वतंत्र लेन अवश्य करावी. त्याचे पालन व्यवस्थितपणे केले जाईल, याची खबरदारी पीएमपी व्यवस्थापन व वाहतूक पोलिसांनी करावे.
रिक्षांचा अडथळा
उड्डाणपूल व ग्रेड सेपरेटरच्या कामामुळे जेधे चौकातील रिक्षा स्टँड व शेअर रिक्षा स्टँड वारंवार हलविण्यात येत होते. त्यामुळे स्वतंत्र रिक्षा स्टँड आणि शेअर रिक्षासाठी अन्य वाहतुकीला व पादचाऱ्यांना अडथळा निर्माण होणार नाही, अशी स्वतंत्र लेन सुरू करण्याचा विचार केला पाहिजे. आता सध्या बहुतांश रिक्षा नेहरू स्टेडिअम पोलिस चौकीच्या समोरून जाणाऱ्या लेनमध्ये थांबलेल्या असतात. तेथे पीएमपीचाही बस स्टॉप आहे. त्यामुळे वाहतुकीला अडथळा होतो.
मोबाइल अॅप डाउनलोड करा आणि राहा अपडेट
