Maharashtra Times

अर्थतज्ज्ञ दीपक घैसास यांचे निरीक्षण

म. टा. प्रतिनिधी, पुणे

‘पैसा साठवला की तो कुजतो. गुंतवला तर तो वाढतो. दुर्दैवाने मराठी माणसाला पैसा साठवायला आवडत असल्याने मराठी माणूस धनवान होऊ शकत नाही. भारतात सोन्यामध्ये पैसा गुंतवला जातो. मात्र, त्याचा कुणालाही उपयोग होत नाही, हे वास्तव आपण मान्य करत नाही,’ अशा शब्दांत ज्येष्ठ अर्थतज्ज्ञ दीपक घैसास यांनी मराठी माणसाच्या प्रवृत्तीवर बोट ठेवले. भारतात सरस्वती आणि लक्ष्मी एकत्र नांदू शकतात, याचे उत्तम उदाहरण म्हणजे आयटी क्षेत्र आहे, असेही ते म्हणाले.
मनोविकास प्रकाशनच्या वतीने अतुल कहाते लिखित ‘पैसा’ या पुस्तकाच्या दुसऱ्या आवृत्तीचे प्रकाशन घैसास आणि लेखक अच्युत गोडबोले यांच्या हस्ते करण्यात आले. त्या वेळी ते बोलत होते. ‘मनोविकास’चे अरविंद पाटकर आणि लेखक कहाते उपस्थित होते.

भारत देश गरीब असता, तर परदेशी राज्यकर्त्यांनी इतकी वर्षे आपल्यावर राज्य केले नसते. आपल्याकडे संपत्ती विपुल प्रमाणात असल्यानेच अनेक आक्रमणे झाली. त्यामुळे भारत हा गरीब देश नाही तर इथले लोक गरीब आहेत, असे टीकास्त्र घैसास यांनी सोडले.

‘अंथरुण पाहून पाय पसरावे’, ‘पैसा हे अंतिम सुख नाही’ यासारख्या अनेक पारंपरिक शिकवण्यांमुळे पैसा किती प्रमाणात मिळवावा, याबाबतीत गैरसमजुती लोकांमध्ये आहेत. आपल्या संतांनी काही शिकवण दिली आहे, ती समाजासाठी योग्यच असली, तरी आर्थिक प्रगतीचा आणि विकासाचा विचार करून ती शिकवण कधी उपयोगात आणायची हे समजायला हवे. श्रीमंत आणि धनवान या दोन कल्पनांची नेहमी गल्लत केली जाते. ‘श्रीमंत’ म्हणजे सर्व बाबतीत संपन्न; तर ‘धनवान’ म्हणजे केवळ पैशाने धनवान असतो, हे समजून घेतले पाहिजे,’ याकडे घैसास यांनी लक्ष वेधले.

गोडबोले म्हणाले, ‘सध्याची अर्थव्यवस्था भविष्यातील पैसा ही संकल्पना नष्ट करेल, अशी चिन्हे दिसू लागली आहेत. ई-पेमेंट, बीट कॉइन्स याचे वाढते महत्त्व यातून पैसा हा अदृश्य होणार आहे. त्यामुळे भविष्यात आपण पैशाला हातही लावू शकणार नाही.’

Latest Images