पुरंदर येथील नियोजित आंतरराष्ट्रीय विमानतळाच्या संदर्भात आज, शनिवारी मुख्यमंत्री देवेंद्र फडणवीस यांच्या अध्यक्षतेखाली महत्त्वाची बैठक होणार आहे. बैठकीत शेतकऱ्यांना दिल्या जाणाऱ्या पॅकेजबाबत निर्णय होण्याची अपेक्षा आहे. मुख्यमंत्र्यांकडून पॅकेजबाबत घोषणा झाली, तर विमानतळाच्या जागेच्या भूसंपादनाची कार्यवाही वेगाने पुढे सरकण्याची शक्यता आहे.
गेल्या वर्षी ऑक्टोबरमध्ये मुख्यमंत्री फडणवीस यांनी पुण्याचा नवा आंतरराष्ट्रीय विमानतळ पुरंदरमध्ये होणार असल्याची घोषणा केली होती. विमानतळासाठी जमिनी देण्यास शेतकऱ्यांनी विरोध केला असून, जिल्हाधिकारी कार्यालयावर आंदोलन करण्यात आले होते. जमिनी ताब्यात घेताना, शेतकऱ्यांना देण्यात येणाऱ्या पॅकेजबाबत वेगवेगळ्या स्वरूपात अभ्यास केला जात होता. त्यातून अंतिम निर्णय काय होणार, याबाबत सर्वांनाच उत्सुकता आहे.
महाराष्ट्र विमानतळ विकास प्राधिकरणाच्या (एमएडीसी) शनिवारी होणाऱ्या बैठकीत पुणे विमानतळाविषयी चर्चा होणार आहे. पुण्याचे जिल्हाधिकारी सौरभ राव देखील या बैठकीला उपस्थित राहणार आहेत. गेल्या आठवड्यामध्ये फडणवीस यांनी दिल्लीमध्ये नागरी विमान वाहतूक मंत्री अशोक गजपती राजू यांची भेट घेतली. या बैठकीतही पुण्याच्या विमानतळाला चालना देण्याच्या दृष्टीने चर्चा झाली असून, आजच्या बैठकीत पॅकेजबद्दलचा अंतिम निर्णय जाहीर केला जाण्याची दाट चिन्हे आहेत.
विमानतळाचा सविस्तर आराखडा (डीपीआर) तयार करण्याचे काम यापूर्वीच जर्मनच्या ‘डॉर्श’ कंपनीला देण्यात आले असून, सहा महिन्यांत त्याचा अहवाल सरकारला प्राप्त होईल. या कालावधीत विमानतळासाठी आवश्यक जागेच्या भूसंपादनाची प्रक्रिया सुरू करण्यासाठी शेतकऱ्यांच्या पॅकेजचा निर्णय सरकारला घ्यावा लागणार आहे. पुरंदरच्या प्रस्तावित विमानतळाला होणारा शेतकऱ्यांचा विरोध मोडून काढण्यामध्ये या पॅकेजचा महत्त्वाचा वाटा असेल, अशी शक्यता वर्तवली जात आहे.
मोबाइल अॅप डाउनलोड करा आणि राहा अपडेट
