म. टा. प्रतिनिधी, पुणे
वारजे जलकेंद्र, खडकवासला ‘रॉ वॉटर’ पंपिंग, जुने वारजे जलकेंद्र, गणपती माथा पंपिंग तसेच बुस्टर पंपाच्या दैनंदिन देखभालीसाठी आलेल्या तीन निविदांमध्ये त्रुटी असतानाही एका कंपनीवर पालिका मेहेरबान झाल्याचे चित्र आहे. ही एकमेव कंपनी एकमेव निकषपात्र असल्याचा दावा करून २१.१९ कोटी रुपयांची निविदा मंजूर करण्याचा घाट घालण्यात आला आहे.
वारजे जलकेंद्र, खडकवासला ‘रॉ वॉटर’ पंपिंग, जुने वारजे जलकेंद्र, गणपती माथा पंपिंग तसेच बुस्टर पंपाच्या दुरुस्तीसाठी यापूर्वीच्या निविदांची मुदत एप्रिलअखेर संपत आहे. पुढील तीन वर्षांसाठी नव्याने ठेकेदार नेमण्यासाठी पालिकेने जाहिरात देऊन निविदा मागवल्या होत्या. या वेळी तीन कंपन्यांनी निविदा भरल्या. त्यातील कोणतीही कंपनी निकषांमध्ये पात्र ठरत नसल्याचा विद्युत विभागाचा दावा आहे. पाणी पुरवठा विभागाचे अधीक्षक अभियंता (विद्युत) यांनी पाच एप्रिलला पाणीपुरवठा विभागाच्या कार्यकारी अभियंन्यांना पत्र पाठवून, तिन्ही कंपन्यांच्या निविदांबद्दल माहिती दिली. त्यात कंपन्यांनी निकष पूर्ण केले नसल्याचे म्हटले आहे. विद्युत विभागाचे अधीक्षक अभियंता श्रीकृष्ण चौधरी यांनी अतिरिक्त (विशेष) यांना सात एप्रिलला पाठवलेल्या पत्रात निविदांची माहिती दिली. त्यात एका कंपनीने सादर केलेले रजिस्ट्रेशन ग्राह्य धरल्यास ती कंपनी पात्र होत असल्याचा दावा करण्यात आला आहे.
पाणीपुरवठा विभागाकडील यापूर्वीची निविदा एप्रिलअखेर संपत असल्याने कामाची निकड असल्याचे म्हटले आहे. त्यानुसार एकतर नव्याने निविदा मागवणे किंवा एकमेव पात्र निविदेचे पाकीट उघडून पुढील आदेशाची विनंती केली होती. त्यानंतर निविदांना एकवेळ मुदतवाढ देण्यात आली होती. तेव्हाही याच कंपन्यांनी निविदा भरल्या होत्या. विद्युत विभागाने पुन्हा पाठवलेल्या पत्रानुसार या तिन्ही कंपन्या अपात्र असल्याचे म्हटले आहे.
निविदांना उशीर का?
वारजे जलकेंद्र, खडकवासला ‘रॉ वॉटर’ पंपिंग, जुने वारजे जलकेंद्र, गणपती माथा पंपिंग तसेच बुस्टर पंप यांच्या दुरूस्तीच्या कामांच्या निविदा एप्रिलअखेर संपत असल्याची माहिती प्रशासनाला होती. पाणीपुरवठा विभागानेही तशी नोंद केली होती.. त्यामुळे वेळीच निविदा काढण्यात आल्या असत्या तर, आतासारखी परिस्थिती निर्माण झाली नसती, असा दावा काँग्रेसचे गटनेते अरविंद शिंदे यांनी केला.
मोबाइल अॅप डाउनलोड करा आणि राहा अपडेट
