म. टा. प्रतिनिधी, पुणे
सावित्रीबाई फुले पुणे विद्यापीठाकडून आज, रविवारी राज्य पात्रता परीक्षा (सेट) घेण्यात येणार आहे. मात्र, या परीक्षेसाठी आवश्यक प्रवेशपत्र (हॉल तिकीट) सर्व्हर नादुरुस्त असल्याने डाउनलोड करता न आल्याने विद्यार्थ्यांना मनस्ताप करावा लागला. प्रवेशपत्राविना परीक्षेला जायचे कसे, असा प्रश्न विद्यार्थ्यांना पडला आहे. या गोंधळामुळे मोठ्या संख्येने विद्यार्थी परीक्षेला मुकण्याची शक्यता आहे.
विद्यापीठाकडून सहायक प्राध्यापक पदासाठी अनिवार्य सेट परीक्षेला महाराष्ट्र आणि गोव्यातून ८९, ७७२ विद्यार्थी बसणार आहेत. राज्यातील १५२ केंद्रावर आणि पुण्यातील २९ केंद्रावर ही परीक्षा होणार आहे. शुक्रवारपर्यंत परीक्षेसाठी निम्म्याहून अधिक विद्यार्थ्यांनी हॉल तिकीट डाउनलोड केली नसल्याचे विद्यापीठाकडून सांगण्यात आले होते. दरम्यान, रविवारी परीक्षा असल्याने शनिवारी setexam.unipune.ac.in या वेबसाइटवरून प्रवेश पत्र डाउनलोड करण्यासाठी विद्यार्थ्यांनी शर्थीने प्रयत्न केले. एकाचवेळी मोठ्या प्रमाणात विद्यार्थी हॉल तिकीट डाउनलोड करत असल्याने सर्व्हर डाउन झाला. शनिवारी दिवसभर हीच परिस्थिती कायम असल्याने बऱ्याच विद्यार्थ्यांना प्रवेशपत्र मिळविण्यात अपयश आले.
या पार्श्वभूमीवर विद्यार्थ्यांनी विद्यापीठाशी आणि सेट विभागाशी संपर्क करण्याचा प्रयत्न केला. मात्र, त्यांना योग्य प्रतिसाद मिळाला नाही. दर वर्षी विद्यार्थ्यांना अशाच प्रकाराच्या समस्यांचा सामना कारावा लागतो. त्यामुळे विद्यापीठाने कारभार सुधारला पहिजे, अशी अपेक्षा विद्यार्थ्यांनी व्यक्त केली.
दरम्यान, प्रवेशपत्र काढण्यासाठी सायबर कॅफेमध्ये विद्यार्थ्यांची गर्दी दिसून आली. दरम्यान, ज्या विद्यार्थ्यांना हॉल तिकीट डाउनलोड करता आले नाही, अशांनी सेटची परीक्षा द्यायची तरी कशी, असा प्रश्न उपस्थित झाला आहे.
आजही प्रवेशपत्र मिळणार
विद्यापीठाच्या सेट विभागाने ज्या विद्यार्थ्यांना हॉल तिकीट डाउनलोड करता आलेले नाही, अशांना setco@unipune.ac.in या ई-मेल आयडीवर आपला ‘लॉग इन आयडी’ आणि नोंदणी केलेला ‘ई-मेल आयडी’ टाकून ई-मेलद्वारे तक्रार नोंदविण्यास बजावले आहेत. दरम्यान, रविवारी सकाळी ७ वाजेपर्यत ई-मेलद्वारे हॉल तिकिटबाबत तक्रार करणाऱ्या विद्यार्थ्यांना त्यांच्या ई-मेल आयडीवर हॉल तिकीट पाठविण्यात येईल, अशी माहिती विद्यापीठाचे कुलसचिव डॉ. नरेंद्र कडू यांनी दिली.
मोबाइल अॅप डाउनलोड करा आणि राहा अपडेट
