‘फुटाण्यांची मजा गडकऱ्यांना (एकच प्याला) कळली, तशीच ती फुटाणे यांनाही कळली,’ या माजी केंद्रीय गृहमंत्री सुशीलकुमार शिंदे यांच्या कोटीवर ‘नेते सायंकाळी सहा वाजेपर्यंत महापुरुषांच्या नावांचा जप करतात. सातपर्यंत बिल्डरांची नावे घेतात, आणि त्यानंतर रेड, ब्ल्यू, अशा ब्रँडची नावे घेऊ लागतात...’ अशी फिरकी रामदास फुटाणे यांनी घेतली. सर्वोच्च न्यायालयाच्या पाचशे मीटरच्या निर्णयामुळे दर्दींची उतरलेली नशा या संवादामुळे गुरुवारी सायंकाळी चढतच गेली.
ज्येष्ठ भाष्यकार आणि वात्रटिकाकार रामदास फुटाणे यांच्या अमृतमहोत्सवीवर्षानिमित्त त्यांच्या जन्मदिनाच्या पूर्वसंध्येला ही शब्दमैफल रंगत गेली अन् रंगलेल्या मैफलीची नशा चढत गेली. अखिल भारतीय मराठी नाट्य परिषद, कोथरूड शाखा आणि महाराष्ट्र कला प्रसारिणी सभा यांच्यातर्फे फुटाणे यांचा शिंदे यांच्या हस्ते सपत्नीक सत्कार करण्यात आला. फुटाणे यांच्या पत्नी प्रभावती फुटाणे, ज्येष्ठ पत्रकार मधुकर भावे, राष्ट्रीय चित्रपट संग्रहालयाचे संचालक प्रकाश मगदूम, लेखक अरुण शेवते, उद्योजक भारत देसडला, संजय ढेरे, सभेचे सचिन इटकर, परिषदेचे अध्यक्ष सुनील महाजन उपस्थित होते. डॉ. डी. वाय. पाटील विद्यापीठाचे कुलपती डॉ. पी. डी. पाटील अध्यक्षस्थानी होते. पाटील व देसडला यांच्यातर्फे फुटाणे यांना पाच लाखांचा गौरव निधी देण्यात आला.
‘फुटाणेंनी आमच्या किती वेळा टोप्या उडवल्या आठवत नाही. आम्हाला त्याचे वाईट वाटत नाही. फुटाणे यांनी साहित्याची सेवा करत डोळ्यात अंजन घालण्याचे काम केले आहे. सामना चित्रपटाने समाजाचे राजकीय दिग्दर्शन केले. आजकाल असे चित्रपट तयार होत नाहीत. लोकांची रुची बदलली आहे. फुटाणे यापुढेही समाज ढवळून काढण्यासाठी दिशा देतील,’ असे गौरवोद्‍वगार शिंदे यांनी काढले. ‘लेखक, कवींनी केवळ साहित्य व शब्दांत रमणे एवढेच अपेक्षित नाही. समाजाचे सुख, दु:ख बघितले पाहिजे,’ अशा शब्दांत शिंदे यांनी साहित्यिकांना फटकारले.
‘मी रामदास फुटाणे म्हणूनच जगलो. शंभर वर्षांनंतर माझ्या कविता वाचल्या गेल्या तर मी कवी ठरेन,’ अशी भावना व्यक्त करून फुटाणे म्हणाले, ‘कवींनी कोणत्याही विचारसरणीच्या आहारी न जाता सामाजिक, राजकीय विषमतेवर त्रयस्थपणे भाष्य करणे अपेक्षित असते. आजचे वातावरण पाहिले, की मूलत्त्ववाद्यांची चळवळ पुन्हा वर डोके काढते की काय अशी भीती वाटते.’ सूत्रसंचालन उद्धव कानडे यांनी केले. उत्तरार्धात सामना चित्रपट दाखविण्यात आला.
पांढरी टोपी जाऊन लाल टोपी
रामदास फुटाणे यांचा फुले पगडी घालून सत्कार करण्यात आल्यानंतर ते भाषणाला उठले. लाल रंगाच्या पगडीवरून सुशीलकुमार शिंदे यांनी ‘फुटाणेंच्या डोक्यावर पांढरी टोपी जाऊन लाल टोपी आली आहे,’ अशी टिप्पणी केली. ही संधी साधत फुटाणेंनी डोक्यावरील पगडीकडे बोट दाखवित ‘हा विचार दीर्घकाळ टिकणारा आहे,’ असा खुसखुशीत टोला हाणला अन् सभागृहात खसखस पिकली.
मोबाइल अॅप डाउनलोड करा आणि राहा अपडेट
