भंगार समजून बॉम्बसदृश वस्तू घरात आणून फोडताना झालेल्या स्फोटात एकाच कुटुंबातील तरुणीसह तिघे गंभीर जखमी झाले आहेत. देहूरोड येथील झेंडेमळा नायडूनगर येथे मंगळवारी (११ एप्रिल) दुपारी साडेतीनच्या सुमारास ही घटना घडली. जखमींवर पुण्यातील ससून हॉस्पिटलमध्ये उपचार सुरू आहेत. दुपारी घडलेल्या या प्रकाराबाबत कोणत्याही कर्मचाऱ्याला अथवा वरिष्ठ अधिकाऱ्याला माहिती नव्हती.
बाला महेंद्र बिडलान (४०), राजकुमार महेंद्र बिडलान (२५) आणि पूजा महेंद्र बिडलान (२०) असे गंभीर जखमी झालेल्यांची नावे आहेत. स्थानिकांकडून मिळालेल्या माहितीनुसार, देहूरोडमधील झेंडेमळा येथील नायडूनगर येथे राहणारे बडलानी कुटुंब भंगार वेचण्याचे काम करतात. भंगार वेचताना त्यांना एक वस्तू सापली. दुपारी साडेतीनच्या सुमारास त्यांनी ही वस्तू घरी आणली. बॉम्बसदृश गोळा फोडताना स्फोट होऊन यात तिघेजण भाजले.
जखमींवर पिंपरी येथील वायसीएम हॉस्पिटलममध्ये प्राथमिक उपचार करून, पुण्यातील ससून हॉस्पिटमध्ये दाखल करण्यात आले आहे. जखमींपैकी एकाची प्रकृती चिंताजनक असल्याचे वायसीएम पोलिस चौकीतील कर्मचाऱ्यांनी सांगितले. काही दिवसांपूर्वी देहूरोड ऑर्डनन्स फॅक्टरीत सिग्नल बॉम्बचा स्फोट होऊन एक कर्मचारी किरकोळ भाजला होता.
मोबाइल अॅप डाउनलोड करा आणि राहा अपडेट
