Chintamani.Patki@timesgroup.com
Tweet : @chintamanipMT
पुणे : गानसरस्वती किशोरी आमोणकर यांच्या निधनानंतर त्यांचा विशुद्ध स्वरच आता जाणकारांसाठी आशेचा किरण ठरला आहे. संगीताच्या जाणकारांकडे किशोरीताईंच्या अनेक दुर्मिळ रेकॉर्ड संग्रही आहेतच; पण आता त्यांच्या गायकीचे ऑनलाइन दालन खुले झाले आहे. सोमवारी आमोणकरांचे निधन झाल्यानंतर संगीतासाठी वाहिलेल्या सर्वच वेबसाइटवर त्यांच्याच बंदिशी अग्रभागी दिसू लागल्या आहेत. मोबाइलच्या हॅलोट्यूनसाठीही त्यांच्याच बंदिशींना पसंती दिली जात आहे.
आपल्या गायकीतून जाणकारांना एका अलौकिक जगात घेऊन जाणाऱ्या किशोरीताईंच्या निधनानंतर संपूर्ण वातावरणात व्यापून राहिलेला त्यांचा विशुद्ध स्वर हाच रसिकांना साथ करणार आहे. जुन्या दर्दी रसिकांकडे किशोरीताईंच्या सर्व गायकीचा संग्रह असतो; पण मध्यमवयीन तसेच तरुण रसिक किशोरीताईंचा विशुद्ध स्वर कानात साठवून घेत असल्याने संगीताची ऑनलाइन मागणी वाढली आहे. किशोरीताईंच्या निधनानंतर संगीताच्या सर्व वेबसाइट, यू-ट्यूबवर त्यांच्याच ध्वनिमुद्रिका आणि चित्रफिती झळकू लागल्या आहेत. किशोरीताईंची संपूर्ण गायकीच ‘होम पेज’वर उपलब्ध करून देत ऑनलाइन माध्यमांनी अनोखी श्रद्धांजली वाहिली आहे.
वेबसाइटवरून ऑनलाइन संगीत ऐकणे, डाउनलोड करणे ही तरुणाईची आवड बनली आहे. यू-ट्यूब तर अशांचे हक्काचे व्यासपीठच... याचबरोबर सोशल मीडियावरही बरेचसे पर्याय उपलब्ध आहेत. तरुण पिढीबरोबर मध्यमवयीन तसेच ज्येष्ठही काही प्रमाणात नेटसॅव्ही झाले आहेत. किशोरीताईंच्या निधनानंतर ऑनलाइन सर्चमध्येही वाढ झाली आहे. हे हेरून अनेक वेबसाइटनी किशोरीताईंच्या बंदिशी मोफत डाउनलोडिंगसाठी उपलब्ध केल्या आहेत.
‘सहेला रे’लोकप्रियतेत आघाडीवर
‘'सहेला रे’ ही बंदिश सर्चमध्ये आघाडीवर आहे. यूट्यूबवरूनही किशोरीताईंच्या मैफली ऐकण्याचे आणि पाहण्याचे प्रमाण वाढले आहे, असे निरीक्षण तज्ज्ञ नोंदवित आहेत. हॅलोट्यूनसाठीही किशोरीताईंच्या बंदिशींची मागणी वाढली आहे. मात्र, त्यामध्ये ‘सहेला रे’ ही बंदिश नसल्याने हिरमोड होत आहे. त्यामुळे इतर बंदिशींना पसंती देण्यात येत आहे. आमोणकरांच्या निधनानंतर ऑनलाइनच्या माध्यमातून पारंपरिक आणि अपारंपरिक श्रोतृवर्ग शास्त्रीय संगीताशी जोडला जात आहे.
मोबाइल अॅप डाउनलोड करा आणि राहा अपडेट