९७वे अखिल भारतीय नाट्य संमेलन पुढे ढकलावे, अशी मागणी नियोजित नाट्यसंमेलनाध्यक्ष जयंत सावरकर यांनी केल्याने नाट्यपरिषद आणि संमेलनाच्या संयोजकांपुढे पेच निर्माण झाला आहे. संयोजकांनी उस्मानाबादमध्ये संमेलनाची पूर्वतयारी सुरू केली आहे. परंतु, सावरकर यांच्या मागणीमुळे संयोजक पेचात पडले आहेत.
एप्रिल महिन्यात २१ ते २३ एप्रिल दरम्यान उस्मानाबाद येथे नाट्य संमेलन होणार आहे. फेब्रुवारी महिन्यात होणारे संमेलन यंदा एप्रिलमध्ये होत आहे. संमेलन उस्मानाबादमध्ये होत असल्याने तापमानाचा वाढता फटका संमेलनाला बसू शकतो. या कारणाने सावरकर यांनी संमेलन पुढे ढकलून तापमान कमी झाल्यानंतर ते घ्यावे, अशी मागणी नाट्य परिषदेकडे केली. संमेलनाच्या तारखांवरून आधीच सावळागोंधळ सुरू असताना खुद्द संमेलनाध्यक्षांच्या मागणीमुळे संमेलनापुढचा पेच आणखी वाढला आहे. उस्मानाबादमधील नाट्य रसिक आणि नाट्य परिषदेच्या शाखेला पुन्हा संमेलन कधी उस्मानाबादमध्ये होईल, की नाही, याची शंका वाटते. त्यामुळेच, यजमान म्हणून कोणत्याही परिस्थितीत संमेलन यशस्वी करायचे असा निर्धार नाट्य परिषदेच्या उस्मानाबाद शाखेच्या पदाधिकाऱ्यांनी केला आहे. मात्र, अचानक सावरकर यांनी केलेल्या मागणीमुळे नाट्य संमेलनावर प्रश्नचिन्ह उपस्थित झाले आहे.
नाट्यसंमेलनाचे संयोजक व उस्मानाबाद नाट्य परिषदेचे अध्यक्ष विशाल शिंगाडे म्हणाले, ‘नाट्य संमेलन उस्मानाबाद येथे पार पडणार असल्याने शहरातील नागरिकांमध्ये आणि नाट्य रसिकांमध्ये मोठा उत्साह आहे. संमेलनाची तयारी जोरात सुरू आहे. तापमानाचा वाढता पारा लक्षात घेऊन संमेलनस्थळी सभामंडपात शेकडो फॅन आणि कूलरची व्यवस्था करण्यात येणार आहे. संमेलनासाठी येणाऱ्या रसिकांना उन्हाचे चटके बसू नयेत याचीही दक्षता घेण्यात येणार आहे. संयोजक म्हणून सर्व प्रकारे संमेलन यशस्वी करण्याचा उस्मानाबाद शाखेचा प्रयत्न आहे. लवकरच संमेलनाच्या जाहीरातीही माध्यमांमधून प्रसिद्ध केल्या जाणार आहेत. परंतु, संमेलनाच्या अध्यक्षांनीच संमेलन पुढे ढकला, अशी मागणी केल्याने पेच तयार झाला आहे. लवकरात लवकर हा पेच सोडवणे गरजेचे आहे.
सावरकरांच्या या मागणीवर अद्याप नाट्यपरिषदेच्या मध्यवर्ती शाखेने कोणतीही भूमिका घेतलेली नाही. त्यामुळे, संमेलन होणार की नाही होणार, सावरकरांची मनधरणी करण्यात परिषदेला यश मिळणार का, असे अनेक प्रश्न समोर उभे राहिले आहेत. संमेलनावर पसरलेले उदासीनतेचे सावट झटकून ठोस भूमिका घेऊन नाट्यपरिषदेने यंदाचे संमेलन यशस्वी करायला हवे, अशी अपेक्षा नाट्यवर्तुळातून व्यक्त केली जात आहे. संमेलन पुढे ढकला, या नियोजित अध्यक्ष सावरकर यांच्या मागणीबाबत अखिल भारतीय मराठी नाट्य परिषदेचे प्रमुख कार्यवाह दीपक करंजीकर यांच्याशी वारंवार संपर्क साधूनही प्रतिसाद मिळाला नाही.
मोबाइल अॅप डाउनलोड करा आणि राहा अपडेट
