म. टा. प्रतिनिधी, पिंपरी
हिंजवडी आयटी कंपनीत रुजू होताना १०८ अभियंत्यांकडून सेक्युरिटी डिपॉझीट म्हणून घेतलेली २२ लाख ९७ हजार रुपयांची रक्कम घेऊन कंपनीमालक पसार झाला आहे. नोव्हेंबर २०१६ ते २८ मार्च २०१७ या दरम्यान हा प्रकार घडला.
सिग्नीफिया टेकराइट प्रा. लि. कंपनीच्या कार्यकारी संचालक पूनम गायकवाड यांच्यासह कंपनीतील भागीदार महेंद्र पाटील आणि आबासाहेब खळदकर यांच्याविरोधात गुन्हा दाखल करण्यात आला आहे. या प्रकरणी संगणक अभियंता नीलेश हासे (२५, रा. चिखली, पुणे) यांनी हिंजवडी पोलिस ठाण्यात फिर्याद दिली आहे.
पोलिसांनी दिलेल्या माहितीनुसार, हिंजवडी येथे सिग्नीफिया टेकराइट प्रा.लि. कंपनी आरोपींनी सुरू केली होती. कंपनीत काम करण्यासाठी १०८ अभियंता तरुण, तरुणींना नियुक्त करून घेण्यात आले होते. त्यांच्याकडून कंपनीत रुजू होताना सेक्युरिटी डिपॉझिट म्हणून प्रत्येकी ३० हजार रुपये घेतले होते. हासे हे संगणक अभियंता आहेत. एक महिन्यापूर्वी ते कंपनीत रुजू झाले होते. कंपनीत रुजू होताना त्याच्याकडून सेक्युरिटी डिपॉझिट म्हणून ३० हजार रुपये घेतले होते. हासे यांनी एक महिना कंपनीत काम केले. महिन्यानंतर कंपनीने त्याचा पगार देखील दिला नाही. तसेच त्याच्याकडून डिपॉझिट म्हणून घेतलेले ३० हजार रुपयेही परत केले नाहीत. हासे याच्यासह इतर १०७ अभियंत्याची फसवणूक झाली आहे. त्यानंतर आरोपी कंपनीचा गाशा गुंडाळून पसार झाले आहेत.
अभियंते कंपनीत गेले असता कंपनीत काहीच नसल्याचे लक्षात आले. आपली फसवणूक झाल्याचे लक्षात येताच नीलेश यांनी पोलिस ठाण्यात धाव घेतली. फौजदार आर. एम. केंगार अधिक तपास करीत आहेत.
मोबाइल अॅप डाउनलोड करा आणि राहा अपडेट
