सुरेश प्रभूंच्या हस्ते शनिवारी ‘डेमू’चे लोकार्पण
म. टा. प्रतिनिधी, पुणे
गेल्या चाळीस वर्षांपासून असणारी दौंडकरांची ‘पुणे-दौंड’ उपनगरीय प्रवासी वाहतूक सेवेची प्रतीक्षा आता संपणार आहे. रेल्वे मंत्री सुरेश प्रभू यांच्या हस्ते येत्या शनिवारी (ता.२५) पुणे-दौंड मार्गावर ‘डेमू’ला (डिझेल मल्टिपल युनिट) हिरवा कंदील दाखविला जाणार आहे. त्यामुळे पुणे-लोणावळा उपनगरीय सेवेप्रमाणे पुणे-दौंड उपनगरीय सेवेचा लाभ प्रवाशांना घेता येणार आहे.
पुणे-मिरज-लोंढा मार्गाचे दुपदरीकरण, पुणे स्टेशनवरील सोलर पॉवर प्रकल्प, वाय-फाय सुविधा, पुणे-दौंड मार्गाचे विद्युतीकरण, पाण्यावरील पुनर्प्रक्रिया प्रकल्प आदींचे उदघाटन आणि लोकार्पण प्रभू यांच्या हस्ते केले जाणार आहे. हा कार्यक्रम कोल्हापूर स्टेशन येथे होणार आहे. याचवेळी प्रभू पुणे-दौंड गाडीला व्हिडिओ कॉन्फरन्सिंगद्वारे हिरवा झेंडा दाखवतील. त्यानंतर ती पुणे स्टेशनहून दौंडसाठी रवाना होईल.
पुणे-लोणावळा मार्गावर ११ मार्च १९७७ रोजी लोकल (इलेक्ट्रिक मल्टिपल युनिट) सेवा सुरू करण्यात आली होती. त्यावेळी पुणे-दौंड आणि पुणे-सातारा या मार्गांवरही उपनगरीय सेवा सुरू करण्याची चर्चा होती. तेव्हापासून दौंडला लोकल सुरू होण्याची प्रतीक्षा होती. दौंडवरून पुण्याला नोकरी किंवा शिक्षणानिमित्त येणाऱ्यांची संख्या खूप आहे. त्यामुळे या मार्गावर उपनगरीय सेवेची नितांत गरजही होती. मात्र, या मार्गाचे विद्युतीकरण झालेले नव्हते, त्यामुळे तेव्हा लोकल सुरू करणे शक्य नव्हते. मात्र, २००७-०८ साली विद्युतीकरणाचे काम सुरू झाले. ते सप्टेंबर २०१६ मध्ये पूर्ण झाले. त्यावेळी लोकल सेवा सुरू होण्याच्या आशा पल्लवीत झाल्या होत्या. मात्र, या मार्गावरील काही स्टेशनवर आवश्यक सोयीसुविधा नसल्याने ‘इमू’द्वारे लोकल सेवा सुरू करणे शक्य नव्हते. त्यामुळे ‘डेमू’चा पर्याय समोर आला. जानेवारी महिन्यापासून आतापर्यंत पुणे विभागात ‘डेमू’चे तीन ‘रेक’ दाखल झाले आहेत. त्यामुळे याद्वारे उपनगरीय सेवा देण्याचा मार्ग मोकळा झाला.
रेल्वेमंत्र्यांमुळेच सेवेला विलंब
दरम्यान, पुणे-दौंड मार्गावर डेमूद्वारे (डिझेल मल्टिपल युनिट) उपनगरीय (लोकल) प्रवासी सेवा देण्यासाठी आवश्यक बाबींची पूर्तता झाल्यानंतर, प्रत्यक्ष सेवा सुरू होण्याची प्रतीक्षा तीन महिन्यांपासून आहे. या गाडीच्या उद्‍‍घाटनासाठी प्रभू यांची वेळ मिळत नसल्यानेच सेवा सुरू करण्यास विलंब होत असल्याची चर्चा होती. आता प्रभू यांच्याच हस्ते गाडीचा शुभारंभ होणार असल्याने, त्या चर्चेत तथ्य असल्याचे स्पष्ट होते.
डेमू बारामतीपर्यंतच
पुणे विभागाला ‘डेमू’चे १० डब्यांचे तीन रेक (गाड्या) उपलब्ध झाले आहेत. त्याचे १५ डब्यांचे दोन रेक केले असून, त्याद्वारे या मार्गावर सेवा दिली जाणार आहे. रेल्वेकडून या मार्गाचे वेळापत्रक करण्याचे काम सध्या सुरू आहे. मात्र, पुण्याहून दौंडला जाणारी गाडी बारामतीपर्यंत नेण्याचा निर्णय रेल्वेने घेतला आहे. मात्र, पुणे-दौंडच्या तुलनेत, पुणे-बारामतीच्या फेऱ्यांची संख्या अत्यल्प असेल, असेही सूत्रांनी सांगितले.
प्रवासी संघटना नाराज
सुरेश प्रभू यांच्या हस्ते उदघाटन आणि लोकार्पण केल्या जाणाऱ्या प्रकल्पांमध्ये पुणे-मिरज-लोंढा मार्गाचे दुपदीकरण वगळता उर्वरित सर्व प्रकल्प रेल्वेच्या पुणे विभागातील आहेत. त्यामुळे हा कार्यक्रम पुणे विभागात न घेता, कोल्हापूरला घेण्यात येत आहे. याबाबत पुण्यातील रेल्वे प्रवासी संघटनांनी नाराजी व्यक्त केली आहे. तसेच, याबाबतचे पत्र दौंड रेल्वे प्रवासी संघाने प्रभू यांना पाठविले आहे.
पुणे-दौंड मार्गावर दररोज ये-जा करणाऱ्या प्रवाशांची संख्या ५५ ते ६० हजार आहे. त्यामध्ये दौंडवरून पुण्याला येणारे प्रवासी अधिक आहेत. त्यामुळे ‘डेमू’ ‘दौंड ते पुणे’ अशी चालविण्यात यावी. या गाडीचे वेळापत्रक निश्चित करताना प्रवासी संघटनांना विश्वासात घ्यावे.
विकास देशपांडे, सदस्य, क्षेत्रीय सल्लागार समिती, मध्य रेल्वे
बहुप्रतीक्षित दौंड उपनगरीय सेवा सुरू होत असल्याचा आनंद आहे. या मार्गावर विद्युतीकरण झालेले आहे. त्यामुळे इमूद्वारे लोकल सेवा देणे शक्य आहे. प्रशासनाने मांजरी, कडेठाण आणि खुटबाव स्टेशन वगळता इमू सुरू करावी.
हर्षा शहा, अध्यक्ष, रेल्वे प्रवासी ग्रुप
मोबाइल अॅप डाउनलोड करा आणि राहा अपडेट
