बावधन येथील सूर्यदत्त कॉलेजसमोर एमडी या अंमली पदार्थाची विक्री करण्यासाठी आलेल्या दोघांना अंमली पदार्थ विरोधी पथकाने अटक केली. त्यांच्याकडून ८५ ग्रॅम अंमली पदार्थ आणि चारचाकी असा चार लाख २४ हजारांचा मुद्देमाल जप्त करण्यात आला.
नितीन सुभाष सूर्यवंशी (वय ३४, रा. पिंपळे सौदागर, पिंपरी) आणि गौरांग मनहरभाई शहा (वय ३४, रा. शांतीकुंज सोसायटी, बडोदा, गुजरात) अशी अटक केलेल्यांची नावे आहेत. बावधन येथील सूर्यदत्त कॉलेजसमोर दोन व्यक्ती एमडी देण्यासाठी येणार आहेत, अशी माहिती अंमली पदार्थ विरोधी पथकाचे सहायक निरीक्षक अजय वाघमारे यांना मिळाली. त्यानुसार, पोलिस निरीक्षक प्रतिभा जोशी, स्वाती थोरात यांच्या पथकाने रविवारी सायंकाळी सापळा रचला. स्विफ्टमधून एमडी देण्यासाठी आल्यानंतर या दोघांना पकडण्यात आले. त्यांच्याकडून ८५ ग्रॅम अंमली पदार्थ जप्त करण्यात आला. या प्रकरणी हिंजवडी पोलिस ठाण्यात अंमली पदार्थ विरोधी कायद्यानुसार गुन्हा दाखल करण्यात आला आहे.
ब्राउन शुगर विक्रेता अटकेत
पाटील इस्टेट येथे ब्राउन शुगरची विक्री करण्यास आलेल्या व्यक्तीला अंमली पदार्थ विरोधी पथकाने रविवारी सायंकाळी अटक केली. त्याच्याकडून अकरा ग्रॅम ब्राउन शुगर जप्त करण्यात आली आहे. नीरज अर्जुन टेकाळे (वय २४, रा. पाटील इस्टेट झोपडपट्टी) असे अटक केलेल्याचे नाव आहे. पोलिस निरीक्षक प्रतिभा जोशी या पथकासह गस्त घालत असताना संशयावरून त्यांनी आरोपीला हटकले. त्यावेळी तो पळून जाऊ लागला. पथकाने पाठलग करून त्याला पकडले. त्यावेळी त्याच्याकडे ब्रान्न शुगरच्या पुड्या आढळून आल्या. त्याने ही ब्राउन शुगर अलीशेर लालमहंमद सौदागर आणि अशोक भांबुरे यांच्याकडून घेतल्याचे कबूल केले. या प्रकरणी खडकी पोलिस ठाण्यात गुन्हा दाखल करण्यात आला आहे.
मोबाइल अॅप डाउनलोड करा आणि राहा अपडेट
