गुलटेकडी मार्केट यार्डात नेहमीप्रमाणे मागणी आणि पुरवठा सारखा असल्याने बहुतांश भाज्यांचे दर स्थिर राहिले आहेत. परंतु, कमी आवक झाल्याने बटाटा, भेंडी, सिमला मिरची, घेवड्यासह पावट्याचे भाव १० ते २० टक्क्यांनी वाढले आहेत. मेथी, कोथिंबीरचे दरही थोडे वधारले आहेत.
गुलटेकडी मार्केट यार्डात राज्यासह परराज्यातून आवक होत आहे. मार्केट यार्डात रविवारी १६० ते १७० ट्रक भाज्यांची आवक झाली. परराज्यातून राजस्थानातून गाजराची ७ ते ८ ट्रक, कर्नाटक, गुजरातमधून हिरवी मिरचीची १८ ते २० टेम्पोची आवक झाली आहे. जयपूरमधून मटारची ८ ते ९ ट्रक, आंध्र प्रदेश आणि तमिळनाडूतून शेवग्याची ७ ते ८ टेम्पो आवक झाली आहे. गुजरात आणि कर्नाटकातून कोबीची चार ते पाच टेम्पोची आवक झाली आहे. कर्नाटकातून तोतापुरी कैरीची ७ ते ८ टेम्पो आवक झाली आहे.
सातारी आल्याची १५०० पोती, टोमॅटोची साडेपाच ते सहा हजार पेटी, हिरव्या मिरचीची चार ते पाच टेम्पोची आवक झाली आहे. फ्लॉवर व कोबीची प्रत्येकी ची १४ ते १५ टेम्पो, सिमला मिरचीची १० ते १२ टेम्पोची आवक झाली. गाजराची पाच ते सहा टेम्पो, शेवग्याची चार ते पाच टेम्पोची आवक झाली. मटारची ५० ते ६० गोणीची आवक झाली आहे. तांबडा भोपळ्याची ८ ते १० टेम्पोची आवक झाली. चिंचेची ३० ते ४० गोणी तर गावरान कैरीची ४ ते ५ टेम्पोची आवक झाली आहे.
पुणे विभागातून कांद्याची दीडशे ट्रक आवक झाली. तळेगाव, आग्रा, इंदौर येथून बटाट्याची ७५ ट्रकची आवक झाली आहे. मध्य प्रदेश, गुजरात येथून लसणाची साडेपाच हजार गोणींची आवक झाली आहे. गेल्या दोन आठवड्यांपेक्षा लसणाची एक ते दीड हजार गोणींची आवक वाढली आहे. कांद्यासह लसणाचे दर थोडेसे खाली आल्याचे दिसते.
पालेभाज्यांमध्ये कोथिंबिरीची आवक वाढली आहे. दोन लाख जुडींची आवक झाली आहे. मेथीची आवक घटली असून त्यामुळे त्याचे दर वाढले आहेत. तीस हजार जुडींची आवक झाली आहे. अन्य पालेभाज्यांचे दर स्थिर राहिले आहेत.
खोल समुद्रातील मासळी महागली
होळी, रंगपंचमीच्या सणामुळे गेल्या आठवड्यात कोकणात मासेमारी होऊ शकली नाही. त्यामुळे कोकणातून होणारी मासळीची आवक कमी होत आहे. तरीही गेल्या बुधवारपासून मासळीला मागणी वाढली आहे. खोल समुद्रातील मासळीला मागणी वाढल्याने तेथील मासे महागले आहेत. गणेश पेठेतील मासळी बाजारात रविवारी खोल समुद्रातील आंध्रचा रहू, कतला, सिलन मासळीची १२ टन एवढी आवक झाली आहे. खाडीची ३०० किलो, तर नदीच्या मासळीची ५०० ते ६०० किलोची आवक झाली आहे. अंड्यांना सध्या मागणी घटली आहे. त्यामुळे त्याच्या दरात घट झाली आहे. अंड्याच्या शेकड्याच्या दरात १५ ते २० टक्के दर उतरले आहेत. त्यामुळे गावरानच्या एका अंड्याला सात रुपये तर इंग्लिश अंड्याला साडेचार रुपये मोजावे लागणार आहे.
झेंडूला होळीमुळे आला भाव
सध्या मार्केट यार्डातील फूल बाजारात फुलांची आवक बेताची झाली आहे. त्यामुळे मागणी देखील साधारण आहे. मागणी आणि आवक सारख्या प्रमाणात असल्याने सर्वच फुलांचे दर स्थिर राहिले आहेत. तर कोकणात शिमगा, होळीच्या सणासाठी झेंडू, बिजलीच्या फुलांना मागणी होती. त्यामुळे झेंडूच्या फुलांसह बिजलीच्या फुलांना दर चांगला मिळाला. झेंडूच्या एका किलोस ३० ते ८० रुपये तर बिजलीला ३० ते ७० रुपये दर मिळाला आहे.
लिंबे महागली, डाळिंब उतरले
उन्हाचा चटका वाढू लागला आहे. त्यामुळे आता फळांना मागणी होत आहे. मागणीच्या तुलनेत पुरवठा देखील फळांचा सारखा होत असल्याने काही फळे वगळता सध्या दरांमध्ये चढ उतार दिसत नाही. ज्यूस विक्रेत्यांकडून सध्या लिंबासह खरबूज, कलिंगडच्या फळांना अधिक मागणी होत आहे. लिंबाची तीन ते चार हजार गोणींची आवक झाली असून आवक घटल्याने त्याच्या दरात ५० ते ७० टक्के वाढ झाली आहे. स्ट्रॉबेरीची दीड टन आवक झाली असून आवक घटल्याने त्याच्या दरात किलोमागे ३० रुपयांची वाढ झाली आहे. द्राक्षांचा हंगाम संपत आला असून बाजारात ७५ टन एवढी आवक झाली आहे. डाळिंबाची ५० टन आवक झाली असून त्याच्या दरात २० टक्के घट झाली आहे. संत्रा, मोसंबीची अनुक्रमे ५ आणि ४० टेम्पोची आवक झाली आहे.
तूर, हरभरा, उडीद, मूग डाळ महागली
आधारभूत किमतीपेक्षा डाळींच्या किंमती खाली आल्याने शेतकऱ्यांचे नुकसान होत होते. त्यामुळे आधारभूत किमतीचा समतोल साधण्यासाठी डाळींच्या किमती पुन्हा वाढल्या आहेत. कडधान्यांच्या दरात देखील काही प्रमाणात वाढ झाली आहे.
मार्केट यार्डातील घाऊक भुसार विभागात तांदूळ, ज्वारी, बाजरी, रवा, आटा, मैदा, नारळ, मिरची, पोहे, भगर, शेंगदाणा, खाद्यतेल, हळद आदी वस्तूंचे दर स्थिर आहेत. डाळींचे गेल्या काही आठवड्यांपासून आधारभूत (हमीभाव) किमतीपेक्षा दर खाली आले होते. त्यात राज्याच्या अर्थसंकल्पात तुरीवर दहा टक्के कर लावण्याची शक्यता वर्तविली जात होती. त्यामुळेदेखील तूर डाळ महाग झाली आहे. क्विंटलमागे २०० रुपयांची वाढ झाली आहे. गुढी पाडवा जवळ आला असून त्यासाठी हरभरा डाळीची मागणी वाढली आहे. परंतु, बाजारात साठा फारसा उपलब्ध नसल्याने क्विंटलमागे ३०० रुपयांची वाढ झाली आहे. गावरान उडीद डाळीचा साठा कमी पडल्याने त्याची सध्या आयात सुरू आहे. त्यामुळे क्विंटलमागे ४०० रुपयांची वाढ झाली आहे. मसूर डाळीसह मटकीच्या डाळीत देखील वाढ झाली आहे. मूग डाळीच्या दरातही पाचशे रुपयांनी वाढ झाली आहे.
डाळी महागल्याने कडधान्यांच्या दरावर त्याचा परिणाम झाला आहे. कडधान्यांमध्ये हरभऱ्याचे दर ३०० रुपयांनी वाढले आहेत. तर, मटकी आणि मूगाच्या दरात प्रत्येकी २०० रुपयांची वाढ झाली आहे. पांढरा आणि हिरवा वाटाण्याच्या दरात कोणताही चढ उतार नाही. हरभरा डाळीचे दर वाढल्याने बेसनच्या दरात ५० किलोमागे ७० ते ८० रुपयांची वाढ झाली आहे. भाजकी डाळीच्या दरात ४० किलोमागे १२५ रुपयांची वाढ झाली आहे. साबुदाण्याच्या दरात मंदीमुळे २०० रुपयांची घट झाली आहे.
मोबाइल अॅप डाउनलोड करा आणि राहा अपडेट
