योगाचे प्रशिक्षक, ध्यानसाधक डॉ. नितीन उनकुले (वय ६०) यांची शनिवारी पहाटे चार वाजण्याच्या सुमारास प्राणज्योत मालविली. शनिवारी सकाळी त्यांच्या पार्थिवावर वैकुंठ स्मशानभूमीत अंत्यसंस्कार करण्यात आले. त्यांच्यामागे पत्नी, मुलगा, मुलगी, आई, वडील असा परिवार आहे. शनिवारी त्यांचा वाढदिवस होता. त्यांनी साठीत पदार्पण केले होते.
सुमारे तीस वर्षांहून अधिक काळ त्यांनी योग, ध्यानसाधनेचा अभ्यास केला. त्यावर सातत्याने ते चिंतन करीत होते. योगाचे ज्ञान स्वतःजवळ न ठेवता त्यांनी समाजातील घटकांना उपयोग करून देण्यासाठी सातत्याने प्रयत्न केला. योगा, ध्यानसाधनेमुळे विविध आजारांवर मात करता येईल काय, यावर ते प्रयोग करीत राहिले. हृदयविकारांपासून ते मेंदूविकारापर्यंतच्या अनेक पेशंटना जीवदान देण्यात मोलाची भूमिका त्यांनी बजावली. मानसिक आजार, ताणतणाव, पोटाचे विकार, मानेचे विकार, वाढता लठ्ठपणा कमी करणे, श्वसनाचे आजार यासारख्या आजारावर त्यांनी योगा थेरपीचे मार्गदर्शन केले होते.
लोणावळा येथील कैवल्यधाम योगा संस्थेतून डॉ. उनकुले यांनी योगाचे धडे घेतले होते. तसेच फ्रान्स विद्यापीठातून त्यांनी पीएच. डी. देखील संपादन केली होती. गेल्या वीस ते पंचवीस वर्षांपासून ते योगाचे धडे देत होते. शिवाजीनगर येथील मॉडेल कॉलनीत त्यांनी कैवल्य योग संस्था सुरू केली होती. ‘बदलती जीवनशैली’ या विषयावर हृदयरोग तज्ज्ञ डॉ. जगदीश हिरेमठ यांच्यासह गेल्या २२ वर्षांपासून अनेक ठिकाणी त्यांनी योगाचे धडे दिले. योगासंदर्भात त्यांच्या नावावर १४ पेक्षा अधिक पुस्तके आहेत. सिम्बायोसिस सोसायटीच्या कार्यकारी मंडळाचे ते सदस्य होते. तसेच सिम्बायोसिस आंतरराष्ट्रीय विद्यापीठाचे ते विश्वस्त होते.
मोबाइल अॅप डाउनलोड करा आणि राहा अपडेट
