पुणे आणि पिंपरी-चिंचवड महानगरपालिकेसाठी झालेल्या मतदानानंतर राष्ट्रवादी काँग्रेस आणि भारतीय जनता पक्षात (भाजप) काँटे की टक्कर असल्याचा अहवाल राज्य गुप्तवार्ता विभागाने दिला आहे. भाजप आणि राष्ट्रवादी काँग्रेसमध्ये जागांच फारसा फरक राहणार नसला तरी, भाजपमधील अंतर्गत खदखद मतपेटीत कशी उतरणार याविषयी यंत्रणा साशंक आहे.
प्रचाराच्या शेवटच्या टप्प्यात भाजपच्या ज्येष्ठ नेत्यांमध्ये आणि जुन्या कार्यकर्त्यांमध्ये नाराजीचा सूर आळवला गेला. त्याचा फटका भाजपला बसेल, असे यंत्रणेच्या अहवालात नमूद करण्यात आले आहे. या नाराजीचा फटका मुख्यमंत्री देवेंद्र फडणवीस यांच्या टिळक रोडवरील सभेलाही जाणवला. या नाराजीमुळे पर्वती आणि कसबा मतदार संघातील काही प्रभागांमधील समीकरणे बिघडण्याची शक्यता आहे. पुण्यातील काही विधानसभा मतदार संघात राष्ट्रवादी तर अन्यत्र भाजप बाजी मारेल, असा पोलिसांचा दावा आहे.
राष्ट्रवादी काँग्रेस आणि भाजप या दोन्ही पक्षांना ६० ते ६५ दरम्यान जागा मिळतील, असा पोलिसांचा कयास आहे. त्याखालोखाल काँग्रेस, शिवसेना आणि मनसेला जागा मिळतील. पालिकेत सत्ता कोणाची येईल, याबाबत पोलिस खात्री देत नाहीत. मात्र, भाजपला एकहाती सत्ता मिळणार नसल्याचे नमूद करण्यात आले आहे.
काँग्रेस आणि मनसेच्या घटलेल्या जागा भाजपच्या पारड्यात जातील. सत्ताधारी राष्ट्रवादी काँग्रेसला ‘अँटी इन्कम्बन्सी’चा काही प्रमाणात फटका बसणार असला, तरी मतविभागणीचा फायदा मिळेल, असे पोलिसांचे म्हणणे आहे. शिवसेना आणि काँग्रेस १० ते २० जागांच्या दरम्यान राहतील. शिवसेना काही ठिकाणी आघाडीवर असून, तेथे भाजपला फटका बसण्याची शक्यता आहे. मोदी लाटेनंतर निवडणुकीचे विश्लेषण करताना पोलिसांची दमछाक झाली आहे. ‘एमआयएम’ला जागा मिळणार नाहीत, असा पोलिसांचा अंदाज असून, मनसे सात ते आठ जागा मिळवेल असा दावा करण्यात आला आहे.
संघाची नाराजी भोवणार?
संघ परिवार तसेच इतर हिंदुत्ववादी संघटना काही ठिकाणीच सक्रिय होत्या. त्याचा फटका भाजपला बसण्याची शक्यता वर्तवण्यात येत आहे. भाजपच्या तिकीट वाटपानंतर अंतर्गत त धुसफूस वाढली. पक्षाच्या कार्यालयाच्या दारात झालेले आंदोलन, शहराध्यक्षांच्या पोस्टर्सला काळे फासणे, मुख्यमंत्र्याची सभा रद्द होणे या घटनांमुळे भाजपची प्रतिमा मलीन झाल्याने विरोधी पक्षांना फायदा होण्याचे संकेत पोलिसांनी गोपनीय अहवालात दिले आहेत.
मोबाइल अॅप डाउनलोड करा आणि राहा अपडेट
