म. टा. प्रतिनिधी, पुणे
मोठा गाजावाजा करून हाती घेतलेले मतदार स्लिप वाटण्याचे महापालिका प्रशासनाचे काम सोमवारपर्यंतही पूर्ण होऊ शकले नाही. अखेर शहराच्या अनेक भागांमध्ये नागरिकांना राजकीय पक्षांनी वाटलेल्या स्लिपवरच अवलंबून रहावे लागण्याची वेळ आली असून, आज, मंगळवारी मतदारांना मतदान केंद्र शोधण्यासाठी धावाधाव करावी लागणार आहे. अनेक भागांमधील मतदान केंद्रांचा घोळ अजूनही कायम आहे. मतदान केंद्रे न सापडणे आणि एकाच घरातील सदस्यांना वेगवेगळी मतदानकेंद्रे मिळणे हा अनुभव यंदाही येत आहे.
निवडणुकीपूर्वी मतदारांना मतदानकेंद्रांचा तपशील पुरविणाऱ्या मतदार स्लिप पूर्वी राजकीय पक्षांच्या यंत्रणांमार्फत घरोघरी वाटण्यात येत असत. मात्र, गेल्या काही निवडणुकांमध्ये प्रशासनाने हे काम आपल्या हाती घेतले. मात्र, पुरेसे मनुष्यबळ उपलब्ध नसल्यामुळे तसेच कर्मचाऱ्यांना पत्ते शोधण्यात येणाऱ्या अडचणींमुळे हे काम पूर्ण होत नाही, असे यापूर्वी आढळून आले आहे. हाच अनुभव यंदाही मतदारांना येत आहे. हजारो कुटुंबांमध्ये प्रशासनाकडून मिळणाऱ्या स्लिप पोहोचलेल्या नाहीत. खबरदारीचा उपाय म्हणून अनेक उमेदवारांनी आपापल्या प्रभागांमध्ये घरोघरी आपल्या नावाने स्लिप वाटल्या, त्यांचा मतदारांना उपयोग होणार आहे. अनेक भागांमध्ये प्रशासन स्लिप देणार असल्याने उमेदवारही त्या भरवशावर राहिले. प्रत्यक्षात मात्र, अजून मोठ्या प्रमाणावर स्लिपचे वाटप झालेले नाही. त्यामुळे अनेक मतदार मतदान केंद्रांबाबत अनभिज्ञ आहेत. गोखलेनगर परिसरात महापालिका प्रशासनाच्या स्लिप रस्त्यावर सापडल्याची तक्रार नागरिकांकडून करण्यात आली आहे.
केंद्रांचा घोळ कायम
दरम्यान, मतदार यादीत नावे नोंदविणे आणि त्यांना क्रमांक देण्याचा जुनाच पायंडा कायम ठेवण्यात आला आहे. त्यामुळे एकाच कुटुंबातील काही सदस्यांचे मतदान एका केंद्रात, आणि काहीजणांचे दुसऱ्या केंद्रात अशी स्थिती निर्माण झाली आहे. तसेच, यंदा प्रभागाचा आकारही वाढल्यामुळे मतदान केंद्रेही दूर असल्याची तक्रार मतदारांकडून करण्यात आली आहे.
सीमेवर राहताय? दुसऱ्या प्रभागात शोध घ्या...
तुम्ही प्रभागाच्या सीमेवर राहताय का? मग तुमच्या प्रभागाच्या मतदार यादीत तुमचे नाव सापडले नाही, तर निराश होऊ नका. शेजारच्या प्रभागाच्या मतदार यादीतही शोध घ्या, त्यात तुमचे नाव असू शकेल. त्यामुळे तुमची मतदान करण्याची संधीही डावलली जाणार नाही. शहरात अनेक ठिकाणी प्रभागाच्या सीमेवर राहणाऱ्या शेकडो नागरिकांची नावे त्यांच्या मूळ प्रभागातून गायब झाल्याचे दिसून आले आहे. संबंधित नागरिक घरी मशिन घेऊन येणाऱ्या कार्यकर्त्यांकडे किंवा बूथवर जाऊन नाव तपासत आहेत. मात्र, यादीत त्यांचे नाव सापडत नाही. त्यामुळे यंदा आपली संधी हुकली असा समज करून घेण्यात येत आहे. त्याचवेळी त्यांची नावे निवडणुकीसाठीच्या मुख्य यादीत शेजारच्या प्रभागात आढळत आहेत. त्यामुळे त्यांना स्वतःच्या नव्हे तर शेजारच्या प्रभागासाठी मतदान करावे लागणार असले तरी, त्यांचा मतदानाचा हक्क अबाधित राहील.
कोथरूड, पौड रोड परिसरातील प्रभागाच्या सीमेवर असणाऱ्या काही सोसायट्यांमधील नागरिकांची नावे अशा प्रकारे शेजारील प्रभागाच्या यादीत आढळली आहेत. त्याचबरोबर काहींच्या घरातील काही नावे त्यांच्या स्वतःच्या प्रभागात तर काहींची नावे शेजारच्या प्रभागात असल्याचेही दिसून आले आहे. त्यामुळे ज्यांना आपल्या प्रभागाच्या यादीत स्वतःचे अथवा कुटुंबीयांचे नाव सापडत नसेल, अशांना शेजारील प्रभागाच्या यादीत शोध घ्यावा लागणार आहे. पालिकेच्या मुख्य यादीत शोध घेणे त्यासाठी आवश्यक आहे.
मतदान करा; मोफत मेंदी काढा
महिलांना मतदानासाठी प्रोत्साहन देण्यासाठी मृगनयनी मेंदी आर्ट आणि साईनाथ मंडळ ट्रस्टतर्फे मोफत मेंदी काढून देण्यात येणार आहे. मतदानाची खूण दाखवा आणि दुपारी ११ ते ४ या वेळेत मेंदी काढून घ्या, असे आवाहन करण्यात आले आहे. मृगनयनी मेंदी आर्टसच्या संचालिका धनश्री हेंद्रे यांच्या पुढाकाराने हा उपक्रम राबविण्यात येणार आहे. संस्थेच्या महिला बाजीराव रस्त्यावरील सरस्वती मंदिर प्रशाला, आदर्श विद्यालय, गोपाळ हायस्कूल आणि नूतन मराठी विद्यालय प्राथमिक आणि माध्यमिक शाळेत मंगळवारी सकाळी ११ ते दुपारी ४ या वेळेत हा उपक्रम राबविणार आहेत. तसेच साईनाथ मंडळ ट्रस्टचे अध्यक्ष पीयूष शहा आणि कार्यकर्ते मतदानविषयक जनजागृती करणार आहेत.
मोफत पेट्रोल दुपारपर्यंतच
शहरातील अधिकाधिक नागरिकांनी मतदानाचा हक्क बजावावा, यासाठी पुणे शहरातील पेट्रोल पंप डीलर असोसिएशन आणि क्रेडाईच्या वतीने मोफत पेट्रोल देण्याचा निर्णय घेण्यात आला आहे. आज, मंगळवारी (२१ फेब्रुवारीला) मतदान करणाऱ्यांचा लकी ड्रॉ काढण्यात येईल. त्यातील विजेत्यांना प्रत्येकी एक लिटर पेट्रोल मोफत दिले जाणार असून, दुपारी बारा वाजेपर्यंतच पेट्रोल दिले जाणार आहे. कोणत्या पेट्रोलपंपावर हे पेट्रोल मिळणार आहे, याची यादी मतदान प्रत्येक केंद्रांवर लावण्यात आली असल्याचे महापालिका प्रशासनाने कळविले आहे. मतदानाबाबत जनजागृती करण्यासाठी हा उपक्रम राबविला जात आहे. मंगळवारी शहरातील प्रत्येक मतदान केंद्रावर सर्वांत प्रथम मतदानासाठी आलेल्या शंभर पुरुष आणि शंभर मतदारांना केंद्राच्या बाहेर आल्यानंतर ‘स्क्रॅच कार्ड’ (कुपन्स) दिले जाणार आहे. या कुपन्समधील प्रत्येकी पाच कार्डावर मोफत एक लिटर पेट्रोल दिले जाणार आहे. प्रत्येक मतदान केंद्रावर अशा पद्धतीने दहा मतदारांना मोफत पेट्रोल दिले जाणार आहे. शहरातील ३४३१ केंद्रांवर ही सुविधा दिली जाणार आहे.
पोलिसांकडून चोख बंदोबस्त
पुणे आणि पिंपरी चिंचवड महापालिका निवडणुकीसाठी आज, मंगळवारी होत असलेल्या मतदानासाठी दहा हजार पोलिसांचा बंदोबस्त तैनात करण्यात आला आहे. संवेदनशील केंद्रांवर जादा बंदोबस्त ठेवण्यात आला असून, या ठिकाणी पोलिसांकडून विशेष लक्ष देण्यात येणार आहे. मतदान प्रक्रिया शांततेत पार पाडण्यासाठी पोलिसांकडून सर्व हालचालींवर बारीक लक्ष ठेवण्यात येत आहे.
गेल्या महापालिका निवडणुकीच्या तुलनेत यंदा मतदान केंद्र आणि मतदार संख्येमध्ये झालेली वाढ पाहता पोलिसांनी बंदोबस्तातही वाढ केली आहे. पुणे आणि पिंपरी चिंचवड महापालिकांसह जिल्हा परिषदेचाही काही भाग आयुक्तालयाच्या हद्दीत येतो. त्यादृष्टीने बंदोबस्ताची आखणी करण्यात आली आहे. सोमवारी सकाळी मतदान यंत्रांच्या वाटपापासून बंदोबस्त लावण्यात आला आहे. या बंदोबस्तावर स्वत: पोलिस आयुक्त रश्मी शुक्ला आणि सहआयुक्त सुनील रामानंद लक्ष ठेवून आहेत.
उपायुक्त, सहायक आयुक्त, पोलिस निरीक्षक, सहायक तसेच उपनिरीक्षक बंदोबस्तामध्ये असणार आहे. शहर पोलिसांसोबतच गृहरक्षक दलाचे जवान, राज्य राखीव दलाच्या तुकड्या, दंगल नियंत्रण पथक, बॉम्बशोधक आणि नाशक पथक, शीघ्र कृती दलाची पथके बंदोबस्तामध्ये तैनात करण्यात आली आहेत. सहायक आयुक्त आणि त्यावरील दर्जाच्या अधिकाऱ्यांची स्ट्रायकिंग फोर्स तयार करण्यात आली आहे. यासोबतच भरारी पथकांमार्फत हालचालींवर बारीक लक्ष ठेवण्यात येणार आहे. शहर पोलिसांतील साडेसहा हजार अधिकारी तसेच अडीच हजार कर्मचाऱ्यांसह अन्य जिल्ह्यांतूनही कुमक मागविण्यात आली आहे.
मोबाइल अॅप डाउनलोड करा आणि राहा अपडेट
