शिवजन्मस्थळाची आकर्षक सजावट असलेला जिजाऊ शहाजी राजे शिवज्योत रथ... एकापाठोपाठ येणारे सरदारांचे, मावळ्यांचे, वीर मातांचे स्फूर्ती देणारे ५१ स्वराज्य रथ... महाराणी ताराराणी शौर्य पथकातील ५१ रणरागिणींच्या मर्दानी खेळांची चित्तथरारक मानवंदना... ढोलताशांचा गजर अन् सनई चौघड्यांच्या सुरावटीने भारावलेल्या मंगलमय वातावरणात शिवभक्तांनी छत्रपती शिवाजी महाराजांचा जयघोष केला. पुणेकरांना या मिरवणुकीमुळे पुन्हा एकदा शिवकाल अनुभवायला मिळाला.
निमित्त होते, शिवजयंती महोत्सव समितीतर्फे आयोजित केलेल्या शिवजन्मोत्सव स्वराज्य रथ सोहळा या भव्य मिरवणुकीचे. माजी राष्ट्रपती प्रतिभा पाटील, करवीर संस्थानाचे युवराज शहाजीराजे संभाजीराजे छत्रपती, संग्राम चौगुले, अमित गायकवाड; तसेच समितीच्या महिला सदस्यांच्या हस्ते लाल महालातील जिजाऊंच्या पुतळ्याला पुष्पहार घालण्यात आला. शहाजी राजे आणि जिजाऊ रथावरील शिवज्योतीचे प्रज्वलन करून मिरवणुकीला सुरुवात झाली. या वेळी समितीचे संस्थापक अध्यक्ष अमित गायकवाड, पोलिस उपायुक्त सुधीर हिरेमठ, अतिरिक्त आयुक्त राजेंद्र जगताप, अॅड. प्रताप परदेशी, परागमामा मते, प्रवीण परदेशी आदी उपस्थित होते.
मिरवणुकीचे यंदा पाचवे वर्ष होते. मिरवणुकीमध्ये सरदार घराण्यातील वंशज आणि स्वराज्य घराण्यांचे रथ त्यांचा गौरवशाली इतिहास सांगून सहभागी झाले होते. पाटील यांच्या रणरागिणींच्या महाराणी ताराराणी शौर्य पथकाचे उद्घाटन करण्यात आले. शिवगर्जना ढोलताशा पथकाच्या वादनाने उपस्थित नागरिकांना मंत्रमुग्ध केले. शिवगर्जना पथकाने मतदान करा, उद्याचे उज्ज्वल भविष्य घडवा, अशा फलकांद्वारे मतदान जनजागृती केली. शिवकालीन मर्दानी युद्धकलेची प्रात्यक्षिके कोल्हापूर आणि पुण्यातील नामांकित पथकांनी सादर केली. प्रभात बँड देखील मिरवणुकीत सहभागी झाला होता. तसेच, सरलष्कर हंबीरराव मोहिते, सरदार गोदाजी जगताप या पराक्रमी स्वराज्य सैनानींच्या पूर्णाकृती पुतळ्याचे उद्घाटन करण्यात आले.
गिरीश गायकवाड, दीपक घुले, सचिन पायगुडे, रवींद्र कंक, दत्ताभाऊ पासलकर आदींनी संयोजन केले. दरम्यान, एसएसपीएमएस शाळेच्या प्रांगणातील महाराजांच्या पुतळयावर हेलिकॉप्टरमधून पुष्पवृष्टी करण्यात आली. उपक्रमाचे यंदा सहावे वर्ष होते.
मोबाइल अॅप डाउनलोड करा आणि राहा अपडेट
