म. टा. प्रतिनिधी, पुणे
शिक्षणहक्क कायद्यांतर्गत (आरटीई) प्रवेशासाठी असणाऱ्या राज्यातील खासगी शाळांची नोंदणी बुधवारी पूर्ण झाली. त्यामुळे आपल्या पाल्यांच्या प्रवेशासाठी इच्छुक असणाऱ्या राज्यातील पालकांना आज गुरुवारी ९ ते शनिवारी २५ फेब्रुवारीपर्यत प्रवेशासाठी ऑनलाइन अर्ज भरता येणार आहे, अशी माहिती प्राथमिक शिक्षण संचालक गोविंद नांदेडे यांनी बुधवारी दिली
‘आरटीई’च्या २०१७ - १८ या शैक्षणिक वर्षासाठी प्रवेश प्रक्रियेत सहभागी होणाऱ्या राज्यातील सर्व शाळांची नोंदणी बुधवारी पूर्ण झाली आहे. त्यामुळे पालकांना गुरुवारी दुपारी एक वाजल्यापासून www.student.maharashtra.gov.in या वेबसाइटवर ऑनलाइन प्रवेश अर्ज उपलब्ध झाले आहेत. त्यासाठी पालकांना प्रथम वेबसाइटवर जाऊन ऑनलाइन नोंदणी करणे आवश्यक आहे. नोंदणी केल्यानंतर पालकांना पाल्याची माहिती भरायची आहे, अशी माहिती नांदेडे यांनी दिली आहे. या वेबसाइटवर पालकांसाठी मदत केंद्रांची यादी आणि अर्जाला लागणाऱ्या कागदपत्रांची यादी दिली आहे. या वेबसाइटवर केवळ नोंदणी करून अर्ज भरायचा असून, कोणत्याही प्रकारचे कागदपत्रे जोडायची नाहीत अशी माहिती शिक्षणाधिकारी (प्राथमिक) मुश्ताक शेख यांनी दिली.
नांदेडे यांनी पालकांना आवश्यक त्याप्रमाणात प्रवेशप्रक्रियेबाबत मदत करण्याच्या सूचना राज्यातील सर्व जिल्हा परिषदेच्या शिक्षणाधिकाऱ्यांना दिल्या आहेत. त्यांना जिल्ह्यातील मदत केंद्रांची माहिती मिळण्यासाठी आवश्यक त्या उपाययोजना करण्याबाबत सांगितले आहे. प्रवेश प्रक्रियेत पालकांना कोणत्याच प्रकारची अडचण निर्माण होणार नाही याची काळजी घेण्याचे आणि प्रत्येक अर्जाच्या नोंदी तपासण्याच्या सूचना देखील शिक्षणाधिकाऱ्यांना दिल्या आहेत.
००००
गुरुवारी (९ फेब्रुवारी) दुपारी एक वाजल्यापासून www.student.maharashtra.gov.in या वेबसाइटवर आरटीईसाठीचे प्रवेश अर्ज उपलब्ध झाले आहेत. त्यावर ऑनलाइन नोंदणी करणे आवश्यक आहे. येथे कोणतीही कागदपत्रे जोडायची नाहीत.
- मुश्ताक शेख, माहिती शिक्षणाधिकारी (प्राथमिक)
मोबाइल अॅप डाउनलोड करा आणि राहा अपडेट