म. टा. प्रतिनिधी, पुणे
शिवसेनाप्रमुख बाळासाहेब ठाकरे आरोग्य कवच योजनेअंतर्गत केशरी रंगाची शिधापत्रिका असणाऱ्यांना मोफत आरोग्य सेवा, झोपडपट्टीवासियांना सेवा शुल्क माफी, ज्येष्ठ नागरिकांना मोफत औषधोपचार, पीएमपीचा टप्प्या टप्प्याने मोफत प्रवास.., आदी गोष्टींची आश्वासने शिवसेनेच्या जाहीरनाम्यात देण्यात आली आहेत.
शिवसेनेचे नेते खासदार विनायक राऊत यांनी बुधवारी शहर शिवसेनेचा वचननामा प्रसिद्ध केला. राज्यमंत्री विजय शिवतरे, माजी मंत्री व शिवसेनेचे उपनेते शशिकांत सुतार, संपर्कप्रमुख डॉ. अमोल कोल्हे, शहरप्रमुख विनायक निम्हण, डॉ. नीलम गोऱ्हे, निर्मला केंढे, रमेश बोडके, सचिन तावरे आदी या वेळी उपस्थित होते.
राष्ट्रवादी काँग्रेस पक्ष व काँग्रेसच्या गेल्या पंधरा वर्षांच्या सत्तेत शहर विकासाबाबत पुढे गेलेच नाही. तर, केंद्रात आणि राज्यात सत्तेत असलेल्या भारतीय जनता पक्षाने पुण्यातील मोठ्या कंपन्या नागपूर व विदर्भात नेल्या आहेत. त्यामुळे येथे नवीन रोजगार निर्मितीला खिळ बसली आहे. हा संपूर्ण अनुशेष आम्ही महापालिकेत स्वबळावर सत्तेत आल्यानंतर भरून काढू, असे आश्वासन शिवसेनेने दिले. येत्या पाच वर्षांत विकास हाच मुद्दा केंद्रस्थानी ठेवून शिवसेना वाटचाल करणार असल्याचे निम्हण यांनी या वेळी स्पष्ट केले.
वचननाम्यात नमूद केलेल्या सर्व गोष्टींच्या अंमलबजावणीसाठी पाच वर्षांत ३५ हजार कोटी रुपयांचा निधी आवश्यक आहे. हा निधी कसा उभारायचा याचे नियोजन शिवसेनेकडे तयार आहे. सध्या ‘सीएसआर’च्या माध्यमातून मोठ्या कंपन्या सामाजिक उपक्रमांवर पैसे खर्च करतात. त्यामुळे या कंपन्यांचा विकासकार्यात सहभाग करून घेणे शक्य असल्याचे निम्हण यांनी सांगितले.
मोफत योजना राबविण्यासाठी निधीची गरज भासणार आहे. त्यासाठी खासगी सहभागातून आणि ‘जीएसटी’ लागू झाल्यानंतर राज्य व केंद्र सरकारच्या अनुदानातून आवश्यक निधी उभारू, असे आश्वासन डॉ. गोऱ्हे यांनी दिले.
वाहतुकीसाठी एकात्मिक विकास आराखडा
शहरातील वाहतुकीची समस्या जटील होत चालली आहे. त्यात सार्वजनिक वाहतुकीचा कणा असलेल्या पुणे महानगर परिवहन महामंडळाची अवस्था बिकट आहे. पीएमपीचा तोटा दर वर्षी वाढत आहे. येथील व्यवहारातही गैरप्रकार घडतात. त्यामुळे पीएमपीकडे विशेष लक्ष दिले जाणार आहे. नागरिकांना पीएमपीने प्रवासास प्रोत्साहन द्यावे, यासाठी मोफत बस प्रवास उपलब्ध करून दिला जाणार आहे. त्याची अंमलबजावणी टप्प्याटप्प्याने केली जाईल. यामध्ये पीएमपीवर आर्थिक बोजा पडू नये म्हणून, पीएमपीच्या मोकळ्या जागा, जाहिरातीचे होर्डिंग याचा व्यावसायिक वापर करून पैसा उभा करण्याचे नियोजन आहे.
शिवसेनेच्या वचननाम्यातील ठळक मुद्दे :
विकास आराखड्याची शंभर टक्के अंमलबजावणी
अंतर्गत रिंग रस्त्याची (एसचीएमटीआर) अल्पकाळात उभारणी करणार
सायकल शेअर योजना
झोपडपट्ट्यांचे पुनर्वसन व विकासासाठी स्वतंत्र कंपनीची स्थापना
मेट्रो प्रकल्पाची गतीने उभारणी करण्यासाठी पालिकेचा स्वतंत्र कक्ष
टेकड्यांचे संवर्धन करण्यासाठी ‘अॅक्शन टेकन कमिटी’
आठवडी बाजारातून रोजगार निर्मितीला प्राधान्य
विधानसभा मतदारसंघनिहाय ज्येष्ठांसाठी ‘डे केअर सेंटर’
संपूर्ण शहरात वाय-फाय इंटरनेट यंत्रणेसाठी विशेष प्रयत्न
कुस्ती तालमींच्या देखभालीसाठी आर्थिक साह्य
१५६ जागांवर निवडणूक
शिवसेना शहरात एकूण १५६ जागांवर निवडणूक लढवित आहे. त्यामध्ये १४९ जागांवर शिवसेनेचा आणि उर्वरित सात जागांवर शिवसेना पुरस्कृत उमेदवारांचा समावेश आहे. शहरातील अन्य कोणत्याही पक्षांच्या तुलनेत शिवसेनेने सर्वाधिक उमेदवार दिलेले आहेत. ही शिवसेनेची ताकद आहे, असा इशारा खासदार व शिवसेना नेते विनायक राऊत यांनी या वेळी दिला.
महापालिका निवडणुकीनंतर गरज पडो न पडो, शिवसेनेला सोबत घेणार, असे वक्तव्य पालकमंत्र्यांनी केले. शहरात भाजपची एकहाती सत्ता येणारच नाही. हे त्यांना चांगले माहीत आहे. आम्ही भाजपसोबत जाणार नाही, तर शिवसेना स्वबळावरच सत्ता काबीज करेल.
विनायक निम्हण, शहरप्रमुख, शिवसेना
‘पालिकेवर भगवा फडकवणार’
‘अंतर्गत कलहामुळे भारतीय जनता पक्ष मोडकळीला आला आहे. तर, बंडखोरीमुळे राष्ट्रवादी काँग्रेस पक्ष जेरीस आली आहे. त्यामुळे दोन्ही पक्ष आता भंगारात जाण्याची वेळ आली आहे,’ अशी टीका शिवसेनेने बुधवारी केली.
महापालिका निवडणुकीसाठी शिवसेनेने वचननामा प्रसिद्ध केला. त्या वेळी पत्रकार परिषदेत शिवसेनेने दोन्ही पक्षांवर निशाणा साधला. ‘महापालिकेवर शिवसेनेचा भगवा फडकविल्याशिवाय राहणार नाही,’ असा विश्वास या वेळी व्यक्त करण्यात आला. तसेच, ‘निवडणुकीनंतरही भाजपबरोबर जाणार नाही,’ असे पक्षाने स्पष्ट केले.
शिवसेनेला चांगले दिवस आहेत. त्यामुळे शहरात सर्वाधिक ठिकाणी शिवसेनेचे उमेदवार उमेदवार आहेत, असा दावा राऊत यांनी केला. निवडणुकीत सकारात्मक प्रचारावरच पक्षाचा भर राहणार असून प्रभागनिहाय आमचा विरोध असणार आहे, असे निम्हण यांनी स्पष्ट केले. ‘भाजपला गुंडांचे याड लागले आहे.’ त्यामुळे ते गुंडांना पक्षात प्रवेश देत आहेत. त्यांच्या या कृतीमुळे येत्या काळात राजकारण ‘सैराट’ होण्याची शक्यता आहे, असे मत डॉ. गोऱ्हे यांनी व्यक्त केले.
शिवसेनेच्या तिकीट वाटपात निष्ठावंत शिवसैनिकांना प्राधान्य देण्यात आले आहे. तिकिटासाठी स्पर्धा जास्त असल्याने काही ठिकाणी शिवसैनिकांनी अंसतोष व्यक्त केला. मात्र, अन्य पक्षातील केवळ १० इच्छुकांना उमेदवारी दिलेली आहे. या उलट भाजपमध्ये तिकीट वाटपावरून कार्यकर्त्यांचा उद्रेक झाल्याचे पाहायला मिळाले. पक्षाच्या शहराध्यक्षांच्या फोटोला काळे फासण्यात आले. राष्ट्रीय पक्षाचा टेंभा मिरवणाऱ्या पक्षाने क्षेत्रीय कार्यालयात घातलेला गोंधळ पुणेकरांनी पाहिला आहे. त्यामुळे पारदर्शकतेचा आग्रह धरणाऱ्यांनी प्रथम स्वत:चे आत्मपरीक्षण करावे,’ असा टोलाही डॉ. अमोल कोल्हे यांनी लगाविला.
‘स्वतःकडे आधी लक्ष द्या’
दोन दिवसांपूर्वी सिंहगडावर भाजपच्या प्रचाराचा शुभारंभ झाला. त्या वेळी पक्षाचे प्रदेशाध्यक्ष रावसाहेब दानवे यांनी शिवसेनेने शहराचे वातावरण प्रदूषित केल्याची टीका केली होती. त्यावर ‘स्वत:च्या बुडाखाली काय जळते आहे. त्याकडे त्यांनी आधी लक्ष द्यावे,’ असा सल्ला डॉ. अमोल कोल्हे यांनी दिला.
‘देशात भाजपची हिटलरशाही’
‘देशात व राज्यात भारतीय जनता पक्षाने हिटलरशाही आणली आहे. जनता त्याचा अनुभव घेत आहे. राष्ट्रवादीचा भ्रष्टाचार, काँग्रेसचा नाकर्तेपणा आणि भाजपचा खोटारडेपणा शिवसेनेनेच चव्हाट्यावर आणला आहे,’ असा आरोप शिवसेना नेते व खासदार विनायक राऊत यांनी बुधवारी केला.
शहर शिवसेनेच्या वतीने महापालिका निवडणुकीतील शिवसेना उमेदवारांच्या मेळाव्याचे आयोजन करण्यात आले होते.
राऊत म्हणाले, ‘युती तोडण्याच्या निर्णयामुळे संपूर्ण महाराष्ट्रात भगवा झंझावात निर्माण झाला आहे. आता राज्यात भाजपला भविष्य नाही. केवळ शिवसेनाच आपल्या मदतीला धावून येऊ शकते हा विश्वास प्रत्येकाच्या मनात निर्माण झाला आहे.’
‘प्रभागातील चारही उमेदवारांनी एकत्र प्रचार करावा. सोसायट्या आणि चाळींमध्ये कोपरा सभांवर भर देण्याची गरज आहे. नोटाबंदीने भाजपविरोधात निर्माण झालेला राग, नागरिक मतपेटीतून व्यक्त करावा यासाठी नागरीकांना आवाहन करा,’ अशी सूचना डॉ. कोल्हे यांनी केली. दरम्यान, भाजपचे नगरसेवक धनंजय जाधव, स्वीकृत नगरसेविका अश्विनी राऊत यांच्यासह अनेक कार्यकर्त्यांनी यावेळी शिवसेनेत प्रवेश केला.
मोबाइल अॅप डाउनलोड करा आणि राहा अपडेट
