म. टा. प्रतिनिधी, पुणे
पुणे महापालिकेवर झेंडा फडकवण्यासाठी आतूर झालेल्या भारतीय जनता पक्षाने सर्व उमेदवारांना सोमवारी ‘किल्ले सिंहगडा’वर नेऊन सुराज्याची भावनिक शपथ दिली. महापालिकेचा कारभार पारदर्शकतेने चालविण्याची ग्वाही देत, भ्रष्टाचारमुक्त, गतिमान आणि विकासाभिमुख कारभारातून सुराज्य निर्माण करण्याचा दावा या वेळी भाजपने केला.
पुणे महापालिका निवडणुकीच्या प्रचाराचा नारळ फोडण्यासाठी भाजपने हा आगळा-वेगळा उपक्रम घेतला. भाजपचे प्रदेशाध्यक्ष रावसाहेब दानवे यांनी सर्व उमेदवारांना पारदर्शकतेची शपथ दिली. पालकमंत्री गिरीश बापट, खासदार अनिल शिरोळे, खासदार संजय काकडे, शहराध्यक्ष योगेश गोगावले, संघटनमंत्री रवी भुसारी, आमदार माधुरी मिसाळ, भीमराव तापकीर, आमदार मेधा कुलकर्णी, आरपीआयचे नवनाथ कांबळे या वेळी उपस्थित होते.
मुंबईमध्ये रविवारी हुतात्मा स्मारक येथे सर्व उमेदवारांना शपथ देण्यात आल्यावर त्याच पद्धतीने पुण्यातील उमेदवारांना सिंहगडावर शपथ देण्यात आली. छत्रपती शिवाजी महाराजांचा बराच कालावधी पुण्यात गेला असल्याने मतदारांना भावनिक दृष्टीने जोडून घेण्यासाठी सनई-चौघडा व तुतारीच्या निनादात आणि छत्रपतींच्या जयजयकारात हा शपथ सोहळा घेण्यात आला. या वेळी, सिंहगडावरील चारही दरवाजांना सुराज्याचे तोरण बांधण्यात आले होते. तत्पूर्वी, गडावरील कोंडणेश्वर व अमृतेश्वर मंदिरात महाअभिषेक करण्यात आला. छत्रपती शिवाजी महाराज, नरवीर तानाजी मालुसरे यांची समाधी आणि राजाराम महाराजांच्या समाधीचे पूजन करण्यात आले.
‘केंद्र, राज्य आणि नगरपालिका निवडणुकीत भारतीय जनता पक्षाने सत्ता संपादन केली. त्याचप्रमाणे येणाऱ्या निवडणुकीतही पक्षाला बळ देण्यासाठी कार्यकर्त्यांनी झटून काम करावे, असे आवाहन दानवे यांनी केले.
केंद्र आणि राज्यातील सरकारने शहराच्या विकासाबाबत अनेक महत्त्वाचे निर्णय घेतले असून, त्याची अंमलबजावणी सुरू केली आहे. त्यामुळे, पुणेकरांच्या मनात विश्वासाची भावना निर्माण झाली आहे. कार्यकर्ता हा पक्षाचा आत्मा आहे व त्याला ताकद देणे हेच आमचे काम असल्याचे पालकमंत्री गिरीश बापट यांनी नमूद केले. खासदार शिरोळे, काकडे यांचीही या वेळी भाषणे झाली.
शिवसेनेची दखल घेणार नाही
‘राज्यातील महापालिका, जिल्हा परिषद आणि पंचायत समितीच्या निवडणुकांमध्ये आमचा सर्वांत मोठा शत्रू काँग्रेस-राष्ट्रवादी असल्याने शिवसेनेने कितीही टीका केली, तरी त्याची दखल घेणार नाही’, अशा शब्दांत भारतीय जनता पक्षाचे प्रदेशाध्यक्ष रावसाहेब दानवे यांनी स्पष्ट केले. भारतीय जनता पक्ष पारदर्शकतेच्या विचारावरच निवडणुकीला सामोरा जाणार असून, पुण्यातही आम्ही स्वबळावर यशस्वी होऊ, असा ठाम विश्वास त्यांनी व्यक्त केला.
महापालिकेच्या निवडणुकीसाठी भाजपच्या प्रचाराचा शुभारंभ सोमवारी सकाळी दानवे यांच्या उपस्थितीत सिंहगड किल्ल्यावर झाला. त्यानंतर झालेल्या पत्रकार परिषदेत शिवसेनेच्या टीकेला प्रत्युत्तरच देणार नाही, अशी भूमिका त्यांनी मांडली. ‘भाजपवर टीका करून शिवसेना वातावरण प्रदूषित करण्याचा प्रयत्न करीत आहे. परंतु, काँग्रेस-राष्ट्रवादी हेच आमचे मुख्य शत्रू आहेत. शिवसेनेच्या टीकेवर, त्यांच्या प्रचारावर प्रतिक्रिया देण्यापेक्षा केंद्र-राज्यातील भाजप सरकारच्या कामाच्या माध्यमातून आम्ही जनतेसमोर जाऊ’, असे दानवे यांनी नमूद केले. महापालिका आणि इतर निवडणुकांमध्ये शिवसेनेकडून अनेक प्रश्न विचारले जात असून, त्याची उत्तरे जनताच मतपेटीतून देईल, असा ठाम विश्वास व्यक्त करत नगर पंचायतीच्या निवडणुकांप्रमाणे या निवडणुकांनंतरही राज्यभरात भाजपच पहिल्या क्रमांकाचा पक्ष म्हणून पुढे येईल, अशी टिप्पणी त्यांनी केली.
तिकिटासाठी निधी घेतला नाही
भारतीय जनता पक्षाच्या तिकिटांसाठी पुणे आणि नाशिक महापालिकेमध्ये प्रत्येकी दोन लाख रुपये घेतल्याच्या आरोपांचे दानवे यांनी खंडन केले. शहरातील उमेदवारांना दहा लाख रुपयांपर्यंत खर्च करता येणार असून, त्यांचा खर्च मर्यादेबाहेर जाऊ नये, यासाठी पक्षातर्फे सर्व उमेदवारांच्या प्रचारार्थ प्रत्येकी दोन लाख रुपये गोळा केले जात आहेत. पक्षातर्फे केल्या जाणाऱ्या प्रचारासाठी हा निधी वापरला जाणार असल्याचेही त्यांनी सांगितले.
पुण्यात कोणाची गरज नाही
पुण्यातील १६२ जागांपैकी १० जागा मित्रपक्ष आरपीआयला सोडण्यात आल्या असून, उर्वरित सर्व जागांवर पक्षाचे उमेदवार लढणार आहेत. पुण्यात पहिल्यांदाच सर्व ठिकाणी उमेदवार उभे करण्याची संधी मिळाली असून, त्याचा पक्षाला निश्चित फायदा होईल. पुणे महापालिकेच्या निवडणुकांनंतर आम्हाला दुसऱ्या कोणाचीही गरज पडणार नाही. स्बळावर पालिकेची सत्ता मिळवू, असा ठाम विश्वास दानवे यांनी व्यक्त केला.
यंदाच्या निवडणुकीत पक्षाकडून अनेक उमेदवार इच्छुक होते. त्यामुळे, प्रत्येकाला तिकीट देता येणे शक्य नाही. त्यामुळे, काही जणांमध्ये असंतोष निर्माण झाला असेल, तर पक्ष त्यांच्याकडे निश्चित लक्ष देईल.
रावसाहेब दानवे, प्रदेशाध्यक्ष, भाजप
टोल न देताच कार्यकर्ते गडावर
पारदर्शकेच्या कारभाराचा प्रचार करणाऱ्या भारतीय जनता पक्षाच्या बहुतांश कार्यकर्त्यांनी रविवारी सकाळी सिंहगडावर जाताना तेथील यंत्रणेला कुठलीही माहिती दिली नाही आणि तेथील टोलही भरला नाही. सामान्य नागरिकांना गडावर जाताना टोल भरावा लागतो. सिंहगडावर जाण्याच्या रस्त्याच्या टोलनाक्यापाशी सोमवारी सकाळी सहा वाजताच झेंडेधारी स्वयंसेवकांच्या गाड्यांच्या रांगा लागल्या. त्यामुळे तेथील वन कर्मचाऱ्यांचा गोंधळ उडाला. भाजपचे झेंडे घेऊन ही मंडळी नेमकी कशासाठी गडावर जात आहेत, याची माहिती देणे तर दूरच कार्यकर्त्यांनी टोल देण्यासही टाळाटाळ केली. बहुतांश कार्यकर्ते टोल न देताच सुसाट वेगात घाट रस्त्यावर निघून गेले. सिंहगड हा वन विभागाच्या हद्दीत असल्याने संयोजकांनी वनाधिकाऱ्यांना पूर्व कल्पना देणे आवश्यक होते, अशी माहिती वनाधिकाऱ्यांनी दिली. भाजपचा हाच का पारदर्शकेचा कारभार, अशी चर्चा या ठिकाणी स्थानिकांत रंगली होती.
मोबाइल अॅप डाउनलोड करा आणि राहा अपडेट
