म. टा. प्रतिनिधी, पुणे
भारतीय आणि आंतरराष्ट्रीय नाट्यपरंपरेचा मेळ साधणारा आणि नाट्य रसिकांसाठी मेजवानी ठरणारा ‘भारत रंग महोत्सव’ यंदा पुण्यात रंगणार आहे. दिल्लीच्या ‘नॅशनल स्कूल ऑफ ड्रामा’तर्फे आयोजित हा महोत्सव ९ ते १४ फेब्रुवारी दरम्यान सायंकाळी ७.३० ते ९.३० या वेळेत अण्णा भाऊ साठे रंगमंदिरात पार पडणार आहे. या निमित्ताने पुणेकर रसिकांना भारतीय आणि विदेशी कलाविष्कार अनुभवता येणार आहे.
महोत्सवाची सुरुवात आसामच्या ‘हंसिनी’ या नाटकाने होणार आहे. आसाममधील प्रसिद्ध नाट्यकलाकार बहारूल इस्लाम यांनी या नाटकाचे दिग्दर्शन केले असून, प्रसिद्ध नाटककार चेकाॅव यांनी या नाटकाचे लेखन केले आहे. महोत्सवाच्या दुसऱ्या दिवशी नेपाळमधील ‘अॅना इन द ट्रॉपिक’ हे नाटक सादर केले जाणार आहे. क्युबा येथील प्रसिद्ध असलेल्या सिगारच्या व्यवसायावर हे नाटक आधारलेले आहे. महोत्सवाचे तिसरे सत्र मुंबईच्या सुनील शानबाग दिग्दर्शित ‘लॉरेटा’ या नाटकाच्या सादरीकरणाने रंगणार आहे. इंग्रजी आणि काेकणी भाषेत हा गोवन लोकनाट्याचा प्रकार सादर होणार आहे.
महोत्सवाचे उद्घाटन नॅशनल स्कूल ऑफ ड्रामाचे माजी संचालक रामगोपाल बजाज, ज्येष्ठ लेखक सतीश आळेकर, राज्याच्या सांस्कृतिक कार्य संचलनालयाचे संचालक संजय पाटील यांच्या हस्ते करण्यात येणार आहे. महोत्सवाच्या देणगी प्रवेशिका लवकरच बालगंधर्व रंगमंदिर, यशवंतराव चव्हाण नाट्यगृह आणि अण्णा भाऊ साठे सभागृह येथे उपलब्ध केल्या जाणार आहेत.
मोबाइल अॅप डाउनलोड करा आणि राहा अपडेट
