म. टा. प्रतिनिधी, पुणे
मतदारांना मतदानाचा हक्क बजाविता यावा, यासाठी निवडणूक आयोगाने मतदार यादी सुटसुटीत करण्याच्या सूचना केल्या आहेत. सूचनेची काटेकोर अंमलबजावणी करून अंतिम मतदार यादी तयार केल्याचा दावा पालिका प्रशासनाकडून करण्यात येत आहे. तरीही मतदार यादीत नाव शोधताना नागरिकांना मनस्ताप सहन करावा लागत आहे. पालिकेने तयार केलेल्या मतदार यादीमध्ये ‘सर्च’ ची सुविधा नसल्याने मतदारांची नावे शोधताना तारांबळ उडत आहे.
महापालिकेसाठी २१ फेब्रुवारीला मतदान होणार आहे. त्यासाठी पालिकेने नुकतीच अंतिम मतदार यादी प्रसिद्ध केली. मात्र, यादीमध्ये नाव शोधण्यासाठी सर्चची सुविधा उपलब्ध नसल्याने नाव सापडत नसल्याच्या तक्रारी नागरिकांकडून करण्यात येत आहेत. महापालिकेने यापूर्वी प्रसिद्ध केलेल्या प्रारूप मतदारयादीत नाव सापडत होते; पण अंतिम यादीत मात्र नाव सापडत नसल्याने मतदार हैराण झाले आहेत. प्रारूप मतदार यादीवर नागरिकांकडून प्रशासनाने हकरती आणि सूचना मागविल्या होत्या. बहुतांश हरकती नावात, तसेच पत्ता बदलाच्या असल्याने दुरुस्ती केल्याचे प्रशासनाने जाहीर केले.
पालिकेने प्रभागनिहाय प्रसिद्ध केलेल्या अंतिम मतदारयादीत नावच सापडत नसल्याने नागरिकांनी सावकरकर भवन येथे सुरू केलेल्या निवडणूक कार्यालयात विचारणा केली. मात्र, प्रशासनाकडून समाधानकारक उत्तर दिले जात नसल्याच्या तक्रारी करण्यात येत आहेत. अधिकाधिक नागरिकांनी मतदानाचा हक्क बजावावा, यासाठी निवडणूक आयोगातर्फे जनजागृती करण्यात येत आहे. त्यासाठी मोठा खर्चही केला जात आहे. मात्र पालिकेचे अधिकारी उडवाउडवीची उत्तरे देत असतील तर, कोणाकडे दाद मागायची असा प्रश्नही विचारला जात आहे. पालिकेने प्रसिद्ध केलेल्या प्रारूप यादीत ३१,५७२व्या क्रमांकावर असणारे नाव अंतिम यादीत ३५,७५४व्या क्रमांकावर गेले आहे. यादीची तपासणी केल्यानंतर संबंधित नाव चार हजार क्रमांकाने पुढे गेल्याचे लक्षात आले.
मोबाइल अॅप डाउनलोड करा आणि राहा अपडेट