एकतिसावी पुणे आंतरराष्ट्रीय मॅरेथॉन रविवारी
म. टा. प्रतिनिधी, पुणे
भारतीय मॅरेथॉनची जन्मभूमी असलेल्या पुण्यात रविवारी एकतिसावी पुणे आंतरराष्ट्रीय मॅरेथॉन होत असून, या मॅरेथॉनमध्ये शंभरहून अधिक परदेशी धावपटू कौशल्य पणाला लावणार आहेत. पुणे मॅरेथॉनवर आफ्रिकन धावपटूंचेच वर्चस्व राहिले असून, या वेळी केनियन, की इथिओपियन धावपटू बाजी मारणार, याबाबत औत्सुक्य वाढले आहे.
दर वर्षी डिसेंबरच्या पहिल्या आठवड्यात होणारी ही मॅरेथॉन या वेळी ‘नोटाबंदी’च्या निर्णयामुळे पुढे ढकलण्यात आली होती. ही मॅरेथॉन आता रविवारी होत आहे. २०००मध्ये ही स्पर्धा जानेवारीत झाली होती. त्यानंतर प्रथमच पुणे मॅरेथॉन जानेवारी महिन्यात होत आहे. या वेळी मार्गही बदलण्यात आला आहे. या वेळी खंडूजीबाबा चौकाऐवजी सारसबागेजवळील दिवंगत शिवसेनाप्रमुख बाळासाहेब ठाकरे कलादालनापासून मॅरेथॉनला प्रारंभ होणार आहे आणि तेथीलच सणस क्रीडांगणावर समारोप होणार आहे. पूर्ण मॅरेथॉनमध्ये केनियाच्या विल्यम किप्रोनो यिगॉनला अग्रमानांकन देण्यात आले आहे. त्याची दोन तास १० मिनिटे व २१ सेकंद ही वैयक्तिक सर्वोत्तम वेळ आहे. त्यापाठोपाठ हाबतामू तेसेमा (२ ता. १२ मि. १३ से.), अहमद शमिल वोर्कू (२ ता. १२ मि. १३ से.), केनइ इफा बालडा (२ ता. १२ मि. १३ से.), उर्गेसा केदीर फिगा, डेमा डाबा बिकिला, देरेजे तादेसे, सबोका लेमा, अबयोत गिर्मा, तेफेरी वोडाजो, तेफेरे यादेता, गुदेता तामराट श्फिरा, रेगे डेरसू (इथिओपिया), सिमन किप्रुगट किरुई, फ्रान्सिस किओको एन्झियोकी (केनिया) या आफ्रिकन धावपटूंची वैयक्तिक सर्वोत्तम वेळ दोन तास १५ मिनिटांपेक्षा कमी आहे. पूर्ण मॅरेथॉनला (४२.१९५ किमी) पहाटे साडेपाचला प्रारंभ होणार असल्याने, धावपटूंसाठी अनुकूल थंड हवामान असणार आहे. त्यामुळे या वेळी मॅरेथॉनमध्ये विक्रमी वेळ नोंदली जाणार का, याबाबत उत्सुकता आहे. २०१२मध्ये दोन तास १३ मिनिटे व तीन सेकंद वेळेचा विक्रम नोंदवत केनियाच्या ल्युका किप्केम्बोई चेलिमोने पुणे मॅरेथॉन जिंकली होती. तो विक्रम आतापर्यंत अबाधित आहे.
भारताची भिस्त आर्मी स्पोर्ट सेंटरच्या जी. बी. पटले, परमजित सिंग आणि खडकीच्या बॉम्बे इंजिनीअरिंग ग्रुपमधील किशोर गव्हाणे, अभिमन्यू पवार यांच्यावर असेल.
‘मॅरेथॉनमध्ये एकूण ३५ लाख रुपयांची पारितोषिके दिली जाणार आहेत. मॅरेथॉन तांत्रिकदृष्ट्या संपूर्ण अत्याधुनिक असणार आहे. ४२ किलोमीटर अंतरात पाच ठिकाणी कॅमेऱ्याद्वारे, ‘चिप’द्वारे वेळेची नोंदणी होणार आहे. तसेच, डॉ. राजेंद्र जगताप यांच्या नेतृत्वाखाली सातशे सदस्यांचे वैद्यकीय पथक काम पाहणार आहे. मॅरेथॉन मार्गावर वीस अॅम्ब्युलन्स असणार आहेत,’ अशी माहिती स्पर्धा संचालक प्रल्हाद सावंत यांनी दिली.
पुरुषांच्या अर्धमॅरेथॉनमध्ये इथिओपियाच्या वुबेट यितायाल अडामूला अग्रमानांकन देण्यात आले आहे. एक तास एक मिनिट व तीन सेकंद ही त्याची वैयक्तिक सर्वोत्तम वेळ आहे. त्यापाठोपाठ अॅडेम हारून हाजी (१ ता. ०१ मि. ०३), गॅफिए अॅबे रॉबसो, शिब्रु, तेस्फा (इथिओपिया), टम सेइफू (केनिया) या धावपटूंची वैयक्तिक सर्वोत्तम वेळ एक तास दोन मिनिटांपेक्षा कमी आहे. त्यामुळे या २१ किलोमीटर अंतराच्या शर्यतीत या धावपटूंपैकी कोणी की अन्य कोण बाजी मारणार, याबाबत उत्सुकता आहे.
महिलांच्या अर्धमॅरेथॉनमध्ये इथिओपियाच्याच फेकाडू येशितिला इशेतेला अग्रमानांकन देण्यात आले आहे. तिची एक तास एक मिनिट व ३२ सेकंद ही वैयक्तिक सर्वोत्तम वेळ आहे. तिला या शर्यतीत विजेतेपदाची प्रबळ दावेदार मानली जात आहे. त्यापाठोपाठ अयांतू इशेते (एक ता. १२ मि. १३ से.) , सेर्कालेम बेलेते, त्सेहीनेश त्सेल, त्स्गा डीगेन या इथिओपियन धावपटूंची सर्वोत्तम वैयक्तिक वेळ एक तास १३ मिनिटांपेक्षा कमी आहे. त्यामुळे या शर्यतीत कोण बाजी मारणार, याबाबत औत्सुक्य आहे.
केनियन धावपटूंचा दबदबा…
पुणे मॅरेथॉनमधील पुरुषांच्या ४२.१९५ किलोमीटर अंतराच्या शर्यतीत केनियन धावपटूंचेच वर्चस्व राहिले आहे. केनियाच्या धावपटूंनी आतापर्यंत बारा वेळा ही शर्यत जिंकली आहे. त्यापाठोपाठ भारतीय धावपटूंनी सहा वेळा या शर्यतीत बाजी मारली आहे; मात्र १९९७मध्ये अभय सिंगने पुणे मॅरेथॉन जिंकली होती. त्यानंतर मात्र एकाही भारतीय धावपटूला ४२.१९५ किलोमीटर अंतराची शर्यत जिंकता आलेली नाही. इथिओपियाच्या धावपटूंनी चार वेळा, तर स्वीडनच्या धावपटूंनी दोन वेळा ही मॅरेथॉन जिंकली आहे. तसेच, टांझानिया, ऑस्ट्रेलिया, रशिया, मोरोक्को, श्रीलंका आणि बेल्जियमच्या धावपटूंनी प्रत्येकी एकदा ही शर्यत जिंकली आहे.
.....................
असा असेल मार्ग…
सारसबागेजवळील दिवंगत शिवसेनाप्रमुख बाळासाहेब ठाकरे कलादालनापासून पूर्ण मॅरेथॉनला प्रारंभ होईल. धावपटू बाजीराव रोड-शनिवारवाडा-पुणे महापालिका-सिमला ऑफिस-पोलिस ग्राउंड चौकमार्गे साखर संकुलातून आत अॅग्रिकल्चर कॉलेजमधून मुख्य द्वारातून पुन्हा पोलिस ग्राउंड चौकात येतील. तेथून ते सावित्रीबाई फुले पुणे विद्यापीठ-ब्रेमेन चौक-परिहार चौक-आयटीआय रोडमार्गे आयसर कॉलेजपर्यंत जातील. तेथून धावपटू डावीकडे बाणेर रोड-भारती विद्यापीठ इंग्लिश स्कूल-बालेवाडीमार्गे शिवछत्रपती क्रीडानगरीत जातील. तेथे एक फेरी मारून पुन्हा त्याच मार्गाने अॅग्रिकल्चर कॉलेज (पोलिस ग्राउंड चौक) आणि तेथून फर्ग्युसन रोडमार्गे डेक्कन-टिळक रोड मार्गे अभिनव चौकातून सणस क्रीडांगणावर या मॅरेथॉनचा समारोप होईल.
मोबाइल अॅप डाउनलोड करा आणि राहा अपडेट
