‘एमएसबीटीई’ने ‘महाबीटीई’ नावाचे मोबाइल अॅप तयार केले आहे. या अॅपद्वारे नुकतेच डिप्लोमाच्या हिवाळी परीक्षेचा संपूर्ण निकाल जाहीर करण्यात आला. या अॅपवर हा निकाल विनाअडथळा विद्यार्थ्यांना पाहणे शक्य झाले. या अॅपद्वारे ‘एमएसबीटीई’च्या शैक्षणिक कार्यक्रम आणि नियमावलींची माहिती देण्यात येणार आहे. देशात अशा प्रकारचा हा पहिलाच उपक्रम आहे, अशी माहिती ‘एमएसबीटीई’चे संचालक डॉ. अभय वाघ यांनी ‘मटा’ला दिली.
‘एमएसबीटीईद्वारे डिप्लोमाच्या परीक्षा वर्षातून दोन वेळेस घेण्यात येते. या परीक्षांसाठी राज्यातून हजारो विद्यार्थी बसतात. त्यामुळे निकाल जाहीर झाल्यानंतर तो पाहण्यासाठी सर्व जण वेबसाइट उघडतात. त्यामुळे बरेचदा सर्व्हरचा वेग कमी होतो आणि साइट उघडण्याचा वेग मंदावतो. परिणामी निकाल पाहण्यात अडथळे येतात. या सर्व अडचणींवर मात करण्यासाठी तसेच विद्यार्थी आणि पालकांना निकाल पाहण्याची उत्तम सुविधा निर्माण झाली आहे. ‘एमएसबीटीई’च्या डिप्लोमा परीक्षांचे निकाल यापुढे अॅपवर जाहीर होणार आहेत,’ अशी माहितीही त्यांनी दिली.
डॉ. वाघ म्हणाले, ‘या अॅपद्वारे निकाल पाहायचा असल्यास विद्यार्थ्यांना केवळ परीक्षा क्रमांक आणि एन्रोलमेंट क्रमांक टाकावा लागेल. त्यानंतर थोडक्यात आणि सविस्तर अशा दोन स्वरूपात निकाल पाहता येईल. ‘एमएसबीटीई’द्वारे वेळोवेळी परीक्षांची, शैक्षणिक कार्यक्रमांची आणि नव्या नियमाची माहिती प्रसिद्ध करण्यात येते. येत्या काही दिवसात या अॅपमुळे ही सर्व माहिती विद्यार्थ्यांना समजणार आहे. त्या माहितीबाबतचे ‘नोटिफिकेशन’ विद्यार्थ्यांना मोबाइलच्या स्क्रीनवर पाहायला मिळणार आहे. त्यामुळे विद्यार्थी ‘एमएमबीटीई’बाबतच्या प्रत्येक माहितीबाबत विद्यार्थी अपडेट राहतील.’
डाउनलोड विनामूल्य
या अॅपद्वारे ‘एमएससीआयटी’च्या परीक्षेचे निकाल येत्या काही दिवसात पाहता येणार आहे. विविध प्रकारच्या सरकारी आणि खासगी नोकऱ्या मिळवण्यासाठी त्यासाठी अॅपमध्ये ‘एमएससीआयटी’ नावाने एक वेगळा भाग करण्यात आला आहे. वर्षभरात १० ते १२ लाख सर्व वयोगटातील नागरिक ‘एमएससीआयटी’ची परीक्षा देतात. या अॅपमुळे परीक्षेचा निकाल काही क्षणात पाहता येईल. विद्यार्थ्यांना ‘गुगल प्ले स्टोअर’हून महाबीटीई (MAHABTE) हे अॅप विनामूल्य डाउनलोड करता येईल.
मोबाइल अॅप डाउनलोड करा आणि राहा अपडेट
