म. टा. प्रतिनिधी, पुणे
भारतीय जनता पक्ष आणि शिवसेनेच्या संभाव्य युतीसंदर्भात दोन्ही पक्षांकडून ‘वेट अँड वॉच’चे धोरण अवलंबले जात आहे. जागावाटपाचा निश्चित फॉर्म्युला काय असेल, पुढील चर्चा कधी होणार, कोणत्या जागा कोण लढवणार याबाबत अद्याप अनिश्चितता कायम असून, युतीचा अंतिम निर्णय कदाचित पुढील आठवड्यापर्यंत लांबणीवर पडू शकतो.
राज्यातील वरिष्ठ नेत्यांनी दिलेल्या आदेशानंतर भाजप-शिवसेनेच्या शहरातील प्रमुख पदाधिकाऱ्यांमध्ये सोमवारी रात्री चर्चेची पहिली फेरी झाली. यामध्ये, कोणताही निष्कर्ष निघाला नसला तरी सकारात्मक विचार केला जाईल असे स्पष्ट करण्यात आले. संख्याबळाची चर्चा पुढील टप्प्यात केली जाईल असेही दोन्ही पक्षांकडून सांगण्यात आले होते. त्यानंतर, गेल्या दोन दिवसांत त्याबाबत पुढील हालचाली होतील, अशी अपेक्षा भाजप-शिवसेनेच्या पदाधिकाऱ्यांना वाटत होती. मंगळवार आणि त्यापाठोपाठ बुधवारी भाजप-शिवसेनेच्या वरिष्ठ नेत्यांमध्ये पुन्हा बैठक होईल, असे संकेत देण्यात आले होते. त्यामुळे काहीतरी निर्णय होईल, अशी कार्यकर्त्यांची भावना होती.
विधानसभेच्या निवडणुकीनंतर परिस्थिती बदलली असल्याने सर्व आमदारांशी चर्चा करून प्रस्ताव देण्यात येईल, असे भाजपने शिवसेनेकडे स्पष्ट केले होते. पहिले पाऊल पुढे कोणी टाकायचे यावरून खल सुरू आहे. भाजपला गेल्या पालिका निवडणुकीपेक्षा अधिक जागा हव्या आहेत, तर शिवसेनेनेही जागांचा कोटा वाढवून द्यावा, अशी थेट मागणी केली आहे. युतीबाबत नेमका निर्णय होत नसल्याने स्थानिक स्तरावरील दोन्ही पक्षाच्या इच्छुकांमध्येही घालमेल वाढत चालली आहे. प्रभागामध्ये नेमक्या किती जागा मित्रपक्षाला दिल्या जाणार, त्या कोणत्या असतील, आपण तयारी केलेली जागा दिली तर काय होईल, यासारख्या अनेक प्रश्नांनी सध्या स्थानिक कार्यकर्ता हैराण झाला आहे. त्यातच दोन्ही पक्षांकडून सध्या ‘वेट अँड वॉच’ची भूमिका घेण्यात येत असल्याने कार्यकर्ता मात्र हवालदिल झाला आहे.
आठवड्याअखेरीस बैठक होणार?
भाजप-शिवसेनेची पहिली बैठक गेल्या सोमवारी झाल्यानंतर दोन-तीन दिवसांत पुन्हा चर्चा होईल, असे संकेत पालकमंत्री गिरीश बापट यांनी दिले होते. मंगळवार-बुधवारी परिस्थिती ‘जैसे थे’च होती, तर गुरुवारीही चर्चा होण्याची चिन्हे दिसत नाहीत. त्यामुळे, भाजपचे शहराध्यक्ष योगेश गोगावले आणि शिवसेनेचे शहरप्रमुख विनायक निम्हण यांच्यात कदाचित २० किंवा २१ जानेवारीला चर्चेची पुढील फेरी होईल, अशी शक्यता आहे.
मोबाइल अॅप डाउनलोड करा आणि राहा अपडेट