विधानसभेच्या जागांनुसार विभागणीचा भाजपचा आग्रह
म. टा. प्रतिनिधी, पुणे
महापालिका निवडणुकीसाठी भारतीय जनता पक्ष-शिवसेनेत झालेल्या प्राथमिक बैठकीत जागावाटपाच्या सूत्रावरूनच विसंवाद झाल्याचे समोर आले आहे. विधानसभा निवडणुकीच्या स्थितीनुसार जागांची विभागणी व्हावी, असा आग्रह भाजपने धरला होता. तर, गेल्या पालिका निवडणुकांतील स्थिती आणि पालिकेतील वाढलेली सदस्यसंख्या लक्षात घेऊन जागावाटप निश्चित केले जावे, असा आग्रह शिवसेनेने धरला आहे.
केंद्रात आणि राज्यात सत्ता प्राप्त केल्यानंतर भाजपला महापालिकेतही सत्तांतर घडवून आणायचे आहे. त्यासाठी, इतर पक्षांतील अनेक इच्छुकांना भाजपमध्ये प्रवेश देण्यात आला आहे. स्वबळावर निवडणूक लढवण्याची तयारी भाजपच्या कार्यकर्त्यांनीही केली आहे. तर, दुसरीकडे शिवसेनेकडूनही सर्व जागांसाठी मुलाखती घेण्यात आल्या होत्या. तरीही, युतीबाबत चर्चा करण्याचे संकेत राज्यातील वरिष्ठ नेत्यांनी दिल्याने सोमवारी रात्री उशिरा भाजप-सेनेच्या शहरातील प्रमुख नेत्यांमध्ये चर्चेची पहिली फेरी झाली. ही बैठक अर्ध्या तासाच्या आत संपली असली, तरी युतीसाठी सकारात्मक असल्याचे संकेत भाजपने दिले होते. प्रत्यक्षात, युतीची बोलणी विधानसभेच्या सूत्रानुसार व्हावीत, अशी प्रमुख अट भाजपने घातली असल्याचे समजते. विधानसभेच्या निवडणुकीत आठही विधानसभा मतदारसंघांमध्ये भाजपचे आमदार निवडून आल्याने अधिकच्या जागा मिळविण्यासाठी भाजपचा प्रयत्न सुरू आहे. गेल्या वेळी १५२ पैकी ९० जागा भाजपच्या वाट्याला आल्या होत्या. यंदा, कार्यकर्त्यांमधील उत्साह, बाहेरून पक्षात झालेले प्रवेश आणि केंद्र-राज्याच्या योजनांमुळे मतदारांची बदललेली मानसिकता यामुळे भाजपकडे इच्छुकांची सर्वाधिक संख्या आहे.
विधानसभेच्या आकडेवारीवर आधारित युती करायचा भाजपचा आग्रह कायम राहिल्यास त्याचा मोठा फटका शिवसेनेला बसण्याची भीती आहे. कारण, वडगावशेरीचा अपवाद वगळता इतर कोणत्याही मतदारसंघात शिवसेनेला समाधानकारक मते पडलेली नाहीत. म्हणूनच, गेल्या पालिका निवडणुकीच्या आधारावर आणि विद्यमान नगरसेवकांच्या संख्येनुसारच जागावाटप केले जावे, अशी भूमिका शिवसेनेने लावून धरली आहे.
प्रतीक्षा मुंबईतील निर्णयाची
राज्यात महापालिका निवडणुका होणाऱ्या बहुतेक ठिकाणी भाजप-शिवसेना यांच्यात युती करून लढण्याचा प्रस्ताव पुढे येत असला, तरी मुंबईत नेमका काय निर्णय घेतला जाणार, यावरच राज्याच्या इतर भागांतील युतीचे भवितव्य अवलंबून असल्याचे स्पष्ट संकेत देण्यात येत आहेत. युती झाली, तर संपूर्ण राज्यात अशी भूमिका शिवसेना पक्षप्रमुख उद्धव ठाकरे यांनी यापूर्वीच मांडली आहे. तर, भाजपनेही युतीसाठी सकारात्मक असल्याचे सांगितले होते. त्यामुळे, मुंबईतील तिढा मिटल्यावरच इतर सर्व ठिकाणी युतीबाबतची संभ्रमावस्था दूर होईल, अशी शक्यता आहे.
पालिकेसाठी सेनेची स्वबळाची तयारी
शिवसेना-भारतीय जनता पक्षात युतीबाबत झालेल्या बैठकीत शिवसेनेला अपेक्षित जागा देण्यावरून भाजपकडून सकारात्मक प्रतिसाद न मिळाल्याची चर्चा जोरात सुरू आहे. त्या पार्श्वभूमीवर शिवसेनेने स्वबळाची तयारी सुरू केली. पक्षाच्या शहरातील नेत्यांनी हडपसर आणि वडगावशेरी विधानसभा मतदार संघातील इच्छुकांच्या तयारीचा आढावा घेतला. येत्या काही दिवसांत उर्वरित विधानसभा मतदारसंघातील इच्छुकांच्या आढावा बैठका घेतल्या जाणार असल्याचे सूत्रांनी सांगितले.
सेना-भाजपच्या नेत्यांची सोमवारी एकत्रित बैठक झाली. या बैठकीत जागा वाटपाची सकारात्मक चर्चा झाल्याचे दोन्ही पक्षाच्या नेत्यांकडून सांगण्यात येत आहे. मात्र, सेनेच्या दृष्टिकोनातून चर्चा निष्फळ ठरली असून, विधानसभेच्या वेळचा अनुभव गाठीशी असल्याने सेनेने स्वबळाची तयारी सुरू केली आहे. त्यानुसार शहरातील नेत्यांनी कार्यकर्त्यांना तयारी ठेवण्याचे आदेश दिल्याचे सूत्रांनी सांगितले.
सेनेचे शहरप्रमुख विनायक निम्हण यांच्या अध्यक्षतेखाली मंगळवारी वडगावशेरी आणि हडपसर या दोन्ही विधानसभा मतदारसंघात येणाऱ्या सर्व प्रभागातील इच्छुकांच्या बैठका घेतल्या. या बैठकीत मतदार याद्यांची छाननी करणे, प्रचारात प्राधान्याने घ्यायवयाचे मुद्दे, प्रचार कसा करावा, प्रभागात लढत कशी राहील, उमेदवारी अर्ज कसा भरावा आदींची माहिती इच्छुकांना देण्यात आली.
दरम्यान, यंदा महापालिका निवडणुकीच्या आधी सर्वच पक्षातील विद्यमान नगरसेवकांसह पदाधिकाऱ्यांच्या इन्कमिंग-आउटगोइंगची जोरात चर्चा आहे. परंतु, सेना-भाजपमध्ये युती होणार म्हणून अन्य पक्षातून सेनेत येऊ पाहणाऱ्यांनीही ‘वेट अँड वॉच’ची भूमिका घेतली आहे.
मोबाइल अॅप डाउनलोड करा आणि राहा अपडेट
