‘चायनीज’ हा शब्द जरी उच्चारला तरी डोक्यात चायनीज वस्तूंपासून ते चीन नागरिकांपर्यंत अनेक विचार येतात. मात्र, त्याच वेळी पोटाची भूक भागवणारे लज्जतदार आणि चटपटीत चायनीज खाद्यपदार्थ आठवत नाहीत. बदलत्या काळात खवय्यांना चायनीज खाद्यपदार्थांनी लोकांना हळूहळू भुरळ घालायला सुरुवात केली आहे. त्यामुळेच काही वर्षांपूर्वी कॅम्प परिसरात मोजक्या ठिकाणी असणारी चायनीज हॉटेल शहारात विविध भागात विस्तारू लागली आहेत. याच कारणाने पौड फाटा ते कर्वेनगरच्या चौकापर्यत खवय्यांच्या जीभेचे चोचले पुरवणारी हॉटेल वाढली आहेत.
काही वर्षांपूर्वी शहरात चायनीज खाद्यपदार्थांचा आस्वाद घ्यायचा झाल्यास कॅम्प भागात अथवा काही ठराविक महागड्या हॉटेलमध्ये जाण्याशिवाय पर्याय नव्हता. मात्र, जसे जसे शहराचे विस्तारीकरण झाले आणि शहरात बाहेरून येणाऱ्यांची संख्या वाढली, तेव्हा पारंपरिक खाद्यपदार्थांबरोबर चायनीज खाद्यपदार्थांची रेलचेल वाढतच गेली. पौड फाट्याहून थोडे समोर गेल्यावर करिश्मा सोसायटीच्या चौकात मूनलाइट चायनीज, पिंटू सावजी, न्यू बीजींग, रिअल चायना गार्डन अशी एका रांगेत चायनीज खाद्यपदार्थांची हॉटेल आहेत. संध्याकाळी सात ते रात्री अकरा वाजेपर्यत खवय्यांची चायनीज खाद्यपदार्थांवर ताव मारण्यासाठी चांगलीच गर्दी असते. कित्येक वेळा तर ‘वेटिंग’त अनुभव खवय्यांना घ्यावा लागतो.
या हॉटेलांमध्ये व्हेज टॉम-यम , वॉन टॉन, कोरिएंडर गार्लिक, मंचाव, टोमॅटो, फ्रेंच ओनियम असे भरपूर व्हेज सूपचे प्रकार आहेत. तसेच नॉन-व्हेजमध्ये चिकन टोमॅटो, पालक, मंचाव, वॉनटॉन, मशरूम, क्लिअर, टोलोमेन असे चविष्ट सूप उपलब्ध आहेत. तसेच, चिकन मंच्युरियन, लॉलिपॉप, शेजवान, गार्लिक, चिली, हाँगकाँग, इन हुनन सॉस, चिकन चॉप्सी, अमेरिकन चॉप्सी, शेजवान चॉप्सी असे खमंग खाद्यपदार्थं खायला मिळतील. चायनीज म्हटल्यावर राइसचे प्रकार सोडून चालणार नाहीत. त्यामुळेच हक्का न्यूडल्स, अंडा व चिकन न्यूडल्स, जिंजर व गार्लिक न्यूडल्स, अंडा फ्राइड राइस, चिकन फ्राइड राइस, जिंजर राइस, पेकिंग राइस, ट्रिपल राइस, शेजवान ट्रिपल राइस असे कितीतरी पोटाची भूक भागवणारे प्रकार उपलब्ध आहेत. खवय्यांसाठी न्यूडल्स आणि स्टार्टर ग्रेव्हीसोबत तसेच ड्राय स्वरूपातही उपलब्ध आहेत.
कर्वे पुतळा ते यशवंतराव चव्हाण नाट्यगृहापर्यंत नव्यानेच दोन ते तीन ‘स्वस्तात मस्त’ अशी चायनीज हॉटेल झाली आहे. कॉलेजच्या विद्यार्थ्यांची या हॉटेलांवर मोठी गर्दी असते. कर्वे रस्त्यावर मयूर कॉलनीजवळ नव्यानेच गोल्डन ड्रॅगन नावाचे हॉटेल सुरू झाले आहे. गेल्या काही दिवसांपासून फॅमिलीसाठी आणि कॉलेजच्या युवक-युवतींनी हे हॉट डेस्टिनेशन झाले असून दिवसेंदिवस येथे खवय्यांची गर्दी वाढतच आहे. डॉ. बाबासाहेब आंबेडकर चौकात ओल्ड कांचनसोबत काही अंतरावर आणखी चायनीज हॉटेल नव्याने सुरू झाली असून संध्याकाळी सर्व वयोगटातील नागरिकांची तेथे गर्दी असते. या हॉटेलांमध्ये अंडा आणि चिकन फ्राइड राइस, चिकन शेजवान राइस, चिकन ६५ ला भरपूर मागणी असते.
मोबाइल अॅप डाउनलोड करा आणि राहा अपडेट
