म. टा. प्रतिनिधी, पुणे
आंबेगाव बुद्रुक येथील सिंहगड इन्स्टिट्यूटमधील पॉलिटेकनिक कॉलेजच्या विद्यार्थ्याने होस्टेलमध्ये गळफास घेऊन आत्महत्या केल्याची घटना बुधवारी रात्री उघडकीस आली. एका विषयात नापास झाल्याचे समजल्यानंतर त्याने हे टोकाचे पाऊल उचलल्याचे सांगण्यात येत आहे.
दरम्यान, विद्यार्थ्यांनी आत्महत्येचा प्रकार होस्टेलच्या वॉचमनला सांगितल्यानंतरही तो मोबाइलमध्ये गेम खेळण्यात रममाण होता. अखेर विद्यार्थ्यांनी आत्महत्याग्रस्त विद्यार्थ्याला रूममधून बाहेर काढून उपचारासाठी हॉस्पिटलमध्ये नेले होते. मात्र, त्याचा उपचारांपूर्वीच मृत्यू झाला होता, असा आरोप विद्यार्थ्यांनी केला आहे.
यश राहुल बोरोटे (वय १७, रा. आंबेगाव बुद्रूक, मूळ रा. मोशी) असे आत्महत्या केलेल्या विद्यार्थ्याचे नाव आहे. यश हा पॉलिटेकनिकच्या पहिल्या वर्षात शिकत होता. त्याला बुधवारी सायंकाळी सहाच्या दरम्यान रिझल्ट समजला होता. रिझल्ट समजल्यानंतर तो तत्काळ त्याच्या रूममध्ये परतला. त्याचे रूम पार्टनर रात्री आठच्या सुमारास जेवणासाठी निघाले असताना त्यांनी त्याला बरोबर येण्याविषयी विचारणा केली होती. मात्र, यशने आपल्याला फोन येणार असल्याचे सांगत त्यांच्याबरोबर जाणे टाळले होते.
त्याचे रूमपार्टनर साडेआठच्या सुमारास रूमकडे परतले होते. तेव्हा त्यांना रूमचा दरवाजा आतून बंद असल्याचे लक्षात आले. दरवाजा वाजवल्यानंतरही यशने प्रतिसाद न दिल्याने त्यांनी होस्टेलमधील इतर मुलांना त्याबाबत माहिती दिली. त्यातील एक जण भिंतीवर चढला आणि दरवाज्यावरील एका छोटाश्या फटीतून आत पाहिले असता यशने कपड्याच्या साह्याने फॅनला गळफास घेतल्याचे दिसले.
विद्यार्थ्यांनी तत्काळ दरवाजा तोडून आत प्रवेश केला. दरम्यान, इतर विद्यार्थ्यांनी तत्काळ अॅम्ब्युलन्स बोलावली तसेच होस्टेलमधील जबाबदारी व्यक्तींना घटनेची माहिती दिली. अॅम्ब्युलन्स पोहोचण्यासाठी वेळ लागत असल्याचे पाहून विद्यार्थ्यांनी यशला दुचाकीवरून हॉस्पिटलमध्ये नेले होते. मात्र, उपचारांपूर्वीच त्याचा मृत्यू झाला होता, अशी माहिती भारती विद्यापीठ पोलिसांनी दिली.
भारती विद्यापीठ पोलिसांनी या प्रकरणी अकस्मात मृत्यूची नोंद दाखल केली आहे. यश हा मोशी येथील राहणारा आहे. त्याचे वडील शेतकरी असून, आई गृहिणी आहे. होस्टेलच्या आवारात अॅम्ब्युलन्स ठेवण्याची मागणी विद्यार्थ्यांनी होस्टेल प्रशासनाकडे केली आहे.
मोबाइल अॅप डाउनलोड करा आणि राहा अपडेट
