म. टा. प्रतिनिधी, पुणे
पालिका निवडणुकीची आचारसंहिता जाहीर झाल्याने आता खऱ्या अर्थाने निवडणुकीला सुरुवात झाल्याचे स्पष्ट करून पक्षाचे काम तळागाळातील नागरिकांपर्यंत पोहोचविण्यासाठी वेगवेगळ्या पद्धतींचा अवलंब करण्याचा निर्णय राष्ट्रवादीने घेतला आहे. पुढील दोन दिवसांत पहिल्या टप्प्यात उमेदवारांची यादी जाहीर करण्याचा विचार केला जात आहे.
पालिकेच्या निवडणुकीला सामोरे जाताना गेली दहा वर्षे पालिकेत सत्ताधारी म्हणून काम करताना राष्ट्रवादीने केलेल्या कामांची माहिती मतदारांपर्यंत अधिक चांगल्या प्रकारे कशी पोहोचविता येईल, यासाठी पक्षाने नियोजन केले आहे. फेसबुक, व्हॉट्सअॅप, या सोशल मीडियाच्या माध्यमातून मतदारांपर्यंत पोहचण्यात येणार आहे. घरोघरी जाऊन गाठीभेटी घेऊन प्रचार करण्याबरोबरच जाहिराती, फ्लेक्स यांच्या माध्यमातून नागरिकांशी सुसंवाद साधण्याचे नियोजन पक्षाने केल्याचे शहराध्यक्षा खासदार वंदना चव्हाण यांनी सांगितले. पक्षाच्या उमेदवाराचा प्रचार योग्य पद्धतीने आणि योग्य दिशेने व्हावा, यासाठी प्रत्येक प्रभागासाठी वरिष्ठ पदाधिकाऱ्याची नेमणूक केली जाणार आहे. या पदाधिकाऱ्यावर जबाबदारी टाकली जाणार असून प्रचाराचे संपूर्ण नियोजन करण्याची जबाबदारी या पदाधिकाऱ्यावर असणार आहे.
आम्ही निवडणुकीसाठी जय्यत यंत्रणा उभी केली आहे. बूथरचना आणि जबाबदारीही निश्चित करण्यात आली आहे. गेल्या दहा वर्षांत शहरात केलेली विकासकामे जनतेपर्यंत पोहोचविण्यात येणार आहेत. प्रत्येक प्रभागाचे स्वतंत्र फेसबुक अकाउंट करण्यात आले आहे. उमेदवार जाहीर झाल्यावर थेट नागरिकांपर्यंत आणि सोशल मीडियामार्फत प्रचारयंत्रणा राबविण्यात येईल. तसेच, ज्येष्ठ सदस्यांना सहकारी उमेदवारांच्या प्रचाराचीही जबाबदारी देण्यात येईल.
खासदार वंदना चव्हाण, शहराध्यक्ष, राष्ट्रवादी
शिवसेनेच्या रणनीतीकडे लक्ष
देशात आणि राज्यात सत्तेचे वाटेकरी असले, तरी विरोधकाची धुरा सांभाळणारी शिवसेना आगामी महापालिका निवडणुकीत कसा डाव मांडणार याकडे सर्वांचेच लक्ष राहणार आहे. शिवसेना-भाजपच्या युतीवर अनेक गणिते अवलंबून असली तरी शिवसेनेने जोरदार तयारी करत भाजपसह सर्वांनाच टक्कर देण्यासाठी डरकाळी फोडली आहे.
शिवसेनेचे गतनिवडणुकीत १५ सदस्य निवडून आले होते. गेल्या विधानसभा, लोकसभेत भाजपला भरघोस यश मिळाल्याने शिवसेनेला काहीशी मगरळ आली होती. मात्र, स्थानिक नेत्यांवर विशेष जबाबदारी टाकण्याचा निर्णय पक्ष नेतृत्वाने घेतला. डॉ. अमोल कोल्हे यांच्यावर संपर्क प्रमुखपदाची जबाबदारी दिल्यानंतर त्यांनीही शिवसैनिकांना महापालिकेच्या रणसंग्रामाला चेतवले. जवळपास ७०० इच्छुक उमेदवारांनी मुलाखती दिल्या. प्रत्येक प्रभागात आणि विभागात उमेदवार असल्याचे लक्षात आल्यानंतर शिवसैनिकांमध्ये अंगात उत्साह संचारला आहे.
शिवसेनेची ताकत असलेल्या भागात जास्तीत जास्त नगरसेवक निवडून आणत महापालिकेत आपला दबाबगट निर्माण करण्याचा शिवसेनेचा प्रयत्न असणार आहे. मात्र, चारच्या प्रभागांमध्ये सक्षम उमेदवार देत निवडणुकीत रंगत आणण्यात शिवसेनेला कितपत यश मिळेल, याची उत्सुकता राहणार आहे.
प्रभाग रचना जाहीर झाल्यानंतर लगेचच शिवसेनेनी निवडणुकीची तयारी सुरू केली होती. इच्छुकांच्या मुलाखती घेण्यात आल्या. ज्या उमेदवारांना तिकिट मिळण्याची शक्यता अधिक आहे, अशा इच्छुकांना कल्पना देण्यात आली आहे. शिवसेनेने आठही विधानसभा मतदारसंघातील प्रभागनिहाय आढावा घेतला. प्रत्येक मतदारयादीनुसार यादी प्रमुखाची नेमणूक झाली असून इच्छुकांनी प्रचाराला सुरुवात केली आहे. इच्छुकांची प्रभागातील प्रचाराची पहिली फेरी पूर्ण होत आली आहे. शिवसेना या महिन्याच्या शेवटच्या आठवड्यात आपला जाहीरनामा प्रसिद्ध करेल.
विनायक निम्हण, शहरप्रमुख, शिवसेना
भाजपचा ‘रोडमॅप’ निश्चित
महापालिका निवडणुकांचा कार्यक्रम निश्चित झाल्याने यापुढील टप्प्यात बूथ रचना, प्रभागांचा जाहीरनामा आणि इतर उपक्रमांच्या माध्यमातून मतदारांपर्यंत पोहोचण्याचे उद्दिष्ट भारतीय जनता पक्षाने ठरवले आहे. विद्यमान नगरसेवकांपासून ते पदाधिकाऱ्यांपर्यंत पक्ष संघटनेतील प्रत्येकाची जबाबदारी निश्चित केली गेली असून, पुढील ४० दिवसांचा ‘रोडमॅप’ निश्चित केला गेला आहे.
पुणे महापालिकेच्या सार्वत्रिक निवडणुका २१ फेब्रुवारीला घेण्यात येणार आहेत. त्या दृष्टीने, पक्षातील सर्व इच्छुकांनी मोर्चेबांधणी सुरू केली होती. इच्छुकांची चाचपणी करण्यासाठी पक्षाने नुकताच चार दिवसांचा मुलाखतीचा कार्यक्रम घेतला. या चार दिवसांत तब्बल साडेआठशे जणांनी मुलाखती दिल्या आहेत. त्यामुळे, या पुढील टप्प्यात उमेदवार निश्चित करताना भाजपसमोरील आव्हान अधिक खडतर होण्याची शक्यता आहे. तरीही, निवडणुकांची तारीख निश्चित झाल्याने पुढील ४० दिवसांच्या कालावधीतील विविध टप्पे ठरविण्यात आले आहेत. त्याची सुरुवात येत्या रविवारी (१५ जानेवारी) होणाऱ्या बूथ प्रमुखांच्या कार्यक्रमाने होणार आहे. बूथ रचनेच्या दृष्टीने सर्वांना सविस्तर यादी तयार करण्याच्या सूचना देण्यात आल्या होत्या. त्या सर्वांकडून माहिती संकलित करून घेतली जाणार आहे, अशी माहिती शहराध्यक्ष योगेश गोगावले यांनी दिली. त्यापुढील टप्प्यात पक्षातर्फे करण्यात आलेल्या विविध संचलन समित्यांच्या बैठका घेण्यात येणार आहेत. सर्व विद्यमान नगरसेवकांची बैठक येत्या शुक्रवारी (१३ जानेवारी) होणार आहे. तर, त्यानंतर अंतिम जाहीरनामा करण्यासाठीच्या बैठकांनाही वेग येईल. शहरातील प्रतिष्ठित आणि विविध क्षेत्रातील तज्ज्ञ नागरिकांच्या सूचना संकलित करण्याचे कामही सुरू असल्याचे त्यांनी स्पष्ट केले.
प्रदेश कार्यकारिणीची आज बैठक
भाजपच्या प्रदेश कार्यकारिणीची महत्त्वाची बैठक आज, गुरुवारी ठाण्यात होणार आहे. पक्षाकडून नुकत्याच घेण्यात आलेल्या मुलाखतींच्या कार्यक्रमाची सविस्तर माहिती या बैठकीत वरिष्ठांना देण्यात येणार असून, निवडणूक अर्ज भरण्याचे वेळापत्रक जाहीर झाले असल्याने त्यादृष्टीने पुढील दिशा ठरवली जाणार असल्याचे संकेत शहराध्यक्ष गोगावले यांनी दिले.
‘मनसे’च्या आज बैठका
पक्षाचे अनेक नगरसेवक पक्षाला ‘जय महाराष्ट्र’ करीत असल्याच्या पार्श्वभूमीवर निवडणुकीची तारीख जाहीर झाल्यानंतर महाराष्ट्र नवनिर्माण सेनेच्या कार्यकर्त्यांमध्ये चैतन्य पसरले आहे. तरुण कार्यकर्त्यांच्या बळावर पक्षाने तयारीला सुरुवात केली आहे. आज (गुरुवारी) पक्षाच्या विभागवार बैठका होणार असून त्यामध्ये प्राथमिक नियोजनाला अंतिम रूप देण्यात येणार आहे.
निवडणूक आयोगाने बुधवारी राज्यातील निवडणुकांचा कार्यक्रम जाहीर केला. त्याचवेळी आचारसंहिताही लागू झाली. प्रत्यक्ष निवडणुकीला अजून ४० दिवस असले, तरी तारखा जाहीर झाल्याने खऱ्या अर्थाने निवडणुकांचे बिगुल वाजले आहे. या पार्श्वभूमीवर मनसेनेही नियोजनाला सुरुवात केली आहे. पक्षातर्फे ज्येष्ठ नेत्यांनी गेल्या आठवड्यातच इच्छुकांच्या मुलाखती घेतल्या असून काही उर्वरित मुलाखती येत्या तीन चार दिवसांत पार पडतील. निवडणुकीच्या प्रत्यक्ष तारखा जाहीर होण्यापूर्वीच पक्षाच्या इच्छुकांनी घरोघरी जाऊन प्रचार सुरू केला आहे. काही इच्छुक स्वतंत्रपणे तर काही एकत्रित प्रचार करत आहेत.
गुरुवारी दुपारनंतर पक्षातर्फे विभागावर बैठका घेण्यात येणार आहेत. त्यामध्ये सद्यस्थितीचा आढावा घेऊन पदाधिकाऱ्यांना तयारीविषयी मार्गदर्शन करण्यात येईल. वरिष्ठांशी संपर्क साधून प्रचाराचे नियोजन, कोपरा सभा, रॅली, मोठ्या सभा, रोड शो च्या तारखांची जुळवाजुळव आदी गोष्टींना सुरुवात होईल. मात्र, गुरुवारपासून पक्षाच्या सर्व शाखा जोमाने प्रचारात उतरतील, असे शहराध्यक्ष अजय शिंदे यांनी सांगितले.
यंग ब्रिगेड सक्रिय
पालिकेच्या गेल्या निवडणुकीत पक्षाचे २८ नगरसेवक निवडून आले होते. दरम्यान, विधानसभा निवडणुकीत पक्षाला दारूण पराभव स्वीकारावा लागला. या पार्श्वभूमीवर पक्षाच्या सात-आठ नगरसेवकांनी पक्षाला जय महाराष्ट्र केला. काही नगरसेवक पक्षांतरासाठी योग्य मुहूर्ताच्या शोधात आहेत. या पार्श्वभूमीवर पक्षातील कार्यकर्त्यांची यंग ब्रिगेड सक्रिय झाली आहे. गद्दारांना धडा शिकवायचाच, या निर्धाराने कार्यकर्ते प्रचारात उतरले आहेत.
काँग्रेससाठी निवडणूक आव्हानांची
पुणे महानगरपालिकेत सातत्याने सत्तेत राहिलेल्या काँग्रेससाठी या वेळची महापालिका निवडणूक आव्हान निर्माण करणारी आहे. पारंपारिक मतदार आणि तळागाळात पोहोचलेल्या काँग्रेसला गेल्या निवडणुकीतील आपली सदस्य संख्या कायम ठेवून त्यात वाढ करणे जमेल का, हे पाहणे उत्सुकतेचे ठरणार आहे.
काँग्रेसकडून महानगरपालिकेची सत्ता घेत राष्ट्रवादी काँग्रेसने २००७मध्ये पुणे शहरात आपले पाय रोवण्यास सुरुवात केली. गेली पंधरा वर्षे महानगरपालिकेमध्ये राष्ट्रवादीची सत्ता आहे. पुणे पॅटर्न, तर कधी काँग्रेसच्या मदतीने राष्ट्रवादीने आपली सत्ता राखली. आगामी महापालिका निवडणुकीत भाजपने आव्हान निर्माण केले असल्याने साहजिकच त्याचा फटका काँग्रेसलाही बसला आहे. काँग्रेसचे २८पैकी तीन नगरसेवक इतर पक्षांत दाखल झाले आहेत. त्यामुळे या निवडणुकीत काँग्रेस आपली गेल्या निवडणुकीत विजयी संख्या यावेळीही राखणार का? पक्षातील गटबाजी रोखून विरोधकांना चोख प्रत्युत्तर देण्यासाठी कसोशीने प्रयत्न करणार का, असा प्रश्न यानिमित्त उपस्थित झाला आहे.
काँग्रेसने गेल्या तीन-चार महिन्यांपासून निवडणुकांची जय्यत तयारी सुरू केली आहे. विधानसभा मतदारसंघ तसेच ब्लॉक कमिटींच्या अनुषंगाने मेळावे, बैठका घेतल्या आहेत. पक्षाचा जाहीरनामा अंतिम टप्प्यात असून लवकरच तो आम्ही प्रकाशित करू. आजी-माजी आमदारांनी इच्छुकांच्या मुलाखती घेतल्या असून आमची पहिली यादी आठवडाभरात जाहीर करण्यात येईल. मोदी सरकारच्या विरोधात जनमत तयार करण्यास काँग्रेस यशस्वी होत असून कार्यकर्ते मोठ्या उत्साहाने या निवडणुकीत उतरले आहेत.
रमेश बागवे, शहराध्यक्ष, काँग्रेस
मोबाइल अॅप डाउनलोड करा आणि राहा अपडेट
