म. टा. वृत्तसेवा, सासवड
‘पुरंदर हवेली विधानसभा मतदारसंघात राज्यमार्ग आणि प्रमुख जिल्हा मार्गाच्या कामांसाठी मी विक्रमी निधी आणला आहे. पहिल्या अर्थसंकल्पीय वर्षात १८ कोटींची कामे पुरंदर तालुक्यात पूर्ण झाली आहेत,’ अशी माहिती जलसंपदा राज्यमंत्री विजय शिवतारे यांनी दिली आहे.
कोडीत फाटा ते सासवड या दीड कोटी रुपये खर्चाच्या रस्त्याच्या कामाचा शुभारंभ सासवड येथे शिवतारे यांच्या हस्ते करण्यात आला. त्या वेळी ते बोलत होते. कोडीत फाट्यापासून डीवायएसपी कार्यालयापर्यंतच्या रस्त्याचे डांबरीकरण करण्यात येणार आहे. त्यापुढे हा रस्ता मोहिनी हॉटेलमार्गे जयप्रकाश चौकातून पुणे रस्त्याला मिळेल. संपूर्ण रस्त्याचे काँक्रिटीकरण होणार आहे, अशी माहिती त्यांनी दिली.
या वेळी पंचायत समिती सदस्य दिलीप यादव, माजी नगराध्यक्ष प्रमोद जगताप, मोहन वांढेकर, प्रदीप लांडगे, वामन जगताप, नगरसेवक दिपक टकले, सचिन भोंगळे आदी उपस्थित होते.
शिवतारे म्हणाले, ‘सरकारकडून मिळवलेल्या निधीतून सासवड-कोंढवा, सासवड-कापूरहोळ, सासवड-शिंदवणे, जेजुरी-भोरवाडी-कोळविहिरे असे अनेक रस्ते मार्गी लागले. चालू वर्षांत १९ कोटींची कामे सुरू आहेत. हडपसर-सासवड रस्त्यासाठी ४५ कोटी रुपये निधी मंजूर करून हे कामही पूर्ण करण्यात आलेले आहे. १६३ कोटींचा निधी मंजूर करून चार रस्त्यांची कामे नुकतीच हाती घेतली आहेत. हे चारही रस्ते सुरुवातीपासून शेवटपर्यंत चकाचक केले जातील.’
‘ग्रामीण मार्ग हे जिल्हा परिषद आणि पंचायत समितीच्या अखत्यारित असतात. तालुक्यातील ग्रामीण मार्ग सुधारण्यात येथील जिल्हा परिषद, पंचायत समिती अपयशी ठरली आहे. जिल्हा परिषद, पंचायत समितीची सत्ता शिवसेनेच्या हातात दिल्यास ग्रामीण मार्गांचेही भाग्य उजळेल,’ असेही त्यांनी सांगितले.
मोबाइल अॅप डाउनलोड करा आणि राहा अपडेट
