पोलिस आयुक्त रश्मी शुक्ला यांची माहिती; गंभीर गुन्ह्यांमध्ये घट
म. टा. प्रतिनिधी, पुणे
‘प्रतिबंधात्मक उपाययोजना केल्यामुळे पुणे पोलिस आयुक्तालयात गंभीर गुन्ह्यांमध्ये घट झाली आहे. मात्र, सायबर गुन्हे, बलात्कार, वाहनचोरी, फसवणूक या गुन्ह्यांत वाढ झाली आहे. वाहनचोरी ही पोलिसांपुढील डोकेदुखी ठरत असून त्यावर काम सुरू आहे. मात्र, पुणे पोलिसांच्या कामगिरीवर समाधानी आहे,’ अशी माहिती पुण्याच्या पोलिस आयुक्त रश्मी शुक्ला यांनी पत्रकार परिषदेत दिली.
पुणे पोलिस आयुक्तालयातील २०१६ च्या गुन्हेगारीची माहिती देण्यासाठी पत्रकार परिषदेचे आयोजन करण्यात आले होते. या वेळी सहपोलिस आयुक्त सुनील रामानंद, अतिरिक्त पोलिस आयुक्त शशिकांत शिंदे व इतर वरिष्ठ पोलिस अधिकारी उपस्थित होते. शुक्ला म्हणाल्या, ‘शहरात २०१६ मध्ये खुनाचे १३० गुन्हे घडले आहेत. त्यापैकी १२२ गुन्हे उघडकीस आले आहेत, तर खुनाच्या प्रयत्नाच्या गुन्ह्यांत सात टक्क्यांनी वाढ झाली आहे. क्षुल्लक कारणांवरून खुनाच्या प्रयत्नाच्या घटना घडल्याचे दिसून आले आहे. दरोडा, सोनसाखळी चोरी, जबरी चोरी, रात्री घरफोडी या गुन्ह्यांत घट झाली आहे. सदोष मनुष्यवध, नवविवाहितेचे मृत्यू, दिवसा घरफोडी, वाहनचोरी, पॉकेट चोरी, विश्वासघात, फसवणूक, दंगा, बलात्कार, एनडीपीएस गुन्ह्यांतही वाढ झाली आहे.’
‘गेल्या वर्षभरात पोलिसांनी ५० गुन्हेगारी टोळ्यांतील १६६ आरोपींना अटक केली; सोनसाखळी चोरी कमी करण्यातही यश आले असून यामध्ये ५७ टक्क्यांनी घट झाली आहे. अकरा टोळ्यांमधील १३७ आरोपींना अटक करत ७९ लाख ६९ हजार रुपयांचा मुद्देमाल जप्त करण्यात आला आहे. घरफोडीच्या १४ टोळ्या उघडकीस आणल्या आहेत. मोबाइल चोरणाऱ्या चार टोळ्यांमधील ५२ गुन्हेगारांना अटक करण्यात आली आहे; तसेच २५ गुन्हेगारांवर महाराष्ट्र प्रिव्हेन्शन डेंजरस अॅक्टीव्हीटीनुसार (एमपीडीए) कारवाई करण्यात आली आहे. दहा टोळ्यांवर महाराष्ट्र संघटित गुन्हेगारी प्रतिबंधक कायद्यानुसार (मोक्का) कारवाई केली आहे; तसेच आर्म अॅक्टचे ११३ गुन्हे दाखल करत १५० आरोपींना अटक केली आहे. त्यांच्याकडून १५९ पिस्तुल आणि ४०२ काडतुसे जप्त करण्यात आली आहेत,’ अशी माहितीही शुक्ला यांनी दिली.
सव्वा दोन कोटींचे अमली पदार्थ जप्त
पुणे पोलिस आयुक्तालयात अमली पदार्थविरोधी कायद्यानुसार ६३ गुन्हे दाखल करण्यात आले आहेत. यामध्ये ८१ आरोपींना अटक करण्यात आली आहे. वर्षभरात तब्बल दोन कोटी २५ लाख ६४ हजार रुपयांचे अमली पदार्थ जप्त करण्यात आले आहेत. २०१५ च्या तुलनेत गेल्या वर्षी कारवाईमध्ये सात टक्क्यांनी वाढ झाली आहे.
गुन्हेगारांना शिक्षा होण्याचे प्रमाण वाढले
शहरात गुन्हेगारांना शिक्षा होण्याच्या प्रमाणात दुपटीने वाढ झाली आहे. २०१५ मध्ये पुण्यात दाखल होणाऱ्या गुन्ह्यांत गुन्हेगारांना शिक्षा होण्याचे प्रमाण १५.८४ टक्के होते. मात्र, राज्य सरकार व पोलिसांकडून केलेल्या उपाययोजनांमध्ये वाढ झाली आहे. या वर्षी गुन्हेगारांना शिक्षा होण्याचे प्रमाण ३६ टक्क्यांवर गेले आहे.
गुन्हे शाखेपेक्षा पोलिस ठाणी सरस
पोलिस ठाण्यांना विविध कामे असतात. तरीही झोनच्या पोलिस उपायुक्तांकडून खूपच चांगली कामगिरी होत आहे. गुन्हे शाखा फक्त गुन्हे उघडकीस आणण्याचे काम करते. तरीही गुन्हे शाखेपेक्षा पोलिस ठाण्यांचे काम चांगले आहे. पोलिस ठाण्यांचे काम दिवसेंदिवस चांगले होत आहे. पोलिस ठाण्यांच्या कामगिरीवर समाधानी असल्याचे पोलिस आयुक्तांनी सांगितले.
वाहतूक सुधारणेत कमी
शहरातील वाहतूक सुधारणेत कमी पडत असल्याची कबुली पोलिस आयुक्तांनी दिली. नवीन वर्षात वाहतूक सुधारणेबरोबरच महापालिकेच्या निवडणुका भयमुक्त वातावरण व शांततेत पार पाडणे यावर लक्ष केंद्रीत करण्यात येणार आहे. पुण्यातील ३९ पोलिस ठाणी स्मार्ट करण्यासाठी प्रयत्न केले जाणार आहेत. जबरी चोरी व सोनसाखळी चोरीच्या गुन्ह्यांना आळा घालण्यावर लक्ष राहणार आहे. महिला व तरुणींच्या सुरक्षेला प्राधान्य देणे आमचे कर्तव्य आहे. नवीन वर्षात पेंडींग गुन्हे कमी करण्याचे प्रयत्न राहतील. सराईत गुन्हेगार, लॅन्डमाफिया यांच्यावर कठोर कारवाई केली जाईल. नवीन वर्षात कमी पडणार नसल्याची ग्वाही पोलिस आयुक्त रश्मी शुक्ला यांनी दिली.
मोबाइल अॅप डाउनलोड करा आणि राहा अपडेट