कोंढवा येथील बेकरीला शुक्रवारी पहाटे लागलेल्या आगीत, बेकरीतील पोटमाळ्यावर झोपलेल्या सहा कामगारांचा गुदमरून मृत्यू झाला. हे कामगार आत झोपले होते आणि बेकरीला बाहेरून कुलूप लावण्यात आले होते. आग लागल्यानंतर मृत्यू समोर दिसत असूनही कामगारांना जीव वाचविता आला नाही. अग्निशमन दलाच्या जवानांनी कामगारांचे मृतदेह बाहेर काढले त्या वेळी ते एकमेकांना मिठी मारलेल्या स्थितीत होते.
कोंढवा बुद्रुक येथे तालाब कंपनीजवळील ‘गगन अव्हेन्यू’ या उच्चभ्रू सोसायटीतील ‘बेक्स अँड केक्स’ या बेकरीत ही दुर्घटना घडली. ईर्शाद खान (वय २६), शानू अन्सारी (वय २२), जाकीर अन्सारी (वय २४), फहिम अन्सारी (वय २१), जुनेद अन्सारी (वय २५), जिशान अन्सारी (वय २१, सर्व मूळ रा. बिजनौर, उत्तर प्रदेश) या कामगारांचा मृत्यू झाला. ही बेकरी अब्दुल चिनीवाला, तैयब अन्सारी व मुनीर चिनीवाला यांच्या मालकीची आहे.
पोलिसांनी दिलेल्या माहितीनुसार, पहाटे साडेचारच्या सुमारास बेकरीशेजारील किराणा माल व्यावसायिकाला मोठ्या प्रमाणात धूर दिसून आल्यानंतर दुर्घटना घडल्याचे कळाले. त्याने चार वाजून ३८ मिनिटांना फायर ब्रिगेडला त्याची माहिती दिली. तसेच, त्या वेळी बेकरीच्या मालकाला देखील कळविण्यात आले. नंतरच्या दहा मिनिटांत फायर ब्रिगेडचा बंब आणि मालक दोघे दाखल झाले. त्यानंतर बेकरीचा दरवाजा उघडून आग आटोक्यात आणण्यात आली. पोटमाळ्यावर जाऊन जवानांनी कामगारांना बाहेर काढले. त्या वेळी ते बेशुद्धावस्थेत होते. त्यांना उपचारासाठी ससून रुग्णालयात हलविण्यात आले. मात्र, उपचारापूर्वीच त्यांचा मृत्यू झाला असल्याचे डॉक्टरांनी जाहीर केले. हे सर्व कामगार गेल्या एक ते दीड वर्षापासून येथे राहत होते, असे आसपासच्या व्यावसायिकांनी सांगितले.
कोंढवा बुद्रुक येथील ‘गगन अॅव्हेन्यू’ ही एक उच्चभ्रू हौसिंग सोसायटी आहे. ती कोंढवा खुर्द येथून खडीमशीन चौकाकडे जाणाऱ्यावर रस्त्यालगत असून, रस्त्याच्या बाजूला तळमजल्यावर बाहेरील बाजूस काही दुकाने आहेत. याच ठिकाणी अनेक दुकानांच्या मध्यभागी ही बेकरी होती. बेकरीच्या डाव्या बाजूस मेडिकल, किरणा मालाचे दुकान, तर उजवीकडे हॉटेल आहे. त्या बेकरीसह शेजारील दुकानांमध्येही कामगार राहत असल्याचे चौकशीअंती दिसून आले. बेकरीला लागलेल्या आगीमुळे शेजारील किंवा वरील बाजूस असलेल्या फ्लॅटचे नुकसान झाल्याचे दिसून आले नाही. मात्र, धुरामुळे बाजूच्या दुकानांमध्ये झोपलेल्या व्यक्तींना त्रास होऊ लागल्याने त्यांना जाग आल्याचे त्यांनी सांगितले.
दुर्घटनेची माहिती मिळताच शहराचे अतिरिक्त पोलिस आयुक्त शशिकांत शिंदे यांनी या ठिकाणी भेट देऊन पाहणी केली. तसेच, स्थानिक आमदार, माजी आमदार, नगरसेविका यांनीही या ठिकाणी येऊन घटनेची माहिती दिली. महावितरणच्या इलेक्ट्रिकल इन्स्पेक्टरसह त्यांच्या एक टीमने घटनास्थळी येऊन पाहणी केली. आगीचे नेमके कारण शोधण्याचा प्रयत्न केला.
मोबाइल अॅप डाउनलोड करा आणि राहा अपडेट
