पुणे-मुंबई ‘एक्स्प्रेस वे’वर मंगळवारी सकाळी सव्वाआठच्या सुमारास, खोपोली एक्झिटजवळील पुलाजवळ चार वाहनांच्या भीषण अपघातात चार जणांचा मृत्यू झाला असून, सहा जण गंभीर जखमी झाले आहे. अपघातग्रस्त वाहनांमध्ये दोन ट्रेलर, एक टेम्पो व एका चारचाकीचा समावेश आहे. अपघातामुळे मुंबईकडे जाणारी वाहतूक चार तास विस्कळित झाली होती.
बाळासाहेब वामन शिंदे (वय ४०, रा. फलटण, सातारा), संजय विठ्ठल पवार (वय ४०, रा. घणसोली, नवी मुंबई), राजेंद्र शंकरराव पाटणकर (वय ४१, रा. सावर्डे, चिपळूण, रत्नागिरी), ट्रेलर चालक नंदकिशोर रामधन माली (वय ४२, रा. राजस्थान) अशी अपघातात मृत्युमुखी पडलेल्यांची नावे आहेत. जखमींमध्ये भारत किसन मोरे (रा. सोनंद, सांगोला, सोलापूर), रामचंद्र रखमाजी जाधव (वय ५७, रा. पुणे), दत्तात्रय कानोबा शेजवळ (वय ५८, रा. मुळशी), नवनाथ वामन शिंदे, सागर व विष्णू (तिघेही राहणार फलटण, सातारा) यांचा समावेश आहे.
खोपोली पोलिसांनी दिलेल्या माहितीनुसार, पुण्याहून मुंबईला लोखंडी सळया घेऊन जाणाऱ्या ट्रेलरच्या चालकाचे, तीव्र उतार आणि वळणावर नियंत्रण सुटल्याने हा ट्रेलर, पुढे लोखंडी अँगल घेऊन जात असलेल्या दुसऱ्या ट्रेलरवर मागून जोरात आदळला. यामुळे दोन्ही अपघातग्रस्त ट्रेलर मार्गावरील दुसऱ्या लेनवरून जाणारी कार आणि तिसऱ्या लेनवरून जाणारी टेम्पो यांवर जोरात धडकले. दोन्ही ट्रेलर आणि टेम्पोमध्ये अडकलेल्या कारचा अक्षरशः चुराडा झाला.
यामुळे कारमधील तिघांचा मृत्यू झाला असून, चार जण गंभीर जखमी झाले आहेत. लोखंडी रॉडची वाहतूक करणाऱ्या ट्रेलर चालकाचाही जागीच मृत्यू झाला असून, टेम्पोमधील दोघे जण जखमी झाले आहेत. अपघातामुळे टेम्पो मार्गालगतचे लोखंडी संरक्षक दुभाजक तोडून मार्गालगतच्या दरीच्या अगदी टोकावर उलटून दरीच्या टोकावरच अडकला. टेम्पोमधील चालकासह प्रवाशांचे नशीब बलवत्तर म्हणून टेम्पो दरीत कोसळला नाही. एका ट्रेलरमधील लोखंडी रॉड मार्गावर आणि दरीत कोसळले.
वाहतुकीची कोंडी
चार वाहनांच्या भीषण अपघातामुळे मुंबईकडे जाणारा मार्ग वाहतूकीस बंद झाल्याने मुंबईकडे जाणारी वाहतूक खोळंबली होती. अपघाताची माहिती कळताच दस्तुरी (बोरघाट) महामार्गाचे सहाय्यक पोलिस निरीक्षक सूर्यकांत फराडे, जी. जी. पवार, यू. आय. पटेल, व्ही. बी. खैरनार यांनी घटनास्थळी धाव घेऊन अपघातग्रस्त वाहनांतील मृत व जखमींना आपत्कालीन यंत्रणेच्या पथकाच्या मदतीने बाहेर काढले. जखमींना पुढील उपचारांसाठी तत्काळ पनवेल येथील एम. जी. एम. हॉस्पिटलमध्ये रवाना केले असून, जखमींवर तेथे उपचार सुरू आहेत. त्यानंतर मार्गावरील त्यानंतर मार्गावरील लोखंडी रॉड, अँगल व वाहने बाजूला करून वाहतूकीसाठी एक लेन सुरू केली. तोपर्यंत रस्त्यावर सुमारे सहा ते सात किलोमीटर लांब वाहनांच्या रांगा लागल्या होत्या. सकाळी साडेअकरा वाजता अपघातग्रस्त वाहने बाजूला केल्यानंतर वाहतुकीसाठी मार्ग खुला केला. दुपारी बारा वाजता मुंबईकडे जाणारी वाहतूक सुरळीत झाली.
मोबाइल अॅप डाउनलोड करा आणि राहा अपडेट
