विविध विकास कामांचे उद्घाटन
म. टा. प्रतिनिधी पिंपरी
पिंपरी-चिंचवड महापालिकेच्या विविध विकासकामांचे रविवार (२५ डिसेंबर) खासदार शिवाजीराव अढळराव पाटील यांच्या हस्ते उद्घाटन करण्यात आले. या वेळी आमदार गौतम चाबुकस्वार, शिवसेनेच्या गटनेत्या सुलभा उबाळे, नगरसेविका शुभांगी बोऱ्हाडे, संगीता पवार, नगरसेवक धनंजय आल्हाट, उद्यान अधीक्षक पी. एम. गायकवाड आदी उपस्थित होते.
यमुनानगर येथील पेव्हिंग ब्लॉक बसविणे, मीनाताई ठाकरे जलतरण तलावाजवळ लहान मुलांसाठी जलतरण तलावाचे उद्घाटन, छत्रपती संभाजीराजे क्रीडा संकुल येथे लॉन टेनिस कोर्ट व व्हॉलिबॉल मैदानाचे उद्घाटन, पिंपरीतील आंबेडकर चौकातील प्रवेशद्वार कमानीचे उद्घाटन, यमुनानगर येथील मुक्ताई उद्यान येथे ओपन जीमचे उद्घाटन करण्यात आले.
या वेळी बोलताना अढळराव पाटील म्हणाले, ‘नागरिक हा केंद्रबिंदू मानून विकासकामे झाली पाहिजेत. असे झाल्यास शहराचा खऱ्या अर्थाने विकास होईल. त्या शहरातील मैदाने, रस्ते, उद्याने ही सुनियोजित व शहराच्या सौंदर्यात भर पाडणारी असायला हवीत.’ या वेळी कार्यक्रमाचे प्रास्तावीक सुलभा उबाळे यांनी केले. आभार शिवाजी साळवे यांनी मानले.
..
अजित पवारांच्या हस्ते भूमिपूजन
शहरातील पर्यावरण संतुलन राखण्यासाठी ४०० एकर जागेत १७२ उद्याने विकसित करण्यात आली आहेत. शहराचे हरित क्षेत्र ३० टक्के झाले आहे. यापुढेही आपले शहर हरित राखण्यासाठी सर्वांनी प्रयत्न करणे गरजेचे असल्याचे मत माजी उपमुख्यमंत्री अजित पवार यांनी व्यक्त केले.
पिंपरी-चिंचवड शहरातील विविध विकास कामांच्या प्रकल्पांचे भूमिपूजन माजी उपमुख्यमंत्री अजित पवार यांच्या हस्ते करण्यात आले. यामध्ये प्रभाग क्र. ४६ काळेवाडी, प्रभाग क्रमांक २२ चिंचवड गावठाण, प्रभाग क्र. २१ दळवीनगर, प्रभाग क्र. १६, आकुर्डी येथील प्रकल्पांचा समावेश आहे.
महानगरपालिकेच्या प्रभाग क्र. ४६ काळेवाडी येथे विकसित करण्यात आलेल्या ज्योतिबा उद्यान टप्पा क्र.२ चे उद्घाटन, प्रभाग क्रमांक २२, चिंचवड गावठाणमधील चापेकर चौक ते केशवनगर काळेवाडी काँक्रिट रस्त्याचे भूमिपूजन, प्रभाग क्र. २१ दळवीनगर मधील पाणीपुरवठा करणाऱ्या नवीन पाइपलाइन टाकण्याच्या कामाचे भूमिपूजन व भाजी मंडई कामाचे भूमिपूजन, पिंपरी चिंचवड महानगरपालिकेच्या वतीने प्रभाग क्र. १६, आकुर्डी येथील नवीन रुग्णालयाच्या कामाचा शुभारंभ करण्यात आला.
या वेळी माजी आमदार अण्णा बनसोडे, आझमभाई पानसरे, संजोग वाघेरे, योगेश बहल, शमीम पठाण, नगर सदस्य हनुमंत गावडे, स्थायी समिती सभापती हिरानंद उर्फ डब्बू आसवाणी, मंगला कदम, आझमभाई पानसरे, संजोग वाघेरे, विमल काळे, सविता साळुंखे, सुजाता टेकवडे, नीता पाडाळे, नगरसदस्य विनोद नढे, आशा सूर्यवंशी, हनुमंत गावडे, ॲड. संदीप चिंचवडे, अश्विनी चिंचवडे आदी उपस्थित होते.
यशवंतराव चव्हाण रुग्णालयात वर्षाला पाच लाख रुग्ण बाह्यरुग्ण विभागातून उपचार घेतात. त्या रुग्णालयावर असलेला ताण लक्षात घेता रुग्णांना अत्याधुनिक वैद्यकीय सेवा सुविधा पुरविण्यासाठी आकुर्डी येथील शंभर खाटांचे रुग्णालय महत्त्वाची कामगिरी करेल, असे मत अजित पवार यांनी व्यक्त केले.
आपण कितीही सावधगिरी बाळगली, तरी आयुष्यात प्रत्येकाला कधी तरी हॉस्पिटलची पायरी चढावी लागते. पिंपरी-चिंचवड शहराची वैद्यकीय गरज लक्षात घेऊन आकुर्डी येथे २४ तास सेवा देणारी अतिदक्षता विभागासह १०० खाटांचे अत्याधुनिक रुग्णालय उभारून येथील नागरिकांना सर्वप्रकारच्या वैद्यकीय सेवा पुरविल्या जातील. या रुग्णालयामुळे यशवंतराव चव्हाण रुग्णालयास होणारा वाढता ताण कमी होण्यास मदत होईल.
मोबाइल अॅप डाउनलोड करा आणि राहा अपडेट
