Tweet: @AdityaTanawade
पुणे : नव्या वर्षाचे स्वागत करण्यासाठी तरुणाईकडून वेगवेगळ्या पार्टीचे प्लॅन सुरू झाले आहेत. नव्या वर्षाच्या स्वागतासाठी डान्स-गाण्यांवर धमाल करत, मौज-मस्तीचे नियोजन झाले असून त्यासाठी शहरात विविध ठिकाणी डान्स फ्लोअर सज्ज झाले आहेत. शहरातल्या अनेक भागात तरुणांना आकर्षित करण्यासाठी विविध पब आणि हॉटेल्सकडून आकर्षक ऑफर्स दिल्या जात आहेत. त्यामुळे यंदाच्या न्यू इयर सेलिब्रेशनला तरुणाई ‘चिल’ होण्यासाठी उत्सुक आहे, एवढे नक्की.
पुण्यात ३१ डिसेंबरची अख्खी रात्र सेलिब्रेशन करायचा ट्रेंड वाढला आहे. ही बाब लक्षात घेऊन पुण्यातील अनेक उच्चभ्रू वस्त्यांमध्ये असलेले पब्स तरुणांना आकर्षक ऑफर देत आहेत. त्यामध्ये कपल ऑफर्स, ग्रुप ऑफर्स, पार्टी विथ लिकर अँड डिनर अशा अनेक प्रकारच्या ऑफर्स आहेत. त्यासाठी निरनिराळ्या प्रकारच्या सवलती हॉटेलांनी देऊ केल्या आहेत. त्यामुळे थर्टी फर्स्टची संपूर्ण रात्र एन्जॉय करण्याची तयारी करणाऱ्यांनी आतापासूनच पबमध्ये बुकिंग करायला सुरुवात केली आहे. पबमध्ये वाजणाऱ्या गाण्यांचा बाहेरच्या नागरिकांना फारसा त्रास होत नसल्याने आणि पोलिसांचाही त्रास नसल्याने तरुणाईची सर्वाधिक पसंती पबना मिळत आहे.
पुण्याच्या चारही दिशांना बार कम पब पसरले आहेत. चांदणी चौकाच्या पुढे पौडकडे जाताना काही पब आहेत. पुण्याबाहेर पार्टी करण्याची इच्छा असणाऱ्यांसाठी हा पर्याय उपलब्ध आहे. पुण्यात देखील जंगली महाराज रस्ता आणि फर्ग्युसन रस्त्यावर काही पब आहेत. हे पब आकाराने छोटे असले, तरी छोटे-छोटे ग्रप नक्की पार्टी करू शकतात. या शिवाय सेनापती बापट रस्ता आणि कोरेगाव पार्क या परिसरात असलेल्या काही फाइव्ह स्टार आणि सेव्हन स्टार हॉटेलांमध्येही नामवंत पब आहेत. एरवी, शनिवारी-रविवारी तुडुंब भरणाऱ्या या पबमध्ये खास ३१ डिसेंबरच्या रात्रीचे तरुणांच्या पसंतीचे कार्यक्रम ठरवण्यात आले आहेत. त्यासाठी काहींनी आंतरराष्ट्रीय पातळीवरच्या डीजेंना बोलावले आहे. त्यांना पाहण्यासाठी आणि त्यांनी लावलेल्या गाण्यांवर थिरकण्यासाठी तरुणाई ३१ तारखेला रात्री मोठ्या प्रमाणावर गर्दी करणार आहे.
बॉलिवूड नाईट, डिस्को, जॅझ, पॉप, इंटरनॅशनल साँग्स अशा तरुणांना थिरकायला लावणाऱ्या विविध संगीत प्रकारांवर आधारित गाणी पबमध्ये वाजवण्यात येणार आहेत. साधारण रात्री आठ वाजता पार्टी सुरू झाली की अगदी पहाटेपर्यंत सलग स्पीकरवर वाजत राहतील एवढी गाण्यांची तयारी झाली आहे. त्यासाठी पबचे डीजेसुद्धा सध्या मेहनत घेत आहेत. विविध प्रकारच्या गाण्यांच्या हँगओव्हरमध्ये तरुणाई यंदा झिंगणार आहे.
पब आणि डिस्को यांच्यासह तरुणाईची हुक्का पार्लरलाही पसंती आहे. ज्या तरुणांना धांगडधिंगा फारसा आवडत नाही आणि जे हुक्क्याचे शौकिन आहेत, अशा तरुणांसाठी हुक्का पार्लर देखील सज्ज झाली आहेत. राज्यात हुक्का पार्लरवर बंदी असली, तरी छुप्या प्रकारांनी का होईना, हुक्का पार्लर ३१ डिसेंबरच्या रात्री बक्कळ पैसे कमावणार आहेत. शिवाय पोलिसांच्या कारवाईपासून वाचण्यासाठी अनेकांनी घरीच हुक्क्याचा बेत आखला आहे. एकूणच गेल्या वर्षाला निरोप देण्यासाठी यंदा तरुणाई अभी तो पार्टी शुरू हुई है... असे म्हणत जुन्या वर्षाला बाय बाय म्हणणार आहे.
मोबाइल अॅप डाउनलोड करा आणि राहा अपडेट
