केंद्रीय गुन्हे अन्वेषण विभागाने (सीबीआय) वैद्यनाथ सहकारी नागरी बँकेच्या व्यवस्थापकासह तिघांविरुद्ध गुन्हा दाखल केला. तसेच पुणे, मुंबई, औरंगाबाद आणि बीड येथील ११ ठिकाणी छापे घातले. ‘वैद्यनाथ’मधील या संशयितांनी कट रचून बेकायदा २५ कोटी रुपये बीड येथून मुंबईला नेल्याचा ठपका ‘सीबीआय’ने ठेवला आहे.
दरम्यान, राज्याच्या ग्रामविकास मंत्री पंकजा मुंडे गटाच्या ताब्यात ही बँक आहे. खासदार प्रीतम मुंडे या बँकेच्या संचालिका असल्याने या घटनेला राजकीय रंग चढला आहे. मुंबई पोलिसांनी जप्त केलेले १० कोटी रुपये कोणाचे आहेत, यावरून जोरदार राजकीय चिखलफेक झाली होती. ‘सीबीआय’ने या प्रकरणी गुन्हा दाखल केल्याने ही रक्कम बीडवरून मुंबईला का नेली, याबाबत तपास करण्यात येत आहे.
‘सीबीआय’ने या प्रकरणी कट रचणे, फसवणूक करणे आदी कलमांखाली गुन्हा दाखल केला आहे. या २५ कोटी रुपयांमधील १० कोटी रुपयांची रोकड मुंबई पोलिसांनी जप्त केली होती. या प्रकरणी चिंचवड येथील एका संशयिताला ताब्यात घेण्यात आले होते. ‘सीबीआय’ने या खासगी व्यक्तीविरुद्धही गुन्हा दाखल केला आहे. चिंचवड येथील बँकेच्या शाखेची झडती घेण्यात आली, तसेच चिंचवड येथील खासगी व्यक्तीच्या मालमत्तांमध्ये छापे घालण्यात आले आहेत.
गुन्हा दाखल करण्यात आलेल्या संशयितांनी १९ नोव्हेंबर रोजी कट रचून बीड येथील बँकेच्या मुख्य शाखेतील २५ कोटी रुपयांची रक्कम (जुन्या नोटा) त्यांच्या घाटकोपर येथील शाखेत बदलण्यासाठी नेल्या होत्या. या संशयितांनी या २५ कोटींमधील १५ कोटी रुपये महाराष्ट्र राज्य नागरी सहकारी बँकेत भरल्याचा ‘सीबीआय’ला संशय आहे. जुन्या नोटा बदलून नव्या आणि काही जुन्या नोटांच्या स्वरूपात असलेले दहा कोटी रुपये घेऊन ते बीडला निघाले होते. या दरम्यान मुंबई पोलिसांनी संशयितांचे वाहन अडवून दहा कोटी रुपये जप्त केले होते. ही रोकड ‘सनी निसान’ कारमधून जप्त करण्यात आली होती, तसेच ही कार शिरोळे नावाच्या व्यक्तीच्या नावाने नोंदवण्यात आलेली आहे. मुंबई पोलिसांनी जप्त केलेली रक्कम प्राप्तिकर विभागाकडे दिली होती. प्राप्तिकर विभागाने प्राथमिक तपासानंतर या घटनेची माहिती ‘सीबीआय’ला दिली होती.
दरम्यान, पंचवीस कोटी रुपयांपैकी १० कोटी १० लाख रुपयांची रक्कम ही पिंपरी-चिंचवडमधील वैद्यनाथ सहकारी अर्बन बँकेच्या काळेवाडी शाखेत भरण्यासाठी नेण्यात येत होती. या वेळी ती पोलिसांनी पकडली, असे बँकेतर्फे
सांगण्यात आले होते.
मोबाइल अॅप डाउनलोड करा आणि राहा अपडेट
