पुणे-सोलापूर रोडवरील हडपसर उड्डाणपुलाखाली अनधिकृत रस्त्यावर भाजी विक्रेत्यांना बसू दिले जात आहेत. त्यामुळे ग्राहक महापालिकेच्या हडपसर भाजी मंडईमध्ये भाजी खरेदी करायला येत नसल्याने अधिकृत भाजीविक्रेत्यांनी रस्त्यावर भाजीविक्री करून आंदोलन केले. सुमारे शंभर भाजी विक्रते रस्त्यावर उड्डाणपुलाखाली भाजी विक्रीसाठी बसल्याने तब्बल तीन तास वाहतूक कोंडी झाली होती.
हडपसर उड्डाणपुलाखाली मागील चार महिन्यांपासून अनधिकृत भाजी विक्रते विक्री करत आहेत. याबाबत मंडईमधील महापालिकेला भाडे देणाऱ्या अधिकृत भाजी विक्रेत्यांनी हडपसर महापालिकेच्या कार्यालयाला वारंवार कळवूनही रस्त्यावरील विक्रेत्यांवर कारवाई केली जात नाही, असा आरोप करून भाजी मंडईतील विक्रेते आज सकाळी रस्त्यावरच भाजीविक्री करण्यासाठी बसले होते. यामुळे तब्बल तीन तास वाहतूक कोंडी झाली होती. त्यामुळे हडपसर पोलिस ताफ्यासह उड्डाणपुलाखाली आले. भाजी विक्रेत्यांना उठवण्याचा प्रयत्न करून महापालिका हडपसर कार्यालयासोबत चर्चा घडवून दिली. या वेळी हडपसर कार्यालयाचे सहायक आयक्त सुनील गायकवाड यांनी सांगितले, ‘आम्ही उड्डाणपुलाखालील अनधिकृत भाजी विक्रेत्यांवर कारवाई केली आहे. त्यानंतरही या ठिकाणी भाजी विक्रेते बसत आहेत. त्यामुळे उद्या सकाळपासून सलग पाच दिवस अतिक्रमण कारवाई करणार आहोत. हडपसर पोलिस ठाण्याचे वरिष्ठ पोलिस निरीक्षक विष्णू पवार म्हणाले, ‘महापालिकेच्या हडपसर कार्यालयासोबत भाजी विक्रीबाबतचे प्रश्न चर्चेने सोडवले पाहिजेत. यापुढे अशाप्रकारे कायदा हातात घेतला, तर संबंधितांवर गुन्हा दाखल करण्यात येईल.
मोबाइल अॅप डाउनलोड करा आणि राहा अपडेट
